ఈరోజు బ‌ర్త్‌డే సెల‌బ్రేట్ చేసుకుంటున్నాడు సుధీర్‌బాబు. ఈ సంద‌ర్భంగా అత‌ను హీరోగా న‌టిస్తోన్న లేటెస్ట్ ఫిల్మ్ 'శ్రీ‌దేవి సోడా సెంట‌ర్' ఫ‌స్ట్ గ్లిమ్స్‌ను రిలీజ్ చేశారు. ఒక స‌ముద్ర తీర ప్రాంతంలోని గ్రామం నేప‌థ్యంలో క‌థ న‌డిచే ర‌స్టిక్ యాక్ష‌న్ థ్రిల్ల‌ర్‌గా ఈ సినిమా రూపొందుతున్న‌ట్లు ఆ టీజ‌ర్‌ను బ‌ట్టి అర్థ‌మ‌వుతోంది. స‌ముద్రంపై వెళ్తున్న బోట్ల‌తో తీసిన షాట్లు సూప‌ర్బ్ అనిపిస్తున్నాయి. షాంద‌త్ సైనుద్దీన్ సినిమాటోగ్ర‌ఫీ ఎంత అద్భుతంగా ఉందో, మ‌ణిశ‌ర్మ బ్యాగ్రౌండ్ స్కోర్ అంత రేసీగా, టాప్ నాచ్‌గా అనిపిస్తోంది.

ఈ టీజ‌ర్‌లో బ‌ర్త్‌డే బాయ్ సుధీర్ చాలా హుషారుగా క‌నిపిస్తున్నాడు. కండ‌లు తిరిగిన బాడీని ప్ర‌ద‌ర్శిస్తూ ఆక‌ట్టుకుంటున్నాడు. సినిమాలో అత‌ని క్యారెక్ట‌ర్ పేరు లైటింగ్ సూరిబాబు. ఇంత‌దాకా చేసిన పాత్ర‌లు ఒకెత్తు, ఈ సూరిబాబు పాత్ర ఒకెత్తు అనేలా ఉంటుంద‌ని చెప్ప‌డానికి ఈ చిన్న టీజ‌ర్ చాలు అనేట్లు ఉన్నాడు సుధీర్‌బాబు.

ఇంత‌కీ అత‌న్ని ఇలా ప్రెజెంట్ చేస్తున్న డైరెక్ట‌ర్ ఎవ‌రో తెలుసా?  'ప‌లాస 1978' మూవీతో ప్రేక్ష‌కుల్ని ఆక‌ట్టుకోవ‌డ‌మే కాకుండా ఇండ‌స్ట్రీలోని ప్ర‌ముఖుల చేత కూడా ప్ర‌శంస‌లు పొందిన క‌రుణ కుమార్‌. రైట‌ర్‌గా సాహితీ లోకానికి తెలిసిన క‌రుణ కుమార్ ఇప్పుడు త‌న టాలెంట్‌ను వెండితెర‌పై ప్ర‌ద‌ర్శిస్తున్నాడ‌నేందుకు 'ప‌లాస 1978' ఓ నిద‌ర్శ‌న‌మైతే, ఇప్పుడు 'శ్రీ‌దేవి సోడా సెంట‌ర్' మ‌రో నిద‌ర్శ‌నంగా నిల‌వ‌బోతోంది.

70ఎంఎం ఎంట‌ర్‌టైన్‌మెంట్స్ బ్యాన‌ర్‌పై విజ‌య్ చిల్లా, శ‌శి దేవిరెడ్డి సంయుక్తంగా నిర్మిస్తోన్న ఈ మూవీకి నేష‌న‌ల్ అవార్డ్ విన్న‌ర్ అక్కినేని శ్రీ‌క‌ర‌ప్ర‌సాద్ ఎడిటింగ్ బాధ్య‌త‌లు నిర్వ‌ర్తిస్తున్నాడు. ఈ సినిమా తెలుగు రాష్ట్రాల పంపిణీ హ‌క్కుల్ని బిడ్జ్ ఫిలిమ్స్ ద‌క్కించుకుంది.