మూడో అవతారం ప్రేమసాయి!

అనంతపురం: తన మొదటి అవతారం షిర్డీ సాయిబాబాగా పేర్కొన్న బాబా.. రెండో అవతారం సత్యసాయిబాబా అని చెప్పారు. ఈ అవతారం పరిసమాప్తమైన ఏడాదికి కర్ణాటకలోని మాండ్యా జిల్లా గునపర్తిలో మూడో అవతారం ప్రేమసాయిగా తిరిగి అవతరిస్తారని భక్తులు అచంచలమైన విశ్వాసంతో చెప్తున్నారు. బాబా 1960లోనే ‘ప్రేమ సాయి’ రూపాన్ని కూడా భక్తులకు పరిచయం చేశారని స్పష్టం చేస్తున్నారు. బాబా భక్తులకు ఎన్నో చిత్ర, విచిత్రాలు గోచరించాయి. సాయి నామస్మరణలో ఉన్న భక్తులకు ప్రకృతిలో కూడా ఎన్నో విశేషాలు దర్శనమిచ్చాయి. నిండు చంద్రుడిలో సత్యసాయి ఆకారం దర్శనమివ్వటం ప్రపంచ దేశాల్లో గొప్ప సంచలనం సృష్టించగా.. ఆధ్యాత్మిక ప్రపంచంలో ఒక వింతగా మిగిలిపోయింది. 2007 అక్టోబరు 4న సత్యసాయిబాబా ఆకారం చంద్రుడిలో కనిపించిందని ప్రపంచ వ్యాప్తంగా విస్తృతమైన చర్చ జరిగింది.