పాకిస్థాన్ మాజీ ప్రధాని, పాకిస్థాన్ తెహ్రీక్ ఏ ఇన్సాఫ్ (పీటీఐ) వ్యవస్థాపకుడు ఇమ్రాన్ ఖాన్  ఆరోగ్య పరిస్థితి విషమంగా ఉందా?  ఆయన తీవ్ర అనారోగ్య సమస్యలతో బాధపడుతున్నారా?  అంటే ఆ దేశ మాజీ అధ్యక్షుడు   ఆరిఫ్ అల్వీ ఔననే అంటున్నారు.  సుదీర్ఘ కాలంగా జైలు శిక్ష అనుభవిస్తున్న ఇమ్రాన్ ఖాన్  వైద్య నివేదికలను పలువురు సీనియర్ వైద్య నిపుణులతో కలిసి సమగ్రంగా విశ్లేషించిన అనంతరం ఈ విషయం బయటపడిందని ఆయన చెబుతున్నారు.  

వైద్య నివేదికల ప్రకారం ఇమ్రాన్ తీవ్రమైన గుండె దడ,   రక్తపోటు,  మానసిక ఒత్తిడి సంబంధిత సమస్యలతో బాధపడుతున్నట్లు అల్వీ స్పష్టం చేశారు. ప్రస్తుతం ఆయనను వెంటనే జైలు నుంచి బయటకు తరలించి,   ఆధునిక ఆసుపత్రిలో స్వతంత్ర వైద్యుల బృందం పర్యవేక్షణలో మెరుగైన చికిత్స అందించాల్సిన అవసరం  ఉందని ఆరిఫ్ అల్వీ చెబుతున్నారు.  

 ఇమ్రాన్ ఖాన్‌కు కార్డియాక్ ఆందోళనలు ఉన్నందున వెంటనే కార్డియాక్ ఎంఆర్‌ఐ, సీటీ యాంజియోగ్రామ్, స్ట్రెస్‌ టెస్ట్‌ ,  ఎకోకార్డియోగ్రామ్‌ వంటి కీలక వైద్య పరీక్షలు తక్షణమే నిర్వహించాలని డిమాండ్ చేశారు.  

గత మూడేళ్లుగా జైలు గోడల మధ్య ఏకాంతంగా ఉండటం ఇమ్రాన్ ఆరోగ్యంపై తీవ్ర ప్రతికూల ప్రభావాన్ని చూపిందన్న  అల్వీ  దేశంలో నెలకొన్న రాజకీయ అస్థిరత, సొంత పార్టీకి చెందిన సహచర నాయకుల అరెస్టులు, కొందరి అకాల మరణాలు ఆయనపై తీవ్రమైన మానసిక ఒత్తిడిని పెంచాయన్నారు. దీనికి తోడు సమాచార వ్యవస్థకు దూరంగా ఉంచడం, కనీసం పుస్తకాలు, వార్తాపత్రికలు చదివేందుకు కూడా పరిమిత అనుమతులు మాత్రమే ఇవ్వడం సమస్యను   తీవ్రం చేసిందన్నారు. 

మరోవైపు, గత ఏడు నెలలుగా ఇమ్రాన్ ఖాన్‌ను కలిసేందుకు కుటుంబ సభ్యులకు, వ్యక్తిగత వైద్యులకు, న్యాయవాదులకు అధికారులు అనుమతి నిరాకరిస్తున్నారని ఇటీవల  కుమారులు ఇటీవల అంతర్జాతీయ స్థాయిలో గళమెత్తిన సంగతి విదితమే.   ఈ పరిణామాల నేపథ్యంలో  మాజీ అధ్యక్షుడు చేసిన హెచ్చరికలు ఇమ్రాన్ మద్దతుదారుల్లో  ఆందోళనకు కారణమయ్యాయి. 

పాకిస్థాన్ ప్రధానిగా 2018 నుండి 2022 వరకు సేవలందించిన ఇమ్రాన్ ఖాన్, అధికార పతనం అనంతరం 2023 నుంచి వివిధ కేసులలో జైలు జీవితం గడుపుతున్నారు. అయితే తనపై నమోదైన ప్రతి కేసూ రాజకీయ కక్ష సాధింపు చర్యలలో భాగమేనని, ప్రస్తుత పాలకులు ఉద్దేశపూర్వకంగానే తనను వేధిస్తున్నారని ఇమ్రాన్ ఖాన్ తో పాటు ఆయన పార్టీ నాయకత్వం గట్టిగా చెబుతోంది. 

Imran Khan Health Critical,  Pakistan Politics, Arif Alvi,  Adiala Jail, Pakistan News