గ‌త కొంత‌కాలంగా ఒక‌దానితో ఒక‌టి పొంత‌న లేని పాత్ర‌ల్లో న‌టిస్తూ అల‌రిస్తున్నాడు నేచుర‌ల్ స్టార్ నాని. `దేవ‌దాసు`లో డాక్ట‌ర్ గా, `జెర్సీ`లో మిడిల్ ఏజ్డ్ క్రికెట‌ర్ గా, `గ్యాంగ్ లీడ‌ర్` లో క్రైమ్ న‌వ‌ల్ రైట‌ర్ గా.. ఇలా ఇదివ‌ర‌కు త‌ను పోషించ‌ని కొత్త త‌ర‌హా భూమిక‌ల్లో క‌నిపించి ఆక‌ట్టుకున్నాడు నాని. ఈ ప‌రంప‌ర‌లోనే.. రాబోయే చిత్రంలో మ‌రో ఆస‌క్తిక‌ర‌మైన వేషంలో క‌నిపించ‌నున్నాడ‌ట‌.

ఆ వివ‌రాల్లోకి వెళితే.. `టాక్సీవాలా` ఫేమ్ రాహుల్ సంకృత్యాన్ ద‌ర్శ‌కత్వంలో `శ్యామ్ సింగ రాయ్` పేరుతో నాని ఓ పిరియ‌డ్ డ్రామా చేస్తున్న సంగ‌తి తెలిసిందే. క‌ల‌కత్తా నేప‌థ్యంలో సాగే ఈ చిత్రంలో ఫ్లాష్ బ్యాక్ లో వ‌చ్చే ఎపిసోడ్స్ లో నాని డిటెక్టివ్ రోల్ లో ద‌ర్శ‌న‌మివ్వ‌నున్నాడ‌ట‌. కామెడీ, థ్రిల్లింగ్ ఎలిమింట్స్ తో ఈ `బెంగాలి బాబు` క్యారెక్ట‌ర్ సాగుతుంద‌ని స‌మాచారం. మ‌రి.. ఈ ప్ర‌చారంలో నిజానిజాలెంతో తెలియాలంటే కొన్నాళ్ళు వేచిచూడాల్సిందే.

`శ్యామ్ సింగ రాయ్`లో సాయిప‌ల్ల‌వి, కృతి శెట్టి, మ‌డోన్నా సెబాస్టియ‌న్ క‌థానాయిక‌లుగా న‌టిస్తున్నారు. నిహారిక ఎంట‌ర్టైన్మెంట్ సంస్థ నిర్మిస్తున్న ఈ క్రేజీ ప్రాజెక్ట్ కి మిక్కీ జే మేయ‌ర్ స్వ‌రాలు స‌మ‌కూర్చుతున్నారు.

కాగా, నాని తాజా చిత్రం `ట‌క్ జ‌గ‌దీష్` విడుద‌ల‌కు సిద్ధ‌మైంది. కోవిడ్ సెకండ్ వేవ్ ప‌రిస్థితులు చ‌క్క‌దిద్దుకున్నాక‌.. `ట‌క్ జ‌గ‌దీష్` థియేట‌ర్స్ లోకి వ‌స్తుంది. ఆ త‌రువాతే కొన్నాళ్ళ‌కి `శ్యామ్ సింగ రాయ్` రిలీజ్ కానుంది.