`బిల్లా`లో బిల్లా, రంగాగా.. `బాహుబ‌లి` సిరీస్ లో అమ‌రేంద్ర బాహుబ‌లి, మ‌హేంద్ర బాహుబ‌లిగా ద్విపాత్రాభిన‌యం చేసి అల‌రించారు యంగ్ రెబ‌ల్ స్టార్ ప్ర‌భాస్.  `బిల్లా`లో ఎలాంటి ర‌క్త సంబంధం లేని ఒకే కాలానికి చెందిన ఇద్ద‌రు యువ‌కులుగా క‌నిపించిన ప్ర‌భాస్.. `బాహుబ‌లి` సిరీస్ లో మాత్రం తండ్రీకొడుకులుగా డిఫ‌రెంట్ టైమ్ లైన్స్ లో యంగ్ లుక్ తోనే ద‌ర్శ‌న‌మిచ్చారు.

క‌ట్ చేస్తే.. మ‌రోసారి ప్ర‌భాస్ ఒకే చిత్రంలో రెండు విభిన్న పాత్ర‌ల్లో న‌టించ‌బోతున్నార‌ట‌. ఆ వివ‌రాల్లోకి వెళితే.. `కేజీఎఫ్` ఫేమ్ ప్ర‌శాంత్ నీల్ ద‌ర్శ‌క‌త్వంలో ప్ర‌భాస్ హీరోగా `స‌లార్` పేరుతో ఓ సినిమా రూపొందుతున్న విష‌యం విదిత‌మే. ఇందులో తండ్రీకొడుకులుగా కొన్ని సన్నివేశాల్లో సంద‌డి చేయ‌నున్నార‌ట ప్ర‌భాస్. ఇందులో భాగంగానే.. తండ్రి పాత్ర కోసం వ‌య‌సు పైబ‌డిన లుక్ లో స‌ర్ ప్రైజ్ ఇవ్వ‌బోతున్నార‌ట ఈ ఉప్ప‌ల‌పాటి వారి హ్యాండ్స‌మ్ హీరో. మ‌రి.. ఈ ప్ర‌చారంలో వాస్త‌వ‌మెంతో తెలియాలంటే కొన్నాళ్ళు వేచిచూడాల్సిందే. శ్రుతి హాస‌న్ హీరోయిన్ గా న‌టిస్తున్న ఈ యాక్ష‌న్ సాగా.. 2022 ఏప్రిల్ 14న ప్రేక్ష‌కుల ముందుకు రానుంది.

 దీనికంటే ముందు `రాధేశ్యామ్`తో ప‌ల‌క‌రించ‌బోతున్నారు ప్ర‌భాస్. పున‌ర్జ‌న్మ‌ల నేప‌థ్యంలో సాగే ఈ చిత్రంలోనూ ప్ర‌భాస్ డ‌బుల్ ధ‌మాకా ఇవ్వ‌నున్నార‌ని కొంత‌కాలం క్రితం క‌థ‌నాలు వ‌చ్చాయి.