యువ సామ్రాట్ నాగ‌చైత‌న్య ప‌లు మ‌ల్టిస్టార‌ర్స్ లో సంద‌డి చేశారు. వాటిలో `త‌డాఖా` ఒక‌టి. ఇందులో హాస్య క‌థానాయ‌కుడు సునీల్ తో క‌లిసి చైతూ అల‌రించారు. కోలీవుడ్ బ్లాక్ బ‌స్ట‌ర్ `వేట్టై` (ఆర్య, మాధ‌వ‌న్, అమ‌లా పాల్, స‌మీరా రెడ్డి ప్ర‌ధాన పాత్ర‌ధారులు) ఆధారంగా రూపొందిన ఈ చిత్రంలో అన్న‌ద‌మ్ముల పాత్ర‌ల్లో ఆక‌ట్టుకున్నారు సునీల్, చైతూ.  `100% ల‌వ్` వంటి మ్యూజిక‌ల్ బ్లాక్ బ‌స్ట‌ర్ త‌రువాత చైతూకి జంట‌గా త‌మ‌న్నా న‌టించిన ఈ సినిమాలో సునీల్ కి జోడీగా ఆండ్రియా క‌నిపించింది. కిశోర్ పార్థ‌సాని (డాలీ) ద‌ర్శ‌క‌త్వం వ‌హించిన ఈ చిత్రంలో అశుతోష్ రాణా, నాగ‌బాబు, బ్ర‌హ్మానందం, వెన్నెల కిశోర్, ర‌ఘుబాబు, ర‌మా ప్ర‌భ‌, జ‌య‌ప్ర‌కాశ్ రెడ్డి, శ్రీ‌నివాస రెడ్డి ఇత‌ర ముఖ్య పాత్ర‌ల్లో ద‌ర్శ‌న‌మిచ్చారు.

యువ సంగీత సంచ‌ల‌నం త‌మ‌న్ పాట‌లు, నేప‌థ్య సంగీతం ఈ చిత్రానికి ప్ర‌త్యేక ఆక‌ర్ష‌ణ‌గా నిలిచాయి. పాట‌ల్లో చైతూ, త‌మ‌న్నాపై చిత్రీక‌రించిన బీచ్ సాంగ్ `మారా ఓ మారా` కుర్ర‌కారుని ఫిదా చేసింది. ఈ చిత్రానికిగానూ  `ఉత్త‌మ స‌హాయ న‌టుడు`గా సునీల్ `ఫిల్మ్ ఫేర్` అవార్డ్ అందుకున్నారు.  శ్రీ సాయి గ‌ణేశ్ ప్రొడ‌క్ష‌న్స్ ప‌తాకంపై బెల్లంకొండ సురేశ్ నిర్మించిన `త‌డాఖా` 2013 మే 10న విడుద‌లై విజ‌యం సాధించింది. నేటితో ఈ  యాక్ష‌న్ డ్రామా 8 వ‌సంతాల‌ను పూర్తిచేసుకుంది.