టాలీవుడ్ (Tollywood) ఇండస్ట్రీలో థియేటర్ల పర్సంటేజీ వ్యవహారం ఇప్పుడు ఒక సెన్సిటివ్ ఇష్యూగా మారింది. సింగిల్ స్క్రీన్ థియేటర్లలో పూర్తిస్థాయి పర్సంటేజీ విధానాన్ని అమలు చేయాలని తెలంగాణ ఎగ్జిబిటర్లు పట్టుబడుతుండగా, దీనిని నిర్మాతలు వ్యతిరేకిస్తున్నారు. ఈ క్రమంలో ఒకరిపై ఒకరు చేసుకుంటున్న విమర్శలు హాట్ టాపిక్ గా మారాయి. ఈ పరిణామాల నేపథ్యంలో తాజాగా తెలంగాణ స్టేట్ ఫిల్మ్ ఛాంబర్ ఆఫ్ కామర్స్ (TSFCC) గురువారం ఒక ప్రెస్ మీట్ నిర్వహించి తమ వాదనను వినిపించింది.

ఈ సమావేశంలో ఫిల్మ్ ఛాంబర్ కార్యదర్శి శ్రీధర్, ప్రముఖ నిర్మాత సి.కల్యాణ్ తదితరులు పాల్గొన్నారు. సమావేశంలో శ్రీధర్ మాట్లాడుతూ పర్సంటేజీ విధానం గురించి కీలక వ్యాఖ్యలు చేశారు. పర్సంటేజీ విధానం కోసం తాము 2008 నుండి పోరాడుతున్నామని ఆయన గుర్తు చేశారు. గతేడాది కూడా ఇదే విషయంపై అడగ్గా, 'హరిహర వీరమల్లు' వంటి పెద్ద సినిమాల విడుదల సమయంలో ఇలాంటి మార్పులు వద్దని కోరారని, రెండు నెలల్లో చర్చిద్దామన్నా స్పందన లేదని ఆయన ఆవేదన వ్యక్తం చేశారు. ఇప్పుడు చర్చను పక్కదారి పట్టిస్తూ కొందరు 'పెద్ది' (Peddi) సినిమా ప్రస్తావన తీసుకువస్తున్నారని, కానీ ఈ చిత్రంతో తమకు ఎలాంటి సంబంధం లేదని స్పష్టం చేశారు. నిర్మాతలు చర్చలకు ఎప్పుడు పిలిచినా తాము సిద్ధంగా ఉన్నామని, కొందరు నిర్మాతలు వ్యక్తిగతంగా మాట్లాడుతున్నారని ఆయన పేర్కొన్నారు.

ఈ వివాదంపై తుది నిర్ణయం తీసుకునేందుకు రేపు (మే 15, శుక్రవారం) ఫిల్మ్ ఛాంబర్‌లో ఒక కీలక సమావేశం జరగనుంది. ఈ సమావేశంలో ఎగ్జిబిటర్ల డిమాండ్లపై ఒక స్పష్టత వచ్చే అవకాశం ఉంది.

థియేటర్ల యాజమాన్యాలు మరియు నిర్మాతల మధ్య నెలకొన్న ఈ ప్రతిష్టంభన ఇండస్ట్రీపై ప్రభావం చూపే అవకాశం ఉంది. ముఖ్యంగా మే 15న జరిగే సమావేశంలో ఎలాంటి నిర్ణయం తీసుకుంటారోనన్న ఉత్కంఠ సర్వత్రా నెలకొంది. ఇరు వర్గాలు సామరస్యంగా చర్చించుకుని ఇండస్ట్రీ మనుగడకు మేలు చేసే పరిష్కారాన్ని కనుగొంటారని సినీ ప్రేమికులు ఆశిస్తున్నారు.