తెలుగులో ఎన్నిసార్లు చూసినా బోర్ కొట్టని సినిమాల లిస్ట్ లో వెంకటేష్ నటించిన 'నువ్వు నాకు నచ్చావ్', 'మల్లేశ్వరి' సినిమాలు ఖచ్చితంగా ఉంటాయి. ఈ రెండు సినిమాలకు త్రివిక్రమ్ రచయిత. ప్రేక్షకుల్లో వెంకీ-త్రివిక్రమ్ కాంబినేషన్ కి మంచి క్రేజ్ ఉంది. అయితే త్రివిక్రమ్ రచనలో క్రేజీ సినిమాలు చేసిన వెంకీ.. త్రివిక్రమ్ దర్శకత్వంలో మాత్రం ఇంతవరకు ఒక్క సినిమా కూడా చేయలేదు. ఈ కాంబినేషన్ కోసం ప్రేక్షకులు ఎంతగానో ఎదురు చూస్తున్నారు. ప్రతిసారి త్వరలో త్రివిక్రమ్ దర్శకత్వంలో వెంకీ సినిమా అంటూ వార్తలు రావడమే గానీ సినిమా మాత్రం రావడం లేదు. అయితే ఇప్పుడు మరోసారి ఈ క్రేజీ కాంబోలో మూవీ అంటూ ప్రచారం మొదలైంది. వెంకీ 75 వ సినిమా త్రివిక్రమ్ దర్శకత్వంలో రానుందని తెలుస్తోంది.

వెంకటేష్ ప్రస్తుతం నారప్ప, దృశ్యం-2, ఎఫ్-3 చిత్రాలతో బిజీగా ఉన్నారు. వాటి తరువాత వెంకీ నటించబోయే చిత్రం త్రివిక్రమ్ తోనేనంటూ వార్తలు చక్కర్లు కొడుతున్నాయి. తాజా సమాచారం ప్రకారం ఇటీవలే వెంకీ 75వ సినిమాకు సంబంధించి చర్చలు జరిగాయట. త్రివిక్రమ్ దర్శకత్వంలో నటించడానికి వెంకీ కూడా ఆసక్తిని కనబరుస్తున్నట్లు తెలుస్తోంది. కాగా, త్రివిక్రమ్ ఇటీవల మహేష్ బాబుతో ఒక చిత్రాన్ని ప్రకటించారు. ఈ చిత్రం తరువాత వెంకీ తో సినిమా చేస్తారని సమాచారం.