ప్రభుత్వ ఉద్యోగులు లంచం తీసుకుంటూ ఏసీబీ అధికారుల చేతికి చిక్కిన ఘటనలు వెలుగులోకి వస్తున్నా.. కొంతమంది అధికారులు మాత్రం తళుకు బెళుకు లేకుండా రహస్యంగా లంచం డిమాండ్ చేస్తూ డబ్బులు వసూలు చేస్తున్నారు. తాజాగా మరో అధికారి ఏసీబీ వలలో చిక్కుకున్నాడు. మంచిర్యాల జిల్లా భీమిని మండలంలోని పెద్దపేట జీపీలో గ్రామ పరిపాలన అధికారిగా దుర్గాప్రసాద్ పనిచేస్తున్నాడు. ఓ బాధితుడు తన పేరు మీద భూమిని ధ్రువీకరించడంతో పాటు పట్టా పాస్‌బుక్‌ల జారీకి సంబంధించి దుర్గాప్రసాద్‌ను కలిశాడు. అయితే ఇందుకు రూ.1,30,000 లంచంగా ఇవ్వాలని దుర్గాప్రసాద్ డిమాండ్ చేశాడు. 

అంత పెద్ద మొత్తంలో తాను ఇవ్వలేనని బాధితుడు మొరపెట్టుకున్నా.. దుర్గాప్రసాద్ పట్టించుకోలేదు. పని పూర్తి కావాలంటే డబ్బులు ఇవ్వాల్సిందేనని కరాఖండిగా చెప్పాడు. దీంతో మొదటగా రూ.80,000 చెల్లించాలని, పని పూర్తయిన తర్వాత మరో రూ.50,000 ఇవ్వాలని డీల్ కుదుర్చుకున్నాడు. దీంతో చేసేదేమీ లేక బాధితుడు ఏసీబీ అధికారులను ఆశ్రయిం‌చాడు. బాధితుడి ఫిర్యాదుతో పక్కా ప్రణాళిక ప్రకారం ఏసీబీ అధికారులు రంగంలోకి దిగారు.పెద్దపేట శివార్లలోని వ్యవసాయ పొలాల సమీపంలో నిందితుడు దుర్గాప్రసాద్ మరో వ్యక్తితో కలిసి అక్కడికి వచ్చాడు. బాధితుడు దుర్గాప్రసాద్‌కు రూ.80,000 అందించగా.. ఆ డబ్బులను మరో వ్యక్తికి ఇవ్వాలని సూచించాడు.

దుర్గాప్రసాద్ సూచన మేరకు బాధితుడు మరో వ్యక్తికి డబ్బులు అందిస్తుండగా ఏసీబీ అధికారులు రెడ్‌హ్యాండెడ్‌గా పట్టుకున్నారు. అధికారులు తనను పట్టుకోకుండా ఉండేందుకు దుర్గాప్రసాద్ పక్కా ప్లాన్ ప్రకారం డబ్బులను తన చేతితో తీసుకోకుండా మరో వ్యక్తి ద్వారా స్వీకరించాడు. ఈ విషయాన్ని గుర్తించిన ఏసీబీ అధికారులు దుర్గాప్రసాద్‌తో పాటు మరో వ్యక్తిని అరెస్టు చేశారు. అనంతరం ఇద్దరినీ కరీంనగర్‌లోని కోర్టు ముందు హాజరుపరిచి రిమాండ్‌కు తరలించారు.

[ ACB, Anti Corruption Bureau, Bribe, ₹80 Thousand Bribe, Village Administrative Officer, VAO, ACB Raid, Bribery Case, Manchryala District, Bhimini Mandal,  Peddapeta GP, Durga Prasad, CM Revanth reddy ]