ఇంట‌ర్నేష‌న‌ల్ ఇండియ‌న్ టొరంటో ఫిల్మ్ ఫెస్టివ‌ల్‌లో ప్రదర్శనకు  'జెర్సీ' మూవీ ఎంపికైంది. నేచుర‌ల్ స్టార్ నాని ప్ర‌ధాన పాత్ర పోషించిన ఈ చిత్రంలో ఆయ‌న భార్య‌గా శ్ర‌ద్ధా శ్రీనాథ్ న‌టించింది. సితార ఎంట‌ర్‌టైన్‌మెంట్స్ బ్యాన‌ర్‌పై గౌత‌మ్ తిన్న‌నూరి ద‌ర్శ‌క‌త్వంలో సూర్య‌దేవ‌ర నాగ‌వంశీ నిర్మించిన 'జెర్సీ' తెలుగునాట ఘన విజయం సాధించటమే కాక, పలువురి ప్రశంసలు అందుకుంది. సంగీత దర్శకుడు అనిరుధ్ ర‌విచంద‌ర్‌ 'జెర్సీ' చిత్రానికి తన సంగీతంతో ప్రాణం పోశారు. సాను జాన్ వర్గీస్ సినిమాటోగ్ర‌ఫీ ఈ చిత్రానికి మరో ఆకర్షణగా నిలిచింది.

పరాజితుడైన ఓ క్రికెటర్ కొన్నేళ్ల త‌ర్వాత‌ తన ఆటను మెరుగు పరచుకొని ఏ విధంగా గెలుపు సాధించాడనే అంశంతో, జీవితంలో అతను ఓడి గెలిచిన తీరును హృద్యంగా 'జెర్సీ' చిత్రం చూపించింది. అంతర్జాతీయ టొరంటో చలన చిత్రోత్సవంలో ప్రదర్శనకు 'జెర్సీ' ఎంపికవటం, ఈ ఏడాది ఆగస్టు 9 నుంచి, 15 వరకు జరిగే ఈ చిత్రోత్సవంలో ఈ చిత్రం ప్రదర్శనకు నోచుకోవటం, ఈ విషయాన్ని మీడియాతో పంచుకోవటం తమ కెంతో సంతోషాన్ని కలిగిస్తోందని అన్నారు నిర్మాత సూర్య‌దేవ‌ర నాగ‌వంశీ. స్వాతంత్య్ర దినోత్సవ శుభ సమయంలో కెనడాలో ఈ వేడుక జరుగనుంది. గౌతమ్ తిన్ననూరి దర్శకత్వంలోనే ప్రముఖ బాలీవుడ్ హీరో షాహిద్ కపూర్ తో ఈ 'జెర్సీ' చిత్రం బాలీవుడ్‌లో రూపొందుతోంది.