మరోసారి విలన్ గా రానా.. హీరో ఎవరో తెలుసా..?
on Jul 2, 2024
రానా దగ్గుబాటి (Rana Daggubati) కెరీర్ స్టార్టింగ్ నుంచి హీరో పాత్రలకే పరిమితమవ్వకుండా విభిన్న పాత్రలతో అలరిస్తున్నాడు. ముఖ్యంగా 'బాహుబలి'లో అతను పోషించిన నెగటివ్ రోల్ 'భల్లాల దేవ' ఎంతో పేరు తీసుకొచ్చింది. ఇప్పుడు రానా మరోసారి నెగటివ్ రోల్ లో అలరించడానికి సిద్ధమవుతున్నట్లు తెలుస్తోంది. నాని (Nani) హీరోగా రూపొందనున్న 'హిట్-3' (Hit 3)లో రానా విలన్ గా నటించనున్నట్లు సమాచారం.
నానికి చెందిన నిర్మాణ సంస్థ వాల్ పోస్టర్ సినిమా బ్యానర్ లో రూపొందే హిట్ ప్రాంఛైజ్ చిత్రాలకు మంచి క్రేజ్ ఉంది. ఈ ప్రాంఛైజ్ లో ఇప్పటిదాకా రెండు సినిమాలు రాగా, రెండూ మంచి విజయాలు సాధించాయి. మొదటి భాగంలో విశ్వక్ సేన్, రెండో భాగంలో అడివి శేష్ నటించగా.. మూడో భాగంలో నానినే హీరోగా నటిస్తున్నాడు. ఇప్పటికే హిట్-2 చివరిలో నాని పాత్ర పరిచయమై ప్రేక్షకులను మెప్పించింది. దీంతో హిట్-3 కోసం ప్రేక్షకులు ఎంతగానో ఎదురుచూస్తున్నారు. ఇక ఇప్పుడు ఇందులో విలన్ గా రానా నటించనున్నాడనే వార్త మరింత ఆసక్తికరంగా మారింది.
నాని, రానా మంచి స్నేహితులు. అందుకే నాని అడగగానే ఏమాత్రం ఆలోచించకుండా 'హిట్-3'లో యాక్ట్ చేయడానికి రానా ఓకే చెప్పాడట. ఇందులో పోలీస్ గా నాని, కిల్లర్ గా రానా కనిపించనున్నారని.. వీరి మధ్య వచ్చే సన్నివేశాలు ఓ రేంజ్ లో ఉంటాయని టాక్.
నాని ఇటీవల 'సరిపోదా శనివారం' షూటింగ్ పూర్తి చేశాడు. ఈ సినిమా ఆగస్టు 29న ప్రేక్షకుల ముందుకు రానుంది. దీని తరువాత నాని నటించబోయే సినిమా 'హిట్-3'నే అని తెలుస్తోంది. త్వరలోనే ఇది సెట్స్ పైకి వెళ్లే అవకాశముంది అంటున్నారు.
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
