పెట్రోల్ ధరలను కేంద్రంలోని కాంగ్రెస్ ప్రభుత్వం ఉత్సాహంగా పెంచినప్పటికీ సమయంలో అడ్డురాని ఎన్నికల నిబంధనలు తగ్గించడానికి ఏ విధంగా అడ్డువస్తాయని ప్రజలు ప్రశ్నిస్తున్నారు. చమురు కంపెనీలు పెంచిన ధరలో రెండు రూపాయలు తగ్గించడానికి ముందుకు రాగా, రాష్ట్ర ప్రభుత్వం మూడు శాతం పన్ను తగ్గించుకోవడం ద్వారా మరో 1.30 పైసలు తగ్గించడానికి ముందుకు వచ్చింది. ఈ స్థితిలో పెట్రోల్ ధర 3నుంచి 3.50రూపాయల వరకు తగ్గే అవకాశం వుంది. కాని ఎన్నికల నియమావళి అమల్లో వున్నందున ధర తగ్గించడానికి వీలులేదని ఎన్నికల సంఘం అభ్యంతరం తెలిపినట్టు తెలుస్తోంది. ఎట్టకేలకు కేంద్రం లీటరుకు 2రూపాయలు తగ్గించింది. కాని రాష్ట్రప్రభుత్వం మాత్రం ఇంకా పన్ను తగ్గించలేదు. 15వ తేదీ వరకు ఎన్నికల నియమావళి అమల్లో వుంటుంది..అంటే జూన్ 15 తేదీ వరకూ ధరలు తగ్గించడం సాధ్యం కాదు. ఈ వ్యవధిలో ప్రజలు పెంచిన ధరల ప్రకారమే పెట్రోలు కొనుగోలు చేయాలి. అసలు ఉప ఎన్నికలే దండగమారి వ్యవహారం అని భావిస్తున్న ప్రజలు, ధరలు తగ్గించకుండా ఎన్నికల కమీషన్ అడ్డుపడుతున్నందుకు పెట్రోల్ వినియోగించే ప్రతి వ్యక్తి నష్టపోతుంటే, పన్నువసూలు చేసే ప్రభుత్వాలు ఈ 16రోజులలో వందలకోట్ల రూపాయలు లాభం పొందే అవకాశం కలిగింది. ఎన్నికల తర్వాత ప్రభుత్వం ఇచ్చిన మాట ప్రకారం పన్ను తగ్గిస్తుందా? పెంచిన ధరకు ప్రజలు అలవాటు పడ్డారులే అని వదిలేస్తుందా? చూడాలి.