టాలీవుడ్ లో మోస్ట్ అండర్ రేటెడ్ డైరెక్టర్ అంటే మొదటగా గుర్తొచ్చే పేరు 'చంద్రశేఖర్ యేలేటి'. 2003 లో విడుదలైన 'ఐతే' సినిమాతో దర్శకుడిగా పరిచయమైన 'యేలేటి' ఇప్పటివరకు తీసింది ఏడు సినిమాలే గానీ డైరెక్టర్ గా తనకంటూ ప్రత్యేక ముద్ర వేసుకున్నారు. విభిన్న చిత్రాలతో అభిమానులని సైతం సంపాదించుకున్నారు. ఈ ఏడాది నితిన్ తో తెరకెక్కించిన 'చెక్' సినిమా కాస్త నిరాశపరచినప్పటికి దర్శకుడిగా మాత్రం ఆయనకు మంచి పేరే వచ్చింది. కాగా ప్రస్తుతం ప్రభాస్‌ ను దృష్ఠిలో పెట్టుకొని యేలేటి ఒక కథ సిద్దం చేస్తున్నారట. కథ గనక ప్రభాస్‌ కు నచ్చి గ్రీన్ సిగ్నల్ ఇస్తే ప్రస్తుతం ప్రభాస్ కమిటయిన సినిమాల తర్వాత యేలేటి ప్రాజెక్ట్ ఉండబోతున్నట్టు తెలుస్తోంది.

బాహుబలి తరువాత హీరోగా ప్రభాస్ రేంజ్ అమాంతం పెరిగిపోయింది. ఆయన వరుసగా భారీ బడ్జెట్ తో పాన్ ఇండియన్ మూవీస్ చేస్తున్నారు. రాధేశ్యామ్, ఆదిపురుష్, సలార్, నాగ్ అశ్విన్ ప్రాజెక్ట్ ఇలా వరుసగా భారీ సినిమాల్లో నటిస్తున్నారు. దీంతో యేలేటి కూడా ప్రస్తుతం ప్రభాస్ స్టార్ డమ్ ని దృష్ఠిలో పెట్టుకొని పాన్ ఇండియన్ లెవల్‌ లో కథ సిద్దం చేస్తున్నారట. చిన్న సినిమాలతో విభిన్న దర్శకుడిగా పేరు తెచ్చుకున్న యేలేటి ఇప్పుడు ప్రభాస్ కోసం ఎంత విభిన్న కథ సిద్ధం చేస్తున్నారా అన్న ఆసక్తి నెలకొంది.