• ముంబై టు అమరావతి
• చంద్రబాబును కలిసిన మున్నాభాయ్
• ఏపీలో పెట్టుబడులు పెట్టేందుకు సంజయ్ దత్ ఆసక్తి

ఆంధ్రప్రదేశ్ సీఎం చంద్రబాబు(Chandrababu)తో బాలీవుడ్ స్టార్ సంజయ్ దత్(Sanjay Dutt) భేటీ అయ్యారు. ఏపీలో సినీ పరిశ్రమ అభివృద్ధికి సంబంధించి ఇద్దరి మధ్య చర్చ జరిగింది. ఫిలిం స్టూడియోల నిర్మాణం, మౌలిక సదుపాయాల కల్పనపై చర్చ జరిగినట్లు సమాచారం.

సంజయ్ దత్ మంగళవారం నాడు తన బృందంతో కలిసి వెలగపూడిలోని సచివాలయంలో సీఎం చంద్రబాబుని కలిశారు. గత కొంతకాలంగా ఏపీని గ్లోబల్ ఇన్వెస్ట్‌మెంట్ హబ్‌గా మార్చేందుకు ప్రభుత్వం చేస్తున్న ప్రయత్నాల్లో భాగంగా ఈ భేటీ జరగడం ఇప్పుడు రాజకీయ, సినీ వర్గాల్లో ఆసక్తిని రేకెత్తిస్తోంది.

ఏపీలో సినిమా హబ్.. సంజయ్ దత్ ఆసక్తి
ఈ సమావేశంలో ప్రధానంగా ఆంధ్రప్రదేశ్‌లో సినీ ఇండస్ట్రీ అభివృద్ధికి ఉన్న అవకాశాలపై చర్చలు జరిగాయి. అమరావతిలో అత్యాధునిక మౌలిక సదుపాయాలతో కూడిన ఫిల్మ్ సిటీ నిర్మాణం, అలాగే విశాఖపట్నం వంటి ప్రాంతాల్లో షూటింగ్‌లకు కావాల్సిన వసతుల కల్పనపై సీఎం చంద్రబాబు వివరించారు. రాష్ట్రంలో సినీ రంగానికి సంబంధించి భారీ పెట్టుబడులు పెట్టేందుకు, స్టూడియోలు నిర్మించేందుకు సంజయ్ దత్ టీమ్ ఆసక్తిని కనబరిచినట్లు సమాచారం. 

లోకేష్ విజన్‌కు కొనసాగింపుగా..
గత నెలలో ఏపీ ఐటీ శాఖ మంత్రి నారా లోకేష్ ముంబై పర్యటనలో భాగంగా సంజయ్ దత్‌తో భేటీ అయిన సంగతి తెలిసిందే. అప్పుడే ఏపీలో సింగిల్ విండో విధానంలో షూటింగ్‌లకు అనుమతులు ఇస్తామని, సినీ రంగానికి ప్రభుత్వం పూర్తి సహకారం అందిస్తుందని లోకేష్ హామీ ఇచ్చారు. ఆ చర్చల కొనసాగింపుగానే సంజయ్ దత్ ఇప్పుడు సీఎంని కలిసినట్లు తెలుస్తోంది.

సక్సెస్ మూడ్‌లో మున్నాభాయ్
ప్రస్తుతం సంజయ్ దత్ తన లేటెస్ట్ మూవీ 'ధురంధర్: ది రివెంజ్' (Dhurandhar: The Revenge) బాక్సాఫీస్ వద్ద సాధిస్తున్న భారీ విజయంతో ఫుల్ జోష్‌లో ఉన్నారు. ఈ సినిమా ఇప్పటికే ప్రపంచవ్యాప్తంగా రూ. 900 కోట్లకు పైగా వసూళ్లు సాధించి రికార్డులు సృష్టిస్తోంది. ఈ సక్సెస్ మూడ్‌లో ఉంటూనే, ఆయన తన టీమ్ సభ్యులు గౌరవ్ దూబే, కునాల్ పటేల్, అనుజ్ కుమార్‌లతో కలిసి అమరావతికి విచ్చేయడం గమనార్హం.

కొత్త ఆశలు.. కొత్త అడుగులు
రాష్ట్ర విభజన తర్వాత ఏపీలో ఒక భారీ ఫిల్మ్ సిటీ లేకపోవడం పెద్ద లోటుగా ఉంది. అయితే చంద్రబాబు ప్రభుత్వం అమరావతిలో అంతర్జాతీయ స్థాయి ఫిల్మ్ సిటీ నిర్మాణంతో పాటు, విశాఖ తీరంలో వరల్డ్ క్లాస్ స్టూడియోలను నిర్మించాలని ప్లాన్ చేస్తున్నట్లు సమాచారం. ఇందులో బాలీవుడ్ స్టార్స్ భాగమైతే.. ఇటు టాలీవుడ్‌తో పాటు అటు హిందీ చిత్ర పరిశ్రమకు కూడా ఏపీ ఒక ప్రధాన షూటింగ్ డెస్టినేషన్‌గా మారుతుంది. త్వరలోనే దీనిపై ఒక అధికారిక ప్రకటన వచ్చే అవకాశం ఉంది.