బ్లాక్ బ‌స్ట‌ర్ మూవీ `ఉప్పెన‌`తో క‌థానాయిక‌గా తెరంగేట్రం చేసింది కృతి శెట్టి. మొద‌టి సినిమాతోనే ఓవ‌ర్ నైట్ స్టార్ అయిపోయిందీ మంగ‌ళూరు సుంద‌రి. ప్ర‌స్తుతం కృతి చేతిలో మూడు క్రేజీ ప్రాజెక్ట్స్ ఉన్నాయి. అందులో ఒక‌టి నేచుర‌ల్ స్టార్ నానికి జంట‌గా న‌టిస్తున్న `శ్యామ్ సింగ రాయ్` కాగా.. మ‌రొక‌టి సుధీర్ బాబుకి జోడీగా న‌టిస్తున్న `ఆ అమ్మాయి గురించి మీకు చెప్పాలి`. ఇంకొక‌టి ఎన‌ర్జిటిక్ స్టార్ రామ్ క‌థానాయ‌కుడిగా కోలీవుడ్ కెప్టెన్ లింగుస్వామి తెలుగు, త‌మిళ భాష‌ల్లో రూపొందించ‌నున్న పేరు నిర్ణ‌యించ‌ని ద్విభాషా చిత్రం. ఈ మూడు సినిమాల్లోనూ అభిన‌యానికి ఆస్కార‌మున్న పాత్ర‌ల్లోనే ద‌ర్శ‌న‌మివ్వ‌నుంది కృతి.

ఇదిలాఉంటే.. కృతి ఖాతాలో మ‌రో క్రేజీ టాలీవుడ్ ప్రాజెక్ట్ చేరింద‌ట‌. ఆ వివ‌రాల్లోకి వెళితే.. ప్ర‌ముఖ నిర్మాత డి. సురేశ్ బాబు రెండో త‌న‌యుడు అభిరామ్ ని క‌థానాయ‌కుడిగా ప‌రిచ‌యం చేస్తూ సంచ‌ల‌న ద‌ర్శ‌కుడు తేజ ఓ ప్రేమ‌క‌థా చిత్రాన్ని రూపొందించ‌నున్నారు. ఇందులో భాగంగా.. ఈ చిత్రంలో క‌థానాయిక పాత్ర కోసం కృతిని న‌టింప‌జేసే ప్ర‌య‌త్నాలు చేస్తున్నార‌ని టాక్. త్వ‌ర‌లోనే అభిరామ్ డెబ్యూ మూవీలో కృతి ఎంట్రీపై క్లారిటీ రానున్న‌ది.