చిన్న పిల్లలలో ఎక్కువగా వచ్చే ఆరోగ్య సమస్యలు ఇవే..!

చిన్నతనంలో పిల్లల రోగనిరోధక వ్యవస్థ పూర్తిగా బలపడదు. ఈ కారణం  వల్ల పిల్లలు రకరకాల ఆరోగ్య సమస్యలకు గురవుతుంటారు. పిల్లలలో ఏ కొద్దిపాటి అనారోగ్యం కనిపించినా తల్లిదండ్రులు కలవరపడటం సహజం. అయితే సరైన సమయంలో లక్షణాలను గుర్తించడం, నివారణా మార్గాలు పాటించడం ద్వారా పిల్లలను ఎన్నో వ్యాధుల నుంచి కాపాడుకోవచ్చు. చిన్న తనంలో పిల్లలలో ఎక్కువగా కనిపించే ముఖ్యమైన ఆరోగ్య సమస్యలు  కొన్ని ఉన్నాయి.   ఆ సమస్యలు ఏమిటి?  వాటి కారణాలు, ఉపశమన మార్గాలు , నివారణా చర్యలను  వివరంగా తెలుసుకుంటే..

​పిల్లల్లో ఎక్కువగా కనిపించే ఆరోగ్య సమస్యలు..

​జలుబు , శ్వాసకోశ సమస్యలు..

 చిన్నారులలో చాలా సాధారణంగా కనిపించే సమస్య జలుబు , దగ్గు. సంవత్సరానికి సగటున పిల్లలకు 5 నుండి 8 సార్లు జలుబు చేసే అవకాశం ఉందని వైద్యులు చెబుతున్నారు. వైరల్ ఇన్ఫెక్షన్ల వల్ల ఇది వస్తుంది. ముక్కు కారడం, తుమ్ములు, మైల్డ్ ఫీవర్, గొంతు నొప్పి వంటివి దీని ప్రధాన లక్షణాలు. చాలావరకు జలుబు సమస్యలు 7 నుండి 10 రోజుల్లో అవే తగ్గుతాయి.

​చెవి ఇన్ఫెక్షన్లు..

ముఖ్యంగా ఐదేళ్ల లోపు పిల్లల్లో చెవి ఇన్ఫెక్షన్లు ఎక్కువ. ముక్కు , గొంతును చెవితో కలిపే యూస్టాచియన్ ట్యూబ్ చిన్న పిల్లల్లో చిన్నదిగా ఉండటమే దీనికి కారణం. జలుబు చేసినప్పుడు ఆ ఇన్ఫెక్షన్ చెవికి పాకుతుంది. చెవిని లాక్కోవడం, ఏడవడం, నిద్రపోవడంలో ఇబ్బంది , జ్వరం రావడం దీని లక్షణాలు.

​కడుపు ఇన్ఫెక్షన్లు , డయేరియా..

 కలుషితమైన ఆహారం, నీరు లేదా చేతులు శుభ్రంగా లేకపోవడం వల్ల చేతుల ద్వారా క్రిములు కడుపులోకి వెళ్లడం వల్ల గ్యాస్ట్రోఎంటెరిటిస్ వ్యాపిస్తుంది. దీనివల్ల వాంతులు, విరేచనాలు, కడుపునొప్పి వస్తాయి. ఈ సమయంలో పిల్లల శరీరంలో నీటి శాతం తగ్గి డీహైడ్రేషన్ బారిన పడే ప్రమాదం ఉంటుంది.

​జ్వరం..

జ్వరం అనేది స్వయంగా ఒక వ్యాధి కాదు, శరీరంలోకి ప్రవేశించిన క్రిములతో రోగనిరోధక వ్యవస్థ పోరాడుతోందనడానికి ఇది ఒక సంకేతం. వైరల్ ఇన్ఫెక్షన్లు, బాక్టీరియల్ ఇన్ఫెక్షన్ల వల్ల జ్వరం వస్తుంది. ఉష్ణోగ్రత పెరిగినప్పుడు పిల్లలు నీరసంగా మారిపోతారు.

చర్మ సమస్యలు , అలర్జీలు..

 పిల్లల చర్మం చాలా సున్నితంగా ఉంటుంది. ఎగ్జిమా, దద్దుర్లు, చెమట కాయలు, ఫంగల్ ఇన్ఫెక్షన్లు , డైపర్ రాషెస్ తరచుగా వస్తుంటాయి. అలాగే కొందరిలో కొన్ని ఆహార పదార్థాలు, ధూళి లేదా పెంపుడు జంతువుల వల్ల అలర్జీలు తలెత్తుతాయి.

​నులిపురుగుల సమస్య..

పిల్లలు మట్టిలో ఆడటం, అపరిశుభ్రమైన చేతులతో నోట్లో వేళ్లు పెట్టుకోవడం వల్ల కడుపులో నులిపురుగులు చేరుతాయి. ఆకలి మందగించడం, కడుపునొప్పి, రాత్రి వేళల్లో మలద్వారం వద్ద దురద వంటివి దీని ప్రధాన సంకేతాలు.

​పోషకాహార లోపం , ఉబకాయం..

 కొందరు పిల్లలు సరిగ్గా ఆహారం తీసుకోకపోవడం వల్ల విటమిన్లు, ఐరన్ వంటి లోపాలకు గురవుతారు. మరికొందరు జంక్ ఫుడ్, శారీరక శ్రమ లేకపోవడం వల్ల చిన్న వయసులోనే స్థూలకాయం బారిన పడుతున్నారు. ఇది పిల్లల ఎదుగుదలపై ప్రభావం చూపుతుంది.

​సమర్థవంతమైన నివారణ మార్గాలు..

​వ్యాధి నిరోధక టీకాలు..

 పిల్లలకు ప్రభుత్వం , వైద్యులు సూచించిన రోగనిరోధక టీకాలను సరైన సమయానికి వేయించడం చాలా ముఖ్యం. ఇది తీవ్రమైన పోలియో, ధనుర్వాతం, తరిమివేసే వ్యాధుల నుంచి రక్షణ ఇస్తుంది.

​చేతుల పరిశుభ్రత..

భోజనం చేయడానికి ముందు, బయట ఆడుకుని వచ్చాక, టాయిలెట్ వాడిన తర్వాత సోప్‌తో చేతులు శుభ్రంగా కడుక్కునే అలవాటును చిన్నతనం నుంచే నేర్పించాలి.

సమతుల్య ఆహారం..

 పిల్లల రోజువారీ ఆహారంలో పండ్లు, కూరగాయలు, పప్పుధాన్యాలు, పాలు , డ్రై ఫ్రూట్స్ ఉండేలా చూసుకోవాలి. ఇది వారిలో రోగనిరోధక శక్తిని పెంచుతుంది.

​నీరు..

 పిల్లలు తగినంత నీరు తాగేలా చూడాలి. ముఖ్యంగా డయేరియా లేదా వాంతులు అవుతున్నప్పుడు వోఆర్ఎస్ ద్రావణం ఇవ్వడం వల్ల డీహైడ్రేషన్ ప్రమాదాన్ని నివారించవచ్చు.

​పరిశుభ్రమైన పరిసరాలు..

 ఇల్లు , పిల్లలు ఆడుకునే పరిసరాలు శుభ్రంగా ఉండేలా చూసుకోవాలి. పాలు ఇచ్చే సీసాలు, ఆటవస్తువులను ఎప్పటికప్పుడు శుభ్రం చేయాలి.

​                   *రూపశ్రీ.