Top Stories

బెంగాల్ లో దుబ్బాక స్కెచ్! పీకే ఆడియోతో పరేషాన్ 

సిద్దిపేట జిల్లా దుబ్బాక అసెంబ్లీకి ఉప ఎన్నిక గత నవంబర్ లో ఉప ఎన్నిక జరిగింది. టీఆర్ఎస్, బీజేపీ మధ్య  హోరాహోరీ పోరు నడిచింది. పోలింగ్ కు ముందు రోజూ వరకూ ఎవరికి ఎడ్జ్ ఎవరూ చెప్పలేని పరిస్థితి. అయితే పోలింగ్ రోజు ఉదయానికే సంచలన వార్త సోషల్ మీడియాలో హల్చల్ చేసింది. దుబ్బాకలో కాంగ్రెస్ నుంచి పోటీ చేస్తున్న అభ్యర్థి టీఆర్ఎస్ లో చేరారన్నది దాని సారాంశం. ఈ వార్త నియోజకవర్గంలో చర్చగా మారింది. పోలింగ్ పైనా ప్రభావం చూపింది. సీన్ కట్ చేస్తే దుబ్బాక ఉప ఎన్నికల బీజేపీ అభ్యర్థి వెయ్యికి పైగా ఓట్లతో విజయం సాధించారు.  దుబ్బాక ఉప ఎన్నిక లాంటి సీనే ప్రస్తుతం అసెంబ్లీ ఎన్నికలు జరుగుతున్న పశ్చిమ బెంగాల్ లో జరిగిందనే ఆరోపణలు వస్తున్నాయి.  పశ్చిమ బెంగాల్ అసెంబ్లీ ఎన్నికలు హోరాహోరీగా సాగుతున్నాయి. తృణామూల్ కాంగ్రెస్, బీజేపీ మధ్య ఘర్షణలతో ఉద్రిక్తతలు నెలకొంటున్నాయి. గతంలో ఎప్పుడు లేనంత ఆందోళనకర పరిస్థితులు బెంగాల్ లో కనిపిస్తున్నాయి. బెంగాల్‌లో మమత బెనర్జీ సారథ్యంలోని తృణమూల్ కాంగ్రెస్ హ్యాట్రిక్ కొడుతుందా  ? లేక బీజేపీ అధికారం చేజిక్కించుకుంటుందా ? అన్న అంశంపై ఉత్కంఠ నెలకొంది. కొద్దిపాటి మెజార్టీతో అయినా మమత మళ్లీ అధికారంలోకి వస్తారని కొన్ని సర్వేలు చెప్పినా.. బీజేపీ పుంజుకునే అవకాశం లేకపోలేదని వాదనలు బలంగా వినిపిస్తున్నాయి.  హోరాహోరీ పోరు సాగుతుందనే ప్రచారం జరుగుతున్న సమయంలోనే తృణమూల్ కాంగ్రెస్‌కు ఎన్నికల వ్యూహకర్తగా వ్యవహరిస్తున్న ప్రశాంత్ కిశోర్ మాట్లాడినట్టుగా చెబుతున్న ఓ ఆడియో లీకై కలకలం రేపుతోంది. అధికార తృణమూల్ కాంగ్రెస్‌ను టెన్షన్ పెడుతోంది. ప్రభుత్వ వ్యతిరేకత తీవ్రస్థాయిలో ఉందని, మమత బెనర్జీ ఓటమికి కారణం కావొచ్చని ఆడియోలో పీకే వెల్లడించినట్లుగా ఉందనే వార్త సోషల్ మీడియాలో హల్ చల్ చేస్తోంది. బెంగాల్ లో బీజేపీ గెలుస్తుందని ప్రశాంత్ కిశోర్ గా చెప్పినట్లుగా ఉన్న ఈ ఆడియోను పశ్చిమ బెంగాల్ బీజేపీ విడుదల చేసింది. బీజేపీ ప్రభుత్వాన్ని ఏర్పాటు చేస్తుందని  ప్రజలు భావిస్తున్నారని ప్రశాంత్ కిశోర్ భావిస్తున్నట్లు సమాచారం.  ప్రశాంత్ కిషోర్ మాట్లాడినట్లుగా ఉన్న ఆడియో బెంగాల్ ఎన్నికలపైనా ప్రభావం చూపుతుందని తెలుస్తోంది. అయితే ఈ ఆడియో టేప్ పై ప్రశాంత్ కిశోర్ స్పందించారు. తన ఆడియో కాదని ఖండించారు. ఆడియోలో కొంత భాగం కాదు..మొత్తం ఆడియో చాట్ ను బయటపెట్టాలని డిమాండ్ చేస్తున్నారు. బెంగాల్ లో బీజేపీ 100 స్థానాలకు మించి గెలవదని ప్రశాంత్ జోస్యం చెప్పారు.  
