ప్రేమలో యాంకర్ వర్షిణి?
on May 3, 2021
బుల్లితెరపై యాంకర్ గా ఎన్నో షోలు చేస్తోన్న వర్షిణి సౌందరాజన్ ఇప్పుడు ప్రేమలో పడిందనే వార్త హాట్ టాపిక్ గా మారింది. మోడల్ గా కెరీర్ మొదలుపెట్టిన ఈ బ్యూటీ ఇప్పుడు బుల్లితెరపై యాంకర్ గా సెటిల్ అయిపోయింది. ఎన్నో షోలు, ఈవెంట్స్ తో బిజీగా ఉన్న సమయంలోనే ఆమెకి 'చందమామ కథలు' అనే సినిమాలో నటించే ఛాన్స్ వచ్చింది. ఆ తరువాత కూడా కొన్ని సినిమాల్లో కనిపించింది. కానీ ఆమెకి సరైన అవకాశాలు రాకపోవడంతో బుల్లితెరకే పరిమితమైంది.
ఈ మధ్యలో 'పెళ్లి గోల' అనే వెబ్ సిరీస్ లో నటించింది. ఈ సిరీస్ సక్సెస్ అవ్వడంతో వర్షిణి పాపులారిటీ పెరిగింది. ఈ క్రమంలోనే ఆమెకి 'ఢీ' షోలో యాంకరింగ్ చేసే ఛాన్స్ వచ్చింది. ప్రస్తుతం ఈ భామ 'కామెడీ స్టార్స్' అనే షోకి యాంకరింగ్ చేస్తోంది. కొన్నాళ్లక్రితం వర్షిణి.. సుడిగాలి సుధీర్ తో ప్రేమాయణం సాగిస్తున్నట్లు వార్తలు వినిపించాయి. రీసెంట్ గా హైపర్ ఆదితో డేటింగ్ చేస్తుందనే ప్రచారం మొదలైంది. అయితే ఈ వార్తలను వర్షిణి ఖండించింది. వరుస షోలతో ఎంతో బిజీగా ఉన్న వర్షిణి సోషల్ మీడియాలో చాలా యాక్టివ్ గా ఉంటోంది.
తన కెరీర్ కి సంబంధించిన విషయాలతో పాటు వ్యక్తిగత విషయాలను కూడా ఫ్యాన్స్ తో పంచుకుంటోంది. తాజాగా ఈ బ్యూటీ తన ఇన్స్టాగ్రామ్ స్టోరీస్ లో ఓ ఫోటో షేర్ చేసింది. అందులో వర్షిణి ఓ వ్యక్తి భుజంపై వాలిపోయి కనిపించింది. అతడి భుజానికి తల ఆన్చి కళ్లు మూసుకుని తన్మయత్వంలో మునిగి తేలుతోంది. అయితే ఫొటోలో ఉన్న వ్యక్తి ముఖం కనిపించకుండా జాగ్రత్త పడింది. దీంతో ఈ ఫోటోకి సంబంధించిన స్క్రీన్ షాట్లను తీసి సోషల్ మీడియాలో వైరల్ చేస్తున్నారు నెటిజన్లు. ఈ ఫోటో చూసిన వారంతా వర్షిణి ప్రేమలో ఉందనే విషయాన్ని కన్ఫర్మ్ చేసేస్తున్నారు. మరి దీనిపై అమ్మడు క్లారిటీ ఇస్తుందేమో చూడాలి! ఇంతకీ ఆమె తల ఆనించిన ఆ భుజం ఎవరిది?
Also Read