గ్లోబల్ స్టార్ రామ్ చరణ్ (Ram Charan), ఉప్పెన ఫేమ్ బుచ్చిబాబు (Buchi Babu) కాంబినేషన్‌లో వస్తున్న మోస్ట్ అవేటెడ్ పాన్ ఇండియా చిత్రం 'పెద్ది' (Peddi). జాన్వీ కపూర్ హీరోయిన్ గా నటించిన ఈ స్పోర్ట్స్ డ్రామాపై అంచనాలు ఆకాశాన్నంటుతున్నాయి. ఈ చిత్రానికి ఆస్కార్ విజేత ఏఆర్ రెహమాన్ సంగీతం ప్రధాన ఆకర్షణగా నిలిచింది. తాజాగా దర్శకుడు బుచ్చిబాబుతో ఏఆర్ రెహమాన్ (AR Rahman) జరిపిన ప్రత్యేక ఇంటర్వ్యూ సోషల్ మీడియాలో విపరీతంగా ట్రెండ్ అవుతోంది.

ఈ ఇంటర్వ్యూలో బుచ్చిబాబు 'పెద్ది' చిత్రం కోసం రెహమాన్ అందించిన మ్యూజిక్ గురించి పలు ఆసక్తికర విషయాలను పంచుకున్నారు. సినిమాలో ఇప్పటికే విడుదలైన 'చికిరి చికిరి', 'రై రై రారా', 'హల్లల్లల్లో', 'మస్సా మస్సా' వంటి పాటలు యూట్యూబ్‌లో సెన్సేషన్ క్రియేట్ చేస్తున్నాయని గుర్తు చేశారు. తాను కేవలం కథను, సిట్యువేషన్లను మాత్రమే వివరించానని, కానీ రెహమాన్ సార్ తన అద్భుతమైన ట్యూన్స్‌తో ఈ సినిమాను సరికొత్త స్థాయికి తీసుకెళ్లారని కొనియాడారు.

బుచ్చిబాబు మాటలకు ఏఆర్ రెహమాన్ స్పందిస్తూ.. దర్శకుడితో తనకున్న కెమిస్ట్రీ గురించి ఆసక్తికర వ్యాఖ్యలు చేశారు. "నన్ను ప్రేమించే మరియు పూర్తిగా విశ్వసించే ఒక దర్శకుడితో పనిచేయడం కోసం నేను చాలా కాలంగా ఎదురుచూస్తున్నాను. బుచ్చిబాబులో నాకు ఆ నమ్మకం కనిపించింది. ఒక దర్శకుడు సంగీత దర్శకుడిని 100 శాతం నమ్మినప్పుడు.. ఆ మ్యూజిక్ డైరెక్టర్ తన నుండి 150 శాతం అత్యుత్తమ అవుట్‌పుట్ ఇవ్వగలడు" అని రెహమాన్ చెప్పుకొచ్చారు.

ఇదే క్రమంలో సినిమాల్లో బడ్జెట్ మరియు దర్శకుల ప్రమేయం గురించి రెహమాన్ తనదైన శైలిలో స్పందించారు. కొందరు దర్శకులు ప్రతిదానికీ మార్పులు చేయాలని ఒత్తిడి తెస్తుంటారని, అలాంటప్పుడు ఆ సంగీతంలో ఒరిజినాలిటీ దెబ్బతింటుందని అన్నారు. "బడ్జెట్ ఎక్కువైతే.. అక్కడ నమ్మకం అనేది తగ్గిపోతుంది" అంటూ ఆయన నవ్వుతూ చేసిన వ్యాఖ్యలు ఇప్పుడు నెట్టింట వైరల్ అవుతున్నాయి. బడ్జెట్ అనేది క్రియేటివిటీని ఎలా ప్రభావితం చేస్తుందో ఆయన సున్నితంగా వివరించారు.

'చికిరి చికిరి' అనే పదం వెనుక ఉన్న సీక్రెట్‌ను కూడా రెహమాన్ ఈ సందర్భంగా రివీల్ చేశారు. తనకు 21 ఏళ్ల వయసు ఉన్నప్పుడు తన పర్కషన్ ప్లేయర్ రాజా గారు ఈ పదాన్ని తరచూ వాడేవారని, ఆ తెలుగు పదం తన మనసులో ఉండిపోయి ఇప్పుడు ఈ పాట రూపంలోకి వచ్చిందని తెలిపారు. 

అలాగే సినిమాలో బుచ్చిబాబు ప్లాన్ చేసిన చిన్న చిన్న డీటెయిలింగ్స్, ముఖ్యంగా 'హల్లల్లల్లో' సాంగ్‌లో వచ్చే కొన్ని డ్యాన్స్ మూమెంట్స్ మరియు గురువు ముందు హీరో ప్రవర్తించే విధానం తనకు ఎంతగానో నచ్చాయని రెహమాన్ అప్రిషియేట్ చేశారు. ఒక దర్శకుడికి ఇలాంటి సెన్సిటివ్ డీటెయిల్స్ చాలా ముఖ్యమని ఆయన ప్రశంసించారు.

చివరగా 'పెద్ది' సినిమా గురించి చెబుతూ.. బుచ్చిబాబు కథ చెప్పిన దానికంటే సినిమా విజువల్ గా చాలా అద్భుతంగా వచ్చిందని రెహమాన్ చెప్పారు. రామ్ చరణ్ అభిమానులతో పాటు మ్యూజిక్ లవర్స్‌ను కూడా ఈ చిత్రం ఎంతగానో అలరిస్తుందని చిత్ర యూనిట్ నమ్మకంగా ఉంది. జూన్ 4న ప్రపంచవ్యాప్తంగా థియేటర్లలోకి రాబోతున్న ఈ సినిమా ఎలాంటి సంచలనాలు సృష్టిస్తుందో చూడాలి.