అణు విద్యుత్ కేంద్రంలో మంటలు!

ఉక్రెయిన్‌‌లో యూరప్‌లోనే అతి పెద్దదైన జపోరిజియా అణు విద్యుత్ కేంద్రం వుంది. ఇందులో ఇప్పుడు మంటలు చెలరేగాయి. రష్యా ఆక్రమణ తర్వాత ఆ అణు విద్యుత్ కేంద్రం రష్యా అధీనంలో వుంది. ఈ ప్లాంట్‌లో రష్యన్ దళాలు పేలుళ్లు జరిపి మంటలు చెలరేగడానికి కారణమయ్యాయని ఉక్రెయిన్ అధ్యక్షుడు జెలెన్‌స్కీ ఆరోపిస్తున్నారు. రష్యా  మాత్రం ఉక్రెయిన్ సైనికులు ప్రయోగించిన ఫిరంగి గుళ్ళ కారణంగానే మంటలు వ్యాపించాయని అంటోంది. అణు విద్యుత్ కేంద్రంలో ప్రస్తుతం మంటలు మాత్రమే చెలరేగాయని, ఆ మంటలను చాలా శ్రమించిన మీదట ఆర్పేశామని సిబ్బంది చెబుతున్నారు. అణు లీకేజీ మాత్రం జరగలేదని, ఈ విషయంలో భయపడాల్సిన అవసరం లేదని వారు అంటున్నారు. 2022లో రష్యా సైనికులు ఉక్రెయిన్‌లోని ఈ అణు విద్యుత్ కేంద్రాన్ని తమ అదుపులోకి తీసుకున్నారు. అప్పటి నుంచి ఇక్కడ విద్యుత్ ఉత్పత్తి నిలిపేశారు. విద్యుత్ ఉత్పత్తి లేకపోయినప్పటికీ, సరైన నిర్వహణ లేకపోతే అణు లీకేజ్ జరిగే ప్రమాదం వుందని ఉక్రెయిన్ ఆరోపిస్తోంది.