ఈ నెల 12న జరగనున్నఉప ఎన్నికలు హైటెక్ స్థాయిని తలపిస్తున్నాయి. ల్యాప్ టాప్ ల హడావుడితోనూ, లైవ్ టెలీకాస్ట్ లతోనూ ఈ ఎన్నికలు హోరెత్తనున్నాయి. సాంకేతిక పరిజ్ఞానానికి నిలువుటద్దంలా ఈ ఎన్నికలకు ఏర్పాట్లు చేశారు. అక్రమాలకూ తావు ఇవ్వకుండా జాగ్రత్తలను తీసుకున్నారు. ఈ సాంకేతిక పరిజ్ఞానం ద్వారా ఎన్నికల కమిషన్ అప్రమత్తంగా వ్యవహరిస్తోంది. ఇంజనీరింగ్ విద్యార్థులు నాలుగు వేలమంది ఈ ఉప ఎన్నికల్లో కీలకపాత్ర పోషిస్తున్నారు. వీరికి సాంకేతిక సహాయం అందించేందుకు రాష్ట్ర ఎన్నికల కమిషన్ పూర్తిస్థాయి ఏర్పాట్లు చేసింది. ఢిల్లీ నుంచి సాంకేతిక నిపుణులు నలుగురిని రాష్ట్రానికి రప్పించింది. వీరితో పాటు హైదరాబాద్ లో ఉన్న మరో ఇద్దరు నిపుణులను కూడా ఎన్నికల కమిషన్ పంపిస్తోంది. నూజివీడు ట్రిపుల్ ఐటి నుంచి 1600మంది, ఆర్కేవాలీ నుంచి 2000మంది, బాసర నుంచి 400మంది ఇంజనీరింగు విద్యార్థులు ఎన్నికలను అంతర్జాలంలో ప్రత్యక్షప్రసారం చేయనున్నారు. వీరికి శిక్షణ ఇచ్చేందుకు పైన చెప్పిన ఆరుగురు నిపుణులూ నూజివీడు వచ్చారు. ఈ ఇంజనీరింగ్ విద్యార్థులకు వసతి సౌకర్యాలు కల్పించటంతో పాటు ఎన్నికల్లో పాల్గొన్నందుకు 500రూపాయలు, మోంటారుకు వెయ్యిరూపాయలు పారితోషికాన్ని ఎన్నికల కమిషన్ ప్రకటించింది. పాయకరావుపేట. ఒంగోలు, రామచంద్రపురం, నర్సాపురం, పోలవరం, ప్రత్తిపాడు, మాచర్ల, కందుకూరు, కావలి ఎన్నికల్లో ఈ ఇంజనీరింగ్ విద్యార్థులు సేవలందించనున్నారు. అలానే శ్రీకాకుళంలోని 260 పోలింగ్ కేంద్రాల్లో వెబ్ కెమెరాలను ఉంచాలని ఎన్నికల ప్రధానాధికారి భన్వర్ లాల్ కోరారు.