భారీస్థాయిలో భూకంపం వచ్చేస్తుందని అదిలాబాద్‌జిల్లాలోని మూడు మండలాల వారిని ఆకతాయిలు భయపెట్టారు. ఆకతాయిల వదంతులు నమ్మి రాత్రంతా రోడ్డుపైనే ఆ మండలాల్లో వారు జాగారం చేశారు. అయితే వారు చెప్పినట్లు ఎటువంటి భూకంపం రాలేదు సరి కదా! నిద్రలేని రాత్రిని గడపాల్సి వచ్చిందని మండలవాసులు ఆవేదన వ్యక్తం చేస్తున్నారు. అర్థరాత్రి రెండుగంటలకు భూకంపం వస్తుందని ఆంధ్రా`మహారాష్ట్ర సరిహద్దు గ్రామాల వారిని ఆకతాయిలు భయపెట్టారు. దీంతో అర్థరాత్రి రెండుగంటలకు గ్రామస్తులు ఇళ్లు వదిలేసి బయటకు వచ్చారు. ఒకవైపు నిరక్షరాస్యత, మరోవైపు అవగాహన లేమి వల్ల నిర్మల్‌, ఉట్నూరు, సారంగపూర్‌ మండలాల్లో భూకంప వదంతులు బలంగా నమ్మారు. అందుకే భూకంపం వల్ల తమ ఇళ్లు కూలిపోయి దారుణమైన పరిస్థితులు ఎదురవ్వవచ్చని వారు ఆందోళన చెందారు. ఒకదశలో ఈ మండలాల్లో వారు వీధుల్లో పరుగులు కూడా తీశారు. ఇరుగుపొరుగు వారికీ విషయం చెప్పి వారిని కూడా బయటకు తీసుకువచ్చారు. అసలు భూకంపం వస్తే ఆ ప్రకంపనలు ముందుగా అర్థమవుతాయని, ఆ ప్రకంపనలు వచ్చినప్పుడే బయటకు రావాలని, ముందస్తుగా ఒక సమయం పెట్టుకుని భూమికంపించదని, ఆకతాయిలు ఎవరో సృష్టించిన వదంతులను నమ్మి ఇంకోసారి పొరబడవద్దని అథికారులు విశదీకరించారు. భయపడాల్సిన పనేమీ లేదని వారు స్పష్టం చేశారు. భూకంపం వచ్చేటప్పుడు రెక్టార్‌స్కేలుపై దాని తీవ్రత నమోదవుతుందని, అప్పుడు కూడా తామే అప్రమత్తమవుతామని అధికారులు స్పష్టం చేశారు.