అన్న ఆడ.. చెల్లెలు ఈడ.. ఏంటి ఈ నాటకాలు?

తెలంగాణలో పార్టీని ఏర్పాటు చేసిన ఏపీ ముఖ్యమంత్రి జగన్ సోదరి వైఎస్ షర్మిల త్వరలో పాదయాత్రకు సిద్ధమవుతున్నారు.  పార్టీ ఆవిర్బావ సభలో కేసీఆర్ ప్రభుత్వంతో పాటు కాంగ్రెస్ పై పలు విమర్శలు చేశారు షర్మిల. వైఎస్సార్ విషయంలో కాంగ్రెస్ మోసం చేసిందని ఆరోపించారు. ప్రజా సమస్యలపై మాట్లాడిన ఎక్కడా కేంద్రం పేరు మాత్రం ఎత్తలేదు. మోడీ సర్కార్ పై ఒక్క విమర్శ కూడా చేయలేదు. దీంతో షర్మిలపై తెలంణ కాంగ్రెస్ నేతలు ఫైరవుతున్నారు. 
 
షర్మిల పార్టీపై టీపీసీసీ వర్కింగ్ ప్రెసిడెంట్, ఎమ్మెల్యే  జగ్గారెడ్డి ఘాటు వ్యాఖ్యలు చేశారు. ఏపీ ముఖ్యమంత్రి జగన్ సోదరి షర్మిల తెలంగాణలో పార్టీ అంటూ కొత్త డ్రామాకు తెర లేపారని ఆయన ఆరోపించారు. షర్మిల తెలంగాణ కోడలే అయినా.. ఆమె రాయలసీమ రక్తమే కదా? అని జగ్గారెడ్డి ప్రశ్నించారు. ‘అన్న ఆడ.. చెల్లెలు ఈడ.. ఏంటి ఈ నాటకాలు’ అంటూ నిప్పులు చెరిగారు. అన్నా చెల్లెళ్లు ఇద్దరూ లోటస్ పాండ్‌లో అంతా కలిసే ఉంటారని, బయటకు మాత్రం తమ మధ్య విభేదాలు ఉన్నట్లు నటిస్తున్నారని దుయ్యబట్టారు. 

షర్మిల పార్టీ వెనుక బీజేపీ హస్తం ఉందని జగ్గారెడ్డి ఆరోపించారు. బీజేపీ ప్రోత్బలంతోనే వైఎస్ షర్మిల తెలంగాణలో రాజకీయ పార్టీని ఏర్పాటు చేసిందన్నారు. ఇప్పటికే జగన్ ఏ అంశంలోనూ బీజేపీ ప్రభుత్వంపై విమర్శలు చేయలేదని జగ్గారెడ్డి  గుర్తు చేశారు. అన్న బాటలోనే షర్మిల కూడా బీజేపీ జోలికి వెళ్లడం లేదన్నారు జగ్గారెడ్డి. వంద రూపాయలు దాటిన పెట్రోల్ రేట్లు, పెరిగిన గ్యాస్ ధరలు షర్మిలకు కనిపించడం లేదా అని మండి పడ్డారు జగ్గారెడ్డి. షర్మిల పార్టీకి తెలంగాణలో మనుడ లేదన్నారు. వారి ఆటలు ఇక్కడ సాగబోవని తేల్చి చెప్పారు. 

తెలంగాణ-ఆంధ్రప్రదేశ్ మధ్య నెలకొన్న జల వివాదంపైనా జగ్గారెడ్డి స్పందించారు.  కేసీఆర్, జగన్‌ లు రెండు రాష్ట్రాల మధ్య విద్వేషాలు రెచ్చగొడుతున్నారని ఆరోపించారు. జల వివాదంపై మంత్రులు ఇష్టానుసారంగా మాట్లాడుతున్నారంటూ మండిపడ్డారు. చిన్న ఇష్యూను పెద్దగా చేస్తున్నారని విమర్శించారు. తిరుమల శ్రీవారి దర్శనానికి తెలంగాణ ప్రజాప్రతినిధులు జారీ చేసే సిఫారసు లేఖలకు అనుమతి లేదని జీఈఓ చెప్పడంపై జగ్గారెడ్డి ఆగ్రహం వ్యక్తం చేశారు. తిరుమల వెంకటేశ్వర స్వామి అందరి వాడు అని, తెలంగాణ ప్రజాప్రతినిధుల సిఫారసు లేఖలను అనుమతి లేదని జీఈఓ చెప్పడం సరికాదన్నారు. దేవుడి దర్శనంలోనూ రాజకీయాలు చేయడం సరైంది కాదన్నారు. తెలంగాణ భక్తులు తిరుమలకు రావొద్దా? అని ప్రశ్నించారు జగ్గారెడ్డి.