Publish Date:Apr 10, 2021

చిక్కడు దొరకడు.. వెంటాడు వేటాడు 

అది బీజాపూర్ అడవి. ఆ అడవిలో జవాన్లు టెంట్లు వేసుకుని పాహారా కాస్తున్నారు. ప్రశాంతంగా ఉన్న అడవిలో ఒక్క సారిగా తుపాకీ తూటాల చప్పుడు. భద్రత బలగాలపై మావోయిస్టులు త్రిశూల వ్యూహంతో మెరుపుదాడి చేశారు. తుపాకుల మోతల మధ్య అడవిని పొగ కమ్మేసింది. ఆ పొగ తేలిపోగానే 22 మంది జవాన్లు రక్తపు మడుగులో కనిపించారు. మిగిలిన జవాన్లు ఆ దాడి నుండి తేరుకుని చూసే సరికి  కోబ్రా కమాండో రాకేశ్వర్‌ సింగ్‌ మన్‌హా్‌స కనిపించలేదు. ఏమైపోయారు అని జవాన్లు ఆలోచనలో పడ్డారు అక్కడ శవాలుగా పడిపోయిన జవాన్లను చూశారు అందులో కూడా రాకేశ్వర్ సింగ్ కనిపించలేదు. జవాన్ల ప్రాణనష్టం ఎక్కువగా ఉందని గ్రహించిన మావోయిస్టులు.. సేఫ్‌ జోన్‌కు వెళ్లే ప్రయత్నాలు మొదలు పెట్టినట్లు తెలిసింది. అందుకు ఎవరో ఒక జవాన్‌ను బందీగా తమ వెంట తీసుకెళ్లడమే మంచిదని ‌భావించినట్లు సమాచారం. ఈ క్రమంలోనే.. కోబ్రా కమాండో రాకేశ్వర్‌ సింగ్‌ మన్‌హా్‌సను అపహరించారు. అంతా అనుకున్నట్లే జరిగిందని భావించి, ఆపరేషన్‌ను ముగిద్దామని నిర్ణయించినట్లు తెలిసింది.   కట్ చేస్తే .. ఆ గెరిల్లా దళ కమాండర్‌ మాడ్వీ హిడ్మా ఇప్పుడు సేఫ్‌జోన్‌లోకి వెళ్లిపోయాడా? ఆ తర్వాతే మావోయిస్టుల నుంచి బందీగా ఉన్న జవాను విడుదలపై చర్చల ప్రస్తావన మొదలైందా? ఈ ప్రశ్నలకు ఇంటెలిజెన్స్‌ వర్గాలు ఔననే సమాధానం చెబుతున్నాయి. మూడో తేదీ సాయంత్రానికే వారు సేఫ్‌ జోన్లకు పయనమై.. కొందరు మావోయిస్టులను వ్యూహాత్మకంగా టేకులగూడెం వద్ద రాకేశ్వర్‌తోపాటు ఉంచారు. గెరిల్లా దళానికి చెందిన మావోయిస్టులు 10 బృందాలుగా బీజాపూర్‌, దంతెవాడ, సుక్మా అడవుల్లోని సేఫ్‌ జోన్లకు వెళ్లారని ఇంటెలిజెన్స్‌ వర్గాలు భావిస్తున్నాయి. హిడ్మా ఇప్పుడు ప్రభుత్వాలు, భద్రతా బలగాలకు టార్గెట్‌గా మారడంతో.. అతనికి నాలుగంచెల భద్రతను కల్పిస్తూ.. సేఫ్‌ జోన్‌కు తీసుకెళ్లినట్లు సమాచారం. ఐదో తేదీకల్లా.. ఎక్కడివారక్కడ సేఫ్‌ అని నిర్ధారించుకున్నాక.. రాకేశ్వర్‌ సింగ్‌ తమ చెరలో ఉన్నాడని, మధ్యవర్తుల పేర్లు చెబితే వదిలేస్తామంటూ మావోయిస్టుల నుంచి లేఖ విడుదలైంది. అప్పటికీ పోలీసుల నుంచి కోబ్రా కమాండో కోసం గాలింపు చేపడుతున్నామని, కూంబింగ్‌ కొనసాగుతోందనే ప్రకటన రావడంతో.. వ్యూహాత్మకంగా రాకేశ్వర్‌ ఫొటోను విడుదల చేశారు. దీన్ని బట్టి.. ఆపరేషన్‌ జరిగాక కేవలం సేఫ్‌ జోన్‌లోకి వెళ్లడానికే జవాన్‌ను అపహరించినట్లు స్పష్టమవుతోంది. ఆ తర్వాత చర్చల్లో భాగంగా జైళ్లలో మగ్గుతున్న తమ వారు 150 మందిని విడుదల చేయాలని, ఆపరేషన్‌ ప్రహార్‌ను నిలిపివేయాలనే డిమాండ్లను ప్రభుత్వం ముందు పెట్టాలని మావోయిస్టులు నిర్ణయించినా.. బస్తర్‌ విలేకరుల ఒత్తిడితో రాకేశ్వర్‌ను గురువారం విడుదల చేశారు. ఇప్పుడు మావోయిస్టులపై ప్రతీకారానికి సీఆర్పీఎఫ్ సిద్దమవుతోంది. మోస్ట్ వాంటెడ్ హిడ్మా టార్గెట్ గా ప్రత్యేక కార్యాచరణ సిద్ధం చేస్తోంది. నక్సల్స్‌ కమాండర్‌ హిడ్మా చరిత్రలో కలిసిపోవడం ఖాయమని సీఆర్పీఎఫ్‌ డైరెక్టర్‌ జనరల్‌ కుల్దీప్‌సింగ్‌ అన్నారు. అందుకు సంబంధించిన కార్యాచరణ మొదలైనట్లు చెప్పారు. నక్సలైట్ల పరిధి.. అడవుల్లో 100 కిలోమీటర్ల నుంచి 20 కిలోమీటర్లకు కుచించుకుపోయిందని, ఇక తప్పించుకోవడం అసాధ్యమని ఆయన వ్యాఖ్యానించారు. ఏడాదిలోగా హిడ్మాతో పాటు ఆయన దళం  కథ ముగిస్తామన్నారు సీఆర్పీఎఫ్ డైరెక్టర్.  ఈ ఆపరేషన్‌ కోసం బీజాపూర్  ప్రాంతంలోకి దాదాపు 450 మంది జవాన్లు వెళ్లారని, 7 నుంచి 8 కిలోమీటర్ల పరిధిలో వారు మావోయిస్టులతో పోరాడినట్లు  కుల్దీప్‌ సింగ్  తెలిపారు.  నక్సలైట్ల దాడి నిరంతరంగా సాగిందని, జవాన్లు వారిని కాచుకుంటూనే తిరిగి ఎదురుకాల్పులు జరిపారని.. బలగాల వైపు గాయపడిన వారిని కూడా తమతో తీసుకువచ్చారని వివరించారు. అదనపు బలగాల కోసం కూడా సందేశం ఇచ్చారన్నారు. 22 మంది జవాన్లు ఆ దాడిలో అమరులవ్వడం బాధాకరమన్న కుల్దీప్‌.. వారి బలిదానాలు వృథా కాబోవన్నారు.  ఏడాదిలోగా హిడ్మా అంతు చూస్తామని హెచ్చరించారు.  భద్రతా బలగాలకు మోస్ట్ వాంటెడ్ గా మారిన సుక్మా జిల్లాకు చెందిన హిడ్మా వయసు 40 ఏళ్లు ఉంటుందని అంచనా. పీపుల్స్‌ లిబరేషన్‌ గెరిల్లా ఆర్మీ (పీఎల్‌జీఏ)కి కమాండర్‌గా వ్యవహరిస్తున్నాడు. 2013లో ఛత్తీస్‌గఢ్‌ కాంగ్రెస్‌ నేతలపై జరిగిన దాడిలో కూడా హిడ్మానే నిందితుడు.  
