బాధిత కుటుంబాలకు ఆర్ధిక సాయం

• యునైటెడ్ తెలుగు ఫోరం ప్రకటన
  
• అభినందించిన భారత రాయబారి సతీష్ చంద్ర
  
• త్వరలో అధికారుల సమక్షంలో అందజేత
  

కువైట్ లో భారత రాయబారిని కలిసిన ఫోరం సభ్యులు

అంతర్వేది, న్యూస్ లైన్: ఇటీవల కువైట్ లో హత్యకు గురైన వారి కుటుంబాలకు యునైటెడ్ తెలుగు ఫోరం ఆర్థిక సాయం ప్రకటించింది. బుధవారం ఆ దేశంలో సమావేశమైన ఫోరం సభ్యులు హత్యకు గురైన బాధిత కుటుంబాలను ఆదుకోవాలని తీర్మానించినట్టు కన్వీనర్ కొల్లాబత్తుల వీర్రాజు ఈ మెయిల్ ద్వారా తెలిపారు.

అంతకుముందు ఫోరం సభ్యులు కువైట్ లో భారత రాయబారి సతీష్ చంద్ర మెహతాను కలిసి తెలుగు వారి సమస్యలను వివరించారన్నారు. ఈ సందర్భంగా ఫోరం సభ్యులను ఆయన అభినందించారన్నారు, ఇటీవల కువైట్ లో పిలిప్పెన్ దేశస్తురాలి చేతిలో హత్యకు గురైన సఖీనేటిపల్లి మండలం ఉయ్యూరివారిమెరకకు చెందిన గోడ కుమారికి, ఒంటెలు తొక్కి చనిపోయిన కడప వాసి కృష్ణమయ్య కుటుంబాలకు రు:1.25 లక్షల చొప్పున ఆర్ధిక సాయం ప్రకటించారు. ఇక రంజాన్ నెలలో కువైట్ కాల్పుల్లో మరచించిన వైఎస్సార్ జిల్లాకు చెందిన తోకల నరేష్ కుమార్, ఎన్. రాయణయ్య, ఎం. ఓబుల్ రెడ్డి, ఉత్తరప్రదేశ్ కు చెందినా పరశురాంకు రు: 1.5 లక్షల చొప్పున ఇవ్వనున్నారు. మొత్తం 8.5 లక్షలను ఆయా గ్రామాల్లోని తమ ప్రతినిధులకు అందజేశామన్నారు.

త్వరలో అధికారుల సమక్షంలో ఈ సాయం అందజేస్తామని వీర్రాజు తెలిపారు. ఈ కార్యక్రమంలో తెలుగు కళాసమితి. ప్రవాసాంధ్ర తెలుగుదేశం, అరబ్, టు ఏపీ, తెలుగు క్రెస్తవ సంఘాలు, తెలుగు ముస్లిం సంఘం, లలిత కళాసమితి, ఆదర్శ ఆంధ్రాయూత్, మహాత్మాగాంధీ సంక్షేమ సంఘం, కళాంజలి మయూరి గ్రూప్, ఆల్ బదియా గ్రూపు సంస్థల ప్రతినిధులు పాల్గొన్నారు.