తెలంగాణ టీడీపికి చెందిన నలుగురు ఎమ్మెల్యేలు టీఆర్ఎస్‌లో చేరిన వార్తలు వచ్చిన విషయం తెలిసిందే. అయితే ఇద్దరు ఎమ్మెల్యేలు ధర్మారెడ్డి, ప్రకాష్ గౌడ్ తెలుగుదేశం పార్టీని వీడటం లేదని తమకు సమాచారం ఇచ్చారని తెలుగుదేశం నాయకుడు ఎల్.రమణ తెలిపారు. నలుగురు ఎమ్మెల్యేలు కలసి కేసీఆర్ దగ్గరకి వెళ్ళలేదని, విడివిడిగా వెళ్ళారని రమణ చెప్పారు. ధర్మారెడ్డి, ప్రకాష్ గౌడ్ స్థానిక సమస్యల గురించి చెప్పడానికి మాత్రమే కేసీఆర్ దగ్గరకి వెళ్ళారని రమణ తెలిపారు. పార్టీ క్రమశిక్షణను ఎవరు ఉల్లంఘించినా చర్యలు తప్పవని అన్నారు. తెలంగాణ రాష్ట్ర సాధనలో తెలుగుదేశం పార్టీ చొరవ గురించి ప్రజలకు తెలుసని, ఎవరికైనా అనుమానాలుంటే తీరుస్తామని ఆయన అన్నారు.