ప్రకాష్రాజా..? అయితే తొక్కేయ్యండి!
on Jun 24, 2015
ఒకప్పుడు క్యారెక్టర్ ఆర్టిస్టు పాత్రల్లో మకుటం లేని మహారాజులా వెలిగిపోయాడు ప్రకాష్రాజ్. ఏ సినిమా చూసినా ప్రతినాయకుడు తనే. పెద్ద హీరోలంతా ప్రకాష్ రాజ్నే కావాలనే వారు. ఆఖరికి మంచి నాన్న పాత్రలకూ కేరాఫ్ అడ్రస్ గా నిలిచాడు. తన టాలెంట్తో ప్రేక్షకుల్ని ఆకట్టుకొంటూ.. సినిమాల్ని నిలబెడితే.. తన బిహేవియర్తో సెట్లో అసహనానికి గురి చేసేవాడు. ప్రకాష్ రాజ్ పారితోషికం ఎప్పుడూ ఆకాశపు అంచుల వరకూ ఉండేది. దర్శక నిర్మాతలు కూడా `ప్రకాష్రాజ్ డిమాండ్` చూసి తట్టుకొనేవారు. ఇప్పుడు ఆ పరిస్థితి మారింది. ప్రకాష్ రాజ్ కి ప్రత్యామ్నాయాలు పెరిగాయి.
జగపతిబాబు, రాజేంద్ర ప్రసాద్,రావు రమేష్ లాంటి వాళ్లు దిగబడ్డారు. మిర్చి ప్రభాకర్లాంటివాళ్లు అందుబాటులో ఉన్నారు. ప్రకాష్రాజ్ పారితోషికం రోజుకి ఐదారు లక్షలైతే... మిర్చి ప్రభాకర్ లక్షకే అందుబాటులో ఉన్నాడు. దానికి తోడు.. తెరపై కాస్త కొత్తదనం కనిపిస్తుంది. ప్రకాష్రాజ్ స్థానాన్ని భర్తీ చేసేవాళ్లు ఉండడంతో.. దర్శకులిప్పుడు రెచ్చిపోతున్నారు. బడా డైరెక్టర్లంతా ప్రకాష్రాజ్నిపక్కన పెట్టాలని డిసైడయినట్టు... విశ్వసనీయ వర్గాల సమాచారం. నిర్మాతలు కూడా అందుకు సరే అంటున్నారట. వీలైనంత వరకూ ప్రకాష్రాజ్ లేకుండానే సినిమా పూర్తిచేద్దాం మరీ తప్పదనుకొంటే అప్పుడు తీసుకొందాం అనుకొంటున్నారట.
గతంలో ప్రకాష్రాజ్ చేతిలో కాస్త దెబ్బతిన్నవాళ్లయితే... `కాస్త రెమ్యునరేషన్ ఎక్కువైనా జగపతిబాబుని తీసుకొందాం..` అంటున్నారట. దాంతో ప్రకాష్రాజ్ కెరీర్ గ్రాఫ్ ప్రస్తుతానికి అమాంతం పడిపోయినట్టు టాక్. ఇంకో ఇద్దరు ముగ్గురు నికార్సయిన క్యారెక్టర్ ఆర్టిస్టులు దిగబడితే.. ప్రకాష్రాజ్ పరిస్థితి ఏమైపోతుందో అనిపిస్తుంది. మొత్తానికి దర్శకులంతా కలసి ప్రకాష్రాజ్కి చెక్ పెట్టడం మొదలెట్టారు. మరి ఈ పద్మవ్యూహంలోంచి ఎలా బయటపడతాడో చూడాలి.