నటుడు భానుచందర్.. నిరీక్షణ, ముక్కుపుడక, కొంటె కోడలు సినిమాల్లో హీరోగా  నటించి క్రేజ్ ని సంపాదించుకున్నారు. అయితే నిరీక్షణ సినిమా భానుచందర్ లైఫ్ లో తనకి లైఫ్ టైం అచీవ్ మెంట్ అని తెలుగువన్ తో ఇచ్చిన ఇంటర్వ్యూలో పంచుకున్నారు. భానుచందర్ లైఫ్ లో సినిమాల ప్రభావం ఎలా ఉంది, తన వ్యక్తిగత జీవితం ఎలా ఉందని అన్నింటిని ఈ ఇంటర్వ్యూలో షేర్ చేసారు.

మా నాన్న సంగీత దర్శకుడు. ఆయనకు అనుకున్నంతగా గుర్తింపు రాలేదు. దాంతో నేను నటుడిని కావాలని మా అమ్మ కలలు కనేది. అలాగే ఒకరోజు మేం అపార్ట్మెంట్ లో రెంట్ కి ఉండేవాళ్ళం. మాది మూడవ ఫ్లోర్.. రెండవ ఫ్లోర్ లో ఒక ఫంక్షన్ జరిగితే దానికి ఎన్టీఆర్ గారు వచ్చారు. మా బిల్డింగ్ ముందు వరుసగా ఇరవై కార్లు వచ్చి ఆగాయి. అందులో నుండి ఎన్టీఆర్ గారు అతని కింద పని చేసే వాళ్ళు మిత్రులు అందరూ వచ్చారు. అయితే ఆయన వెళ్ళిపోయేప్పుడు.. మా అమ్మ పిలిచి.. మా ఇంటికి వస్తే బాగుంటుందని అనగా.‌. ఆయన ఉండమ్మా వస్తానని చెప్పి ఒక పావుగంట మాతో మాట్లాడారు. ఇల్లంతా చూసి.. నన్ను ఏం చేస్తున్నావని అడిగారు.. నేను మార్షల్ ఆర్ట్స్ చేస్తున్నానని చెప్పాను. ఆ తర్వాత ఆయన వెళ్లిపోయారు. కొన్ని రోజులకి ఒక సినిమాలో ఫైట్ సీన్ వస్తే నన్ను పిలిపించి ఆ సీన్ ని చేపించారు. ఎన్టీఆర్ గారు దేవుడు.. ఆ స్థాయిలో ఉండే వ్యక్తితో కలసి నటించడం నాకు తృప్తినిచ్చిందని భానుచందర్ చెప్పారు.

మీకు కెరీర్ పరంగా బెస్ట్ మూవీ ఏంటని ప్రశ్నించగా.. తెలుగులో 'నిరీక్షణ', తమిళంలో‌ బాలు మహేంద్ర గారితో చేసిన 'వీడు'.. నా సినీ జీవితంలో ఈ రెండు సినిమాలు ఒక అచీవ్ మెంట్ అని భానుచందర్ చెప్పారు. బాలు మహేంద్ర గారితో సినిమా అంటే ఒక డ్రీమ్.. అలాంటిది ఆయనతో కలిసి పనిచేశాను చాలు. నిరీక్షణ మూవీ గురించి చెప్పండని ప్రశ్నించగా.. బెంగుళూరులో ఒక జైలులో షూటింగ్.. పోలీస్ ఆఫీసర్ వచ్చి ఖైదీలను వరుసగా నిలబెట్టి ఇప్పండ్రా బట్టలు అంటే అందరూ వొంటి మీద డ్రాయర్ కూడా లేకుండా నిలబడతారు. అయితే బాలు మహేంద్ర గారు మలయాళంలో మమ్ముట్టితో చేస్తున్నప్పుడు ఆయన డ్రాయర్ తీయనన్నాడు అలాగే చేసాం మరి నువ్వేంటి అని నన్ను ఆయన అడిగారు. అప్పుడు నేను ఒకటే అన్నాను.. ఇక్కడ భానుచందర్ గా లేను ఒక క్యారెక్టర్ గా నిల్చున్నాను. మీకు డ్రాయర్ విప్పి నిల్చోవాలా అలాగే నిల్చుంటానని చెప్పి నిల్చున్నాను. ఆ తర్వాత సీన్ లో నాకు‌ గుండు కొడతారు. అదంతా కెమెరాలో చూస్తున్నారు. ఆ సీన్ అయిపోయింది.‌ కెమెరా రోల్ అవుతుంది. బాలు మహేంద్ర  గారు అలా పక్కకి వెళ్ళి కన్నీళ్ళు తుడుచుకుంటున్నారు. ఆయన దగ్గరకి నేను వెళ్ళి.. ఏంటి సర్ సీన్ బాగా రాలేదా? మళ్ళీ చేద్దామా? అని అడిగేసరికి.. అది కాదు.. సినిమా కోసం ఇంత కష్టపడుతున్నావ్. ఇలాంటి ఆర్టిస్ట్ లు మన ఇండస్ట్రీకి కావాలని చెప్పారు. అలాంటి వ్యక్తి పొగిడాడంటే అది చాలు నా లైఫ్ కి.. ఆస్కార్ కంటే కూడా ఎక్కువ అని భానుచందర్ చెప్పాడు. సింహాద్రి సినిమాలో మంచి రోల్ లో చేసిన భానుచందర్.. ఆ తర్వాత క్యారెక్టర్ ఆర్టిస్టుగా చేస్తున్నారు.