`7/జి బృందావ‌న‌కాలనీ`, `ఆడ‌వారి మాట‌ల‌కు అర్థాలే వేరులే`, `యుగానికి ఒక్క‌డు` చిత్రాల‌తో తెలుగునాట ద‌ర్శ‌కుడిగా ప్ర‌త్యేక గుర్తింపు పొందాడు సెల్వ‌రాఘ‌వ‌న్. త‌మిళ‌నాట స్టార్ డైరెక్ట‌ర్ గా వెలుగొందిన రాఘ‌వ‌న్..  ప్ర‌స్తుతం కేర‌ళ‌కుట్టి కీర్తి సురేశ్ తో క‌లిసి `సాని కాయిదం` అనే త‌మిళ చిత్రంలో డీ-గ్లామ‌ర్డ్ రోల్ లో న‌టిస్తున్నాడు. క‌ట్ చేస్తే.. ఆ సినిమా విడుద‌ల‌య్యేలోపే ఓ భారీ బ‌డ్జెట్ మూవీలో విల‌న్ గా న‌టించే అవ‌కాశాన్ని అందుకున్నాడ‌ట ఈ స్టార్ కెప్టెన్.

ఆ వివ‌రాల్లోకి వెళితే.. కోలీవుడ్ స్టార్ విజ‌య్ క‌థానాయ‌కుడిగా నెల్స‌న్ దిలీప్ కుమార్ ద‌ర్శ‌క‌త్వంలో ఓ సినిమా రాబోతున్న సంగ‌తి తెలిసిందే. `బుట్ట‌బొమ్మ‌` పూజా హెగ్డే క‌థానాయిక‌గా న‌టిస్తున్న ఈ క్రేజీ ప్రాజెక్ట్ ని స‌న్ పిక్చ‌ర్స్ సంస్థ నిర్మిస్తోంది. కాగా, ఈ చిత్రంలో ప్ర‌తినాయ‌కుడిగా సెల్వ రాఘ‌వ‌న్ ని న‌టింప‌జేసే ప్ర‌య‌త్నాలు చేస్తున్న‌ట్లు స‌మాచారం. త్వ‌ర‌లోనే `విజ‌య్ 65`లో సెల్వ రాఘ‌వ‌న్ ఎంట్రీపై క్లారిటీ వ‌చ్చే అవ‌కాశ‌ముంది.

కాగా,  త‌న త‌మ్ముడు ధ‌నుష్ హీరోగా సెల్వ‌రాఘ‌వ‌న్ రెండు చిత్రాల‌ను రూపొందించ‌నున్నాడు. వాటిలో `ఆయిర‌త్తిల్ ఒరువ‌న్` (యుగానికి ఒక్కడు) సీక్వెల్ కూడా ఉంది.  మ‌రి.. రాబోయే చిత్రాల‌తో న‌టుడిగా, ద‌ర్శ‌కుడిగా సెల్వ‌రాఘ‌వ‌న్ ఎలాంటి ఫ‌లితాల‌ను అందుకుంటారో చూడాలి.