Publish Date:Apr 10, 2021

కేసీఆర్, జగన్.. మధ్యలో షర్మిల.. అంతా సెంటిమెంట్ గేమ్? 

ఖమ్మంలో  షర్మిల గర్జించారు. పంచ్ డైలాగులతో కేసీఆర్‌ సర్కారును కుమ్మేశారు. కేసీఆర్ సర్కారును, కల్వకుంట్ల కుటుంబాన్ని ఓ రేంజ్‌లో చెడుగుడు ఆడుకున్నారు షర్మిల. ప్రజల కోసమే తాను పార్టీ పెడుతున్నట్టు సభా వేదికగా ప్రకటించారు షర్మిల. తాను కేసీఆర్, జగన్‌లు వదిలిన బాణాన్ని కాదంటూ స్పష్టం చేశారు. కేసీఆర్‌ను ఈ స్థాయిలో కౌంటర్ చేసిన నేత ఈ మధ్య కాలంలో మరెవరూ లేరు. షర్మిల ఇంత ఘాటుగా నిలదీసినా.. అదికార పక్షం నుంచి పెద్దగా ప్రతివిమర్శలు రావడంలేదు. ఇలాంటి తాటాకు చప్పుళ్లకు బెదిరేది లేదన్నట్టు టీఆర్ఎస్ వర్గాలు షర్మిలను లైట్ తీసుకుంటున్నాయి. ఆమె మానాన ఆమెను వదిలేస్తున్నాయి. కేసీఆర్‌పై ఆమె చేసిన విమర్శలు చూస్తుంటే.. నిజంగా ఆమె గులాబీ బాస్‌పై దండెత్తడానికే వస్తున్నారని అనిపిస్తుంది. జగన్‌ను విభేదించే తెలంగాణలో పార్టీ పెడుతున్నట్టు కనిపిస్తోంది.  అయితే కేసీఆర్ గురించి బాగా తెలిసిన వారు మాత్రం ఇదంతా కేసీఆర్, జగన్‌లు కలిసి ఆడుతున్న నాటకమని అంటున్నారు. భవిష్యత్ రాజకీయ ప్రయోజనాల కోసమే ప్రస్తుతం షర్మిలతో పార్టీ పెట్టిస్తున్నారని చెబుతున్నారు. ఈ రెండేళ్లు షర్మిలను పొలిటికల్‌గా ప్రమోట్ చేసి.. ఎన్నికల సమయంలో ఆమెను బూచిగా చూపించి ఓట్లు దండుకోవాలనేది కేసీఆర్ వ్యూహం అని భావిస్తున్నారు. అందుకు, వాళ్లు చేసే విశ్లేషణలు ఆసక్తికరంగా ఉన్నాయి. ఎన్నికల నాటికి షర్మిల పార్టీ తెలంగాణలో కాస్త బలోపేతం అయ్యేలా గులాబీ పార్టీ సహకరిస్తుంది. ప్రస్తుతం టీఆర్ఎస్‌కు ఏకు మేకుగా మారుతున్న బీజేపీ నుంచి ప్రజల చూపు షర్మిల పార్టీ వైపు డైవర్ట్ చేస్తారు. కాంగ్రెస్‌కూ ప్రత్యామ్నాయంగా షర్మిల పార్టీని ముందుంచుతారు. తెలంగాణలో షర్మిల పార్టీ సెట్ అయ్యాక.. ఎన్నికల సమయంలో ఆ పార్టీ పుట్టి ముంచేస్తారు. షర్మిలకు ఓటేస్తే.. ఆ పార్టీ ఎమ్మెల్యేలు గెలిస్తే.. మళ్లీ తెలంగాణను ఆంధ్రాలో కలిపేస్తారంటూ కొత్త వివాదం తెరపైకి తీసుకొస్తారు కేసీఆర్. అక్కడ జగన్, ఇక్కడ షర్మిల.. ఇద్దరు అన్నాచెల్లెల్లు కలిసి రెండు రాష్ట్రాలను మునపటిలా ఏకం చేసి.. మళ్లీ సమైక్యాంధ్ర కోసం ప్రయత్నిస్తారంటూ సెంటిమెంట్ రాజేయడం కేసీఆర్ మైండ్‌గేమ్‌లా కనిపిస్తోందని అంటున్నారు. ఇదంతా అబూత కల్పనగా కొట్టిపారేయలేమని.. గత ఎన్నికల సమయంలో చంద్రబాబు విషయంలో కేసీఆర్ అదే పని చేశారని గుర్తు చేస్తున్నారు.  2018లో ప్రభుత్వాన్ని రద్దు చేసి ముందస్తు ఎన్నికలకు వెళ్లారు కేసీఆర్. గులాబీ బాస్‌కు కౌంటర్‌గా కాంగ్రెస్, టీడీపీలు ఏకమయ్యాయి. అటు రాహుల్ గాంధీ.. ఇటు చంద్రబాబు చేతులు కలిపారు. తెలంగాణ వ్యాప్తంగా విస్తృతంగా పర్యటిస్తూ ప్రచారం చేపట్టారు. ఇదే కేసీఆర్‌కు అనుకోని వరంగా మారింది. చంద్రబాబును ఆంధ్రా బూచీగా చూపిస్తూ.. మళ్లీ ఆంధ్రా వాళ్ల చేతిలో తెలంగాణను పెడతారా? అంటూ ప్రజలను రెచ్చగొట్టారు. ఓటర్లలో ప్రాంతీయ విధ్వేషం రగిలించారు. ప్రజలూ నమ్మారు. కేసీఆర్‌ను గెలిపించారు. సేమ్ టూ సేమ్.. ఇదే స్ట్రాటజీని ఈసారి షర్మిల పేరుతో కేసీఆర్ ప్లే చేస్తారని అంచనా వేస్తున్నారు. షర్మిలతో పార్టీ పెట్టించి.. బీజేపీ, కాంగ్రెస్‌ను సైడ్ చేసి.. ప్రజలను కొత్తపార్టీ వైపు మళ్లించి.. ఎన్నికల వేళ షర్మిలను దోషిగా చూపించి.. గంపగుత్తగా ఓట్లు కొల్లగొట్టడమే కేసీఆర్ వ్యూహం అంటున్నారు.  షర్మిలను గెలిపిస్తే.. జగన్‌తో కలిసి మళ్లీ తెలంగాణ, ఆంధ్రలను కలిపేస్తారని.. ఓటర్లలో సెంటిమెంట్ రాజేసి ఆ మేరకు ఎన్నికల్లో ప్రయోజనం పొందటమే కేసీఆర్ ఎత్తుగడ అని చెబుతున్నారు. షర్మిల స్వతహాగా పార్టీ పెట్టలేదని.. జగన్, కేసీఆర్‌లు కలిసే ఆమెతో పార్టీ పెట్టించారని.. ఇదంతా ఆ ఇద్దరు సీఎంలు ఆడుతున్న రాజకీయ డ్రామా అని ఆరోపిస్తున్నారు. ఏమో.. రాజకీయాల్లో ఏదైనా సాధ్యమే. కేసీఆర్, జగన్‌లు మాయల మరాఠీలే.
Publish Date:Apr 10, 2021

కుక్కలతో ఎన్నికల ప్రచారం..

