టాలెంటెడ్ యాక్ట‌ర్ స‌త్య‌దేవ్ టైటిల్ రోల్ చేయ‌గా 'కేరాఫ్ కంచ‌ర‌పాలెం' ఫేమ్ వెంక‌టేశ్ మ‌హా డైరెక్ట్ చేసిన 'ఉమామ‌హేశ్వ‌ర ఉగ్ర‌రూప‌స్య' మూవీ ఈ రోజు ఓటీటీ (నెట్‌ఫ్లిక్స్‌)లో నేరుగా రిలీజ‌య్యింది. సింపుల్ బ‌ట్ బ్యూటిఫుల్ ఫ్లిక్‌గా అభిరుచి క‌లిగిన ప్రేక్ష‌కుల‌ను అల‌రిస్తోంది. వారిలో సినీ సెల‌బ్రిటీలు కూడా ఉన్నారు. విలేజ్ బ్యాక్‌డ్రాప్‌లో రూపొందిన ఈ సినిమాలో ఉమామ‌హేశ్వ‌ర‌రావు ఉగ్ర‌రూపాన్ని ఎందుకు దాల్చాడ‌నే పాయింట్‌పై డైరెక్ట‌ర్ అల్లిన క‌థ‌, ఆ క‌థ‌ను న‌డిపించిన విధానం ముచ్చ‌ట‌గా ఉంద‌ని చెప్పాలి. క‌మ‌ర్షియాలిటీకి లొంగిపోకుండా నేచుర‌ల్ ఇన్‌స్టింక్ట్స్ మీద ఆధార‌ప‌డే క్యారెక్ట‌ర్ల‌తో, నేచుర‌ల్ అనిపించే క్యారెక్ట‌రైజేష‌న్స్‌తో న‌డ‌వ‌డ‌మే ఈ సినిమాకి బ‌లం చేకూర్చింది.

"చాలా రోజుల తర్వాత ఒక మంచి సినిమా చూసిన ఫీలింగ్ కలిగింది. సత్య ఇరగదీసాడు. నరేష్ గారు , హీరోయిన్స్,  అందరూ సూప‌ర్బ్" అని డైరెక్ట‌ర్ పూరి జ‌గ‌న్నాథ్ ప్ర‌శంసిస్తే, ఇది బ్యూటిఫుల్ ఫిల్మ్ అనీ, థియేట‌ర్లు ఓపెన్ చేసిన‌ప్పుడు ఈ సినిమాని థియేట‌ర్ల‌లో ఓపెన్ చెయ్యాల‌నీ హీరో నాని కోరాడు. బిగ్ స్క్రీన్‌పై ఇందులోని క్లోజ‌ప్ స్లో మోష‌న్ న‌వ్వుల్ని చూడాల‌నుకుంటున్నాన‌ని అత‌ను ట్వీట్ చేశాడు.

'కేరాఫ్ కంచ‌ర్‌పాలెం' డైరెక్ట‌ర్ నుంచి మ‌రో విజువ‌ల్ పొయెట్రీని చూశాన‌ని సంగీత దిగ్గ‌జం ఎం.ఎం. కీర‌వాణి అన్నారు. సినిమాలో హృద‌యాన్ని స్పృశించే సంద‌ర్భాలు చాలా ఉన్నాయ‌నీ, మ్యూజిక్ ల‌వ్‌లీగా ఉంద‌నీ ఆయ‌న ప్ర‌శంసించారు. స‌త్య‌దేవ్ త‌న బ్రిలియంట్ ప‌ర్ఫార్మెన్స్‌తో అద‌ర‌గొడితే, హీరోయిన్ రూప త‌న పాత్ర‌ను బాగా చేసింద‌ని హీరో శ్రీ‌విష్ణు అన్నాడు.