టాలీవుడ్‌లో చివ‌ర‌గా నాగ‌శౌర్య జోడీగా 'అశ్వ‌థ్థామ‌'లో క‌నిపించిన పంజాబీ బ్యూటీ మెహ్రీన్ పిర్జాడా చేతిలో ఇప్పుడు సినిమాలేవీ లేవు. 'అశ్వ‌థ్థామ' విష‌యంలో కాంట్ర‌వ‌ర్సీ కూడా ఎదుర్కొన్న ఆమె నాలుగేళ్ల క్రితం నాని సినిమా 'కృష్ణ‌గాడి వీర ప్రేమ‌గాథ' సినిమాతో గ్రాండ్‌గా టాలీవుడ్‌లో ఎంట్రీ ఇచ్చింది. 'ఎఫ్‌2' సినిమా ఆమెలోని కామిక్ టైమింగ్‌ను కూడా మ‌నకు తెలియ‌జేసింది. అయితే ఆ త‌ర్వాత ఆమెకు బిగ్ మూవీస్‌లో ఆఫ‌ర్లు క‌రువ‌య్యాయి.

ఆ విష‌యం అలా ఉంచితే మెహ్రీన్ తాజాగా వార్త‌ల్లో నిలిచింది.. కార‌ణం.. ఒక మ్యూజిక్ వీడియో. టి సిరీస్ రిలీజ్ చేసిన 'జ‌రా ఠెహ‌రో' అనే మ్యూజిక్ వీడియో ఇప్పుడు దేశ‌వ్యాప్తంగా సంగీత ప్రియుల నాలుక‌ల‌పై న‌ర్తిస్తోంది. మూడు వారాల క్రితం విడుద‌ల చేసిన ఆ సాంగ్ ఇప్ప‌టికే 25 మిలియ‌న్ వ్యూస్ క్రాస్ చేసేసింది. ఆ వీడియోలో సింగ‌ర్ అర్మాన్ మాలిక్‌తో పాటు న‌టించింది మెహ్రీన్‌. అందులో ఆమెను చాలా బ్యూటిఫుల్‌గా ప్రెజెంట్ చేశారు. ముగ్ధ‌మోహ‌నంగా క‌నిపించిన ఆమెను చూసి, అప్ప‌టిదాకా ఆమెవ‌రో తెలీని బాలీవుడ్ జ‌నాలు మెహ్రీన్ గురించి ఆరా తీస్తూ వ‌స్తున్నారు. 'జ‌రా ఠెహ‌రో జ‌రా బైఠో' అంటూ అర్మాన్ మాలిక్ ఆల‌పించిన ఆ పాట‌లో మెహ్రీన్‌కు సింగ‌ర్ తుల‌సీ కుమార్ వాయిస్ ఇచ్చింది.

అమాల్ మాలిక్ మ్యూజిక్ స‌మ‌కూర్చిన‌ ఆ పాట‌ను ర‌ష్మీ విరాగ్ రాశారు. ట్రిగ్గ‌ర్ హ్యాపీ, డాబూ మాలిక్ సంయుక్తంగా ఆ వీడియో సాంగ్‌ను డైరెక్ట్ చేశారు. సినిమాలు లేక‌పోయినా 'జ‌రా ఠెహ‌రో' సాంగ్‌తో లైమ్‌లైట్‌లోకి వ‌చ్చినందుకు, అందునా బాలీవుడ్ జ‌నాల దృష్టిలో ప‌డినందుకు సంతోషంగా ఉంది మెహ్రీన్‌.