ఎక్స్ పైరీ డేట్ లేని జోనర్ ఏదైనా ఉంది అంటే రొమాంటిక్ కామెడీ జోనర్ అని చెప్పవచ్చు. ఈ జోనర్ లో కథ, కథనాన్ని తయారు చెయ్యాలంటే చాలా కష్టం కూడా. అందుకే అరుదుగా దొరికే సినీ డైమండ్ లాగా అప్పుడప్పుడు మెరుస్తూ ఉంటాయి. ప్రస్తుతం సెల్యులాయిడ్ తో పాటు ఓటీటీలో ఎటు చూసినా హారర్, మిస్టరీ, క్రైమ్, తీవ్రమైన హత్యలు,రక్తపాతంతో కూడిన యాక్షన్ థ్రిల్లర్ల హోరు ఎక్కువైంది. ప్రతి వారం అనేక కొత్త సినిమాలు, వెబ్ సిరీస్‌లు డిజిటల్ ప్లాట్‌ఫామ్‌లలోకి వస్తున్నప్పటికీ, కుటుంబంతో కలిసి హాయిగా నవ్వుకునేలా ప్రశాంతమైన వినోదాన్ని అందించే కంటెంట్ చాలా అరుదుగా మారుతోంది. 

అలాంటి తరుణంలో, ఎలాంటి హింస లేదా రక్తపాతం లేకుండా స్వచ్ఛమైన నవ్వులు, మనసుకు హత్తుకునే మిడిల్ క్లాస్ ఎమోషన్లతో ప్రేక్షకులను అలరించేందుకు  సరికొత్త తెలుగు రొమాంటిక్ కామెడీ వెబ్ సిరీస్ ఓటీటీలోకి అడుగుపెట్టింది. అదే 'హరిచంద్ర కథ' (Harichandra Katha). ప్రముఖ ప్రాంతీయ ఓటీటీ ప్లాట్‌ఫామ్ 'ఆహా' (Aha) లో ఈ సిరీస్ ప్రస్తుతం విజయవంతంగా స్ట్రీమింగ్ అవుతూ ఓటీటీ ప్రియులను అమితంగా ఆకట్టుకుంటోంది.

ఈ వెబ్ సిరీస్‌కు సంబంధించి అత్యంత ఆసక్తికరమైన మరియు విశేషమైన విషయం ఏమిటంటే, దీని నిర్మాణం సాగిన తీరు. సాధారణంగా ఏ చిన్న వెబ్ సిరీస్ చిత్రీకరణకైనా కనీసం కొన్ని నెలల సమయం పడుతుంది. కానీ 'హరిచంద్ర కథ' టీమ్ మాత్రం ముందస్తు ప్రణాళిక, పక్కా ప్రీ-ప్రొడక్షన్ వర్క్‌తో కేవలం 11 రోజుల్లోనే (11 Days) షూటింగ్ ప్రక్రియని  విజయవంతంగా పూర్తి చేసి ట్రేడ్ వర్గాలని  సైతం ఆశ్చర్యపరిచింది. తక్కువ సమయంలోనే అత్యుత్తమ నాణ్యతతో కూడిన అవుట్‌పుట్‌ను రాబట్టడంలో దర్శకుడు మరియు ప్రొడక్షన్ బృందం చూపించిన సమర్థత ప్రేక్షకులను విశేషంగా ఆకట్టుకుంటోంది. బి2పి స్టూడియోస్ (B2P Studios) బ్యానర్‌పై బిందు కోత ఈ సిరీస్‌ను ఎంతో నిర్మలమైన అభిరుచితో నిర్మించారు.

మొత్తం 5 ఎపిసోడ్లుగా (5 Episodes) రూపొందిన ఈ రొమాంటిక్ కామెడీ డ్రామాలో నేటి యువత ఎదుర్కొంటున్న వాస్తవిక జీవిత సంఘటనలను అత్యంత సరదాగా ఆవిష్కరించారు. కథ విషయానికి వస్తే, ప్రధానంగా నేటి కాలపు ఐటీ ఉద్యోగుల జీవనశైలి, కార్పొరేట్ జాబ్ ఒత్తిళ్లు (Job Stress), ప్రేమాయణాలు, మిత్రుల మధ్య ఉండే సరదా గొడవలు మరియు మిడిల్ క్లాస్ కుటుంబాల భావోద్వేగాల చుట్టూ ఈ సిరీస్ తిరుగుతుంది. కథానాయకుడు హరినాథ్ రాజ్ కే (Harinath Raj K) మరియు కథానాయిక హేమా గోర్లే (Hema Gorle) తమ నటనతో నవ్వులు పూయించడమే కాకుండా, సహజమైన ఎక్స్‌ప్రెషన్లతో క్యారెక్టర్స్ కి న్యాయం చేశారు. వీరిద్దరి మధ్య వచ్చే రొమాంటిక్ కామెడీ సీన్లు, హాస్య సన్నివేశాలు వీక్షకులకు మంచి ఆహ్లాదాన్ని అందిస్తాయి.

వీరితో పాటు గోపీచంద్ అల్లా, అర్జున్ శ్రీనివాస్, ప్రవీణ్ కింతలి, శివ ప్రసాద్, వేణు గోపాల్ వంటి నటులు తమ పరిధి మేర మెప్పించి కామెడీ టైమింగ్‌తో అలరించారు. ప్రతీ ఎపిసోడ్‌లోనూ నవ్వులు పూయించే పంచ్‌లు, యువతకు వెంటనే కనెక్ట్ అయ్యే సన్నివేశాలు పుష్కలంగా ఉన్నాయి. కార్తీక్ కృష్ణ (Karthik Krishna) అందించిన దర్శకత్వం, కథనం ప్రేక్షకులకు ఎక్కడా బోర్ కొట్టకుండా చకచకా సాగిపోతాయి. నితిన్ బాల్జా (Nitin Balja) అందించిన పాటలు, నేపథ్య సంగీతం ఈ ఫీల్ గుడ్ డ్రామాకు మరింత ప్రాణం పోశాయి. అలాగే వాసు అందించిన ఛాయాగ్రహణం దృశ్యాలను కలర్‌ఫుల్‌గా ఆవిష్కరించగా, హరినాథ్ రాజ్ కూర్పు సిరీస్ వేగాన్ని పెంచింది.

Also read: లెనిన్ ఓటిటి డేట్ ఇదే.. ఇది సరికొత్త ప్రయోగం  

ప్రస్తుతం ఓటీటీలో వైలెంట్ కంటెంట్ మధ్య రిలీజ్ అయిన ఈ క్లీన్ అండ్ ఫ్యామిలీ ఎంటర్‌టైనర్ ప్రేక్షకులకు ఒక రిఫ్రెషింగ్ అనుభూతిని అందిస్తోంది. వారాంతంలో ఆఫీస్ ఒత్తిడిని మర్చిపోయి, ఇంట్లోనే హాయిగా డిజిటల్ స్క్రీన్ ముందు కూర్చుని కుటుంబంతో సహా వీక్షించేందుకు 'హరిచంద్ర కథ' ఒక బెస్ట్ ఆప్షన్‌గా నిలుస్తోంది. మరి 'ఆహా' వేదికపై దుమ్మురేపుతున్న ఈ సిరీస్‌ ని  మీరూ మిస్ కాకుండా చూసి నవ్వులని స్టోరేజ్ చేసుకోండి.

 

 

Harichandra Katha, Aha