అక్కడ పంచాయతీ ఎన్నికలు జరుగుతున్నాయి. పోటీలో ఉన్న అభ్యర్థులు పోటీ పడి ప్రచారాలు చేస్తున్నారు. ప్రచారం అంటే బహిరంగ సభలు. ఇంటింటి ప్రచారం.  వాహనాలపై ర్యాలీలు, పాదయాత్రలు, ఇవే ఎన్నికల ప్రధాన అస్రాలు. కానీ ఈ ప్రాంతంలో ఒక అభ్యర్థులు క్రేజీగా ప్రచారం చేస్తున్నారు. ఇంతకీ ఆ అభ్యర్థులు ఏం చేశారు. ఎలా ప్రచారం చేశారు అని అనుకుంటున్నారా..? అయితే మరెందుకు ఆలస్యం.. నెక్స్ట్ పేరాకి వెళ్ళండి.   అసలే కరోనా కాలం.. అందులోనూ పంచాయతీ ఎన్నికలు. ప్రచారానికి వచ్చిన వాళ్ళకి మంచి చెడ్డ చేయడం ఎందుకు అనుకున్నారేమో ఆ అభ్యర్థులు.. కొత్త ప్రచారానికి తెర లేపారు. అది ఇప్పుడు వైరల్ గా మారింది.  ఓపెన్ చేస్తే.. అక్కడి వీధుల్లో ఊర కుక్కలు ఎక్కువ. అందులోనూ ఖాళీగా ఉన్నాయి. ఆ విషయాన్నీ గమనింకేగిన మనుషులకంటే అదే నిశ్వాసంగా పనిచేస్తాయనుకున్నారేమో.. అందుకే ఆ అభ్యర్థులు వీధి కుక్కలతో ప్రచారం చేస్తున్నారు. భావించారు రాయ్ బరేలీ, బాలియా నియోజకవర్గాల అభ్యర్థులు.  కట్ చేస్తే.. ఆ అభ్యర్థులు కుక్కల నడుముకి ప్రచార పోస్టర్లు అంటించి. తమకే ఓటు వెయ్యాలని పోస్టర్లపై కోరారు. ఈ ప్రచారంపై తీవ్ర వ్యతిరేకత వ్యక్తమైంది. మీరు మనుషులేనా... మీకు బుద్ధుందా" అని వన్యప్రాణుల ప్రేమికులు ఫైర్ అయ్యారు. విమర్శలు వస్తున్నా... తాము చేసిన పనిని సమర్థించుకుంటున్నారు అభ్యర్థులు. ఏ గోడలపైనో అంటిస్తే... ఎవరూ చూడట్లేదట. అదే కుక్కలపై అంటిస్తే... అందరి దృష్టీ పడుతుందనీ... అలాగైనా తమ పోస్టర్లు చూస్తారని ఇలా చేసినట్లు గొప్పగా చెప్పుకుంటున్నారు.తాము ఏ కుక్కలకూ హాని చెయ్యట్లేదనీ... జస్ట్ పోస్టర్ అంటించి... కుక్కలకు తామే ఆహారం కూడా వేస్తున్నామని చెప్పుకుంటున్నారు. పైగా... ప్రజలు తమ ఐడియాను స్పాగతిస్తున్నారనీ... చెప్పుకుంటున్నారు.  ఈ విషయం తెలుసుకున్న జంతు హక్కుల పోరాట యోధురాలు రీనా మిశ్రా  కొత్త ప్రచారం పేరు చెప్పి... కుక్కలపై పోస్టర్లు అంటించడమేంటని ఆమె ఫైర్ అయ్యారు. ఎవరైనా సదరు అభ్యర్థి ముఖంపై పోస్టర్ అంటిస్తే... ఆ అభ్యర్థికి ఎలా ఉంటుంది అని ఆమె ప్రశ్నించారు. జంతువుల పై ప్రచారం చేయడంపై ఆ అభ్యర్థుల ఉద్దేశం ఏంటని.. ఆమె ప్రశ్నించారు.  జంతువులకూ కొన్ని రక్షణ చట్టాలు ఉన్నాయన్న ఆమె... వాటికి పోస్టర్లు అంటించడమంటే... హింసించడమే అన్నారు. దీనిపై పోలీసులు వెంటనే చర్యలు తీసుకొని... ఇలాంటి ప్రచారం చేసే అభ్యర్థులను అరెస్టు చెయ్యాలని డిమాండ్ చేశారు. ఇలా ఈ అంశం వివాదాస్పదంగా మారింది.  
Publish Date:Apr 10, 2021

బెంగాల్ పోలింగ్ లో హింస..  ఐదుగురి మృతి

పశ్చిమ బెంగాల్‌ అసెంబ్లీ ఎన్నికల నాలుగో విడత పోలింగ్‌ ఉద్రిక్తంగా మారింది. కూచ్‌బెహార్‌ జిల్లాలో తృణమూల్‌, బీజేపీ  కార్యకర్తల మధ్య ఘర్షణ కాల్పులకు దారితీసింది. ఈ ఘటనలో నలుగురు ప్రాణాలు కోల్పోయారు.  అంతకుముందు ఇదే ప్రాంతంలో ఓ యువ ఓటరు మృతిచెందారు.  కాల్పుల ఘటనతో కూచ్ బెహార్ జిల్లాలో టెన్షన్ వాతావరణం నెలకొంది.  కూచ్‌బెహార్‌లోని సీతల్‌కుచిలో గల ఓ పోలింగ్‌ కేంద్రం ఎదుట గుర్తుతెలియని వ్యక్తులు దాడికి పాల్పడ్డారు. ఆనంద్‌ బుర్మాన్‌ అనే ఓ యువ ఓటరుపై కాల్పులు జరిపి అక్కడి నుంచి పరారయ్యారు. ఈ ఘటనలో తీవ్రంగా గాయపడిన ఆ ఓటరు అక్కడికక్కడే ప్రాణాలు కోల్పోయాడు. ఈ హత్యపై భాజపా, తృణమూల్‌ కాంగ్రెస్‌ పరస్పర ఆరోపణలు చేసుకున్నాయి. ఘటన వెనుక కాషాయ పార్టీ హస్తం ఉందని టీఎంసీ ఆరోపించింది. అయితే మృతుడు తమ పోలింగ్‌ ఏజెంట్‌ అని, అధికార పార్టీయే అతడిపై కాల్పులు జరిపిందని బీజేపీ కౌంటరిచ్చింది.  యువకుడిపై కాల్పుల తర్వాత తృణమూల్‌,  బీజేపీమద్దతుదారులు పోలింగ్‌ కేంద్రం వద్ద ఘర్షణకు దిగారు. బాంబులు విసురుకున్నారు. దీంతో కేంద్ర బలగాలు ఘటనాస్థలానికి చేరుకుని పరిస్థితిని అదుపులోకి తెచ్చేందుకు ఆందోళనకారులపై లాఠీఛార్జ్‌ చేశాయి. అయినప్పటికీ పరిస్థితి సద్దుమణకపోవడంతో కాల్పులు జరపాల్సి వచ్చింది.ప్రస్తుతం ఈ ప్రాంతంలో పోలీసులు, రాపిడ్‌ యాక్షన్‌ ఫోర్స్‌ సిబ్బంది భారీగా మోహరించారు.   హుగ్లీ ప్రాంతంలో భాజపా అభ్యర్థి లాకెట్‌ ఛటర్జీ కారుపై స్థానికులు రాళ్ల దాడికి పాల్పడ్డారు. మీడియా ప్రతినిధులపై, వాహనాలపైనా దాడి చేశారు. ఈ ఘటనపై లాకెట్‌ ఛటర్జీ ఎన్నికల సంఘానికి ఫిర్యాదు చేశారు.
Publish Date:Apr 10, 2021

ప్రజా బాణమా? బీజేపీ బాణమా?

పోలా. అదిరిపోలా. ఖమ్మంలో షర్మిల స్పీచ్ అదిరిపోలా. 40 నిమిషాల అద్భుత ప్రసంగం. ఏ పెద్ద స్థాయి నేతకూ తీసిపోని వాక్ ప్రవాహం. తాను అల్లాటప్పాగా పార్టీ పెట్టలేదని.. తాను ఎవరో వదిలిన బాణాన్ని కాదంటూ సభ వేదికగా సింహగర్జన చేశారు షర్మిల.  సింహం సింగిల్‌గానే వస్తుంది. టీఆర్‌ఎస్‌ చెబితేనో, బీజేపీ అడిగితేనే, కాంగ్రెస్‌ పంపిస్తేనో రాలేదన్నారు. తాను రాజన్న బిడ్డనని, ఎవరి కింద పనిచేయనని, ఎవరితోనూ పొత్తు పెట్టుకోనన్నారు షర్మిల. చెప్పడమైతే తాను సింగిల్‌గానే వస్తున్నానంటూ చెబుతున్నారు కానీ, ఖమ్మం ప్రసంగాన్ని జాగ్రత్తగా విశ్లేషిస్తే.. అలా అనిపించడం లేదంటూ విశ్లేషిస్తున్నారు. 40 నిమిషాల స్పీచ్‌లో 38 నిమిషాలు కేసీఆర్ సర్కారును కుమ్మేశారు. కాంగ్రెస్, బీజేపీలకు చెరో నిమిషం మాత్రమే కేటాయించారు. అంటే, కేంద్ర ప్రభుత్వం అద్భుతంగా పని చేస్తోందని ఆమె ఉద్దేశ్యమా? పెట్రోల్ ధరలు పెరగడం కనిపించడం లేదా? గ్యాస్ రేట్లు మంట పుట్టించడం లేదా? రాష్ట్ర విభజన హామీల అమలు కోసం తెలంగాణ అలమటించడం లేదా? ఐటీఐఆర్ రద్దు చేసింది కేంద్రం కాదా? ప్రాణహిత-చేవెళ్ల ప్రాజెక్టుకు జాతీయ హోదా ఎందుకు ఇవ్వడం లేదు? ఇలా కేంద్రం తెలంగాణకు ఎంతో ద్రోహం చేస్తోందనే ఆరోపణలు ఉన్నాయి. కేంద్రంలోని బీజేపీని ఇబ్బంది పెట్టే ఏ ఒక్క సమస్యపైనా షర్మిల విమర్శల బాణం ఎక్కుపెట్టకపోవడం వ్యూహాత్మకమా? ఉద్దేశ్యపూర్వకమా? అని ప్రశ్నిస్తున్నారు రాజకీయ విశ్లేషకులు.  షర్మిల బీజేపీని విమర్శించేందుకు ఒకే ఒక్క నిమిషం కేటాయించడం స్ట్రాటజీనే అంటున్నారు. "రాష్ట్రానికి బీజేపీ ఇచ్చిన హామీలు ఏమయ్యాయి? బీజేపీ మాటలు చెప్పడం తప్ప చేతల్లో ఏదీ చూపడం లేదు. కేంద్రంలోని బీజేపీ ప్రభుత్వం కాజీపేట కోచ్‌ ఫ్యాక్టరీ ఇవ్వలేదు. తెలంగాణకు ఇచ్చిన ఏ హామీ నెరవేర్చలేదు." ఇంతే ఈ మూడు ముచ్చట్లే. పైపైన చేసిన ఈ చిన్నపాటి విమర్శలే. ఇంకేమీ అనలేదు. బీజేపీని గట్టిగా నిలదీయలేదు. పువ్వుతో కొట్టినట్టు బీజేపీపై సుతిమెత్తని విమర్శలకే పరిమితమయ్యారని అంటున్నారు.  తెలంగాణలో అధికార టీఆర్ఎస్‌కు గట్టి పోటీ ఇస్తూ.. బీజేపీ వేగంగా దూసుకొస్తోంది. అందులోనూ బీజేపీ జాతీయ పార్టీ కూడా. కమలనాథులకు బలం, బలగం మెండు. కొండనైనా ఢీకొట్టగల సత్తా వారిది. అలాంటిది.. తెలంగాణలో కొత్త పార్టీతో ప్రజల ముందుకు రాబోతున్న షర్మిలకు.. కేసీఆర్‌తో పాటూ కమలం పార్టీ కూడా ప్రధాన శత్రువే. కేవలం గులాబీ బాస్‌పైనే విమర్శలకు ఎక్కుపెడితే.. మరి, బీజేపీకి ఎలా చెక్ పెడతారు? ఇంత చిన్న విషయం తెలీకుండానే షర్మిల పార్టీ పెట్టబోతున్నారా? లేక, కావాలనే ఆమె బీజేపీని నిలదీయలేదా? అనే అనుమానాలు. ప్రచారంలో ఉన్నట్టుగానే.. షర్మిల బీజేపీ వదిలిన బాణం అనేందుకు ఖమ్మం సభే ఉదాహరణ అంటున్నారు. తొలి మీటింగ్‌తోనే షర్మిల ఎజెండా ఏంటో తెలిపోయిందని.. ఇన్నాళ్లూ బీజేపీ చేస్తూ వచ్చిన విమర్శలే షర్మిల నోటి నుంచి వచ్చాయని గుర్తు చేస్తున్నారు. కమలనాథులు కేసీఆర్‌ మీదకు షర్మిల బాణాన్ని వదిలారని అంటున్నారు.  బీజేపీ నాయకులు కేసీఆర్‌పై ఇన్నాళ్లూ చేసిన విమర్శలన్నీ ఒక ఎత్తు. ఒక్క సభతో షర్మిల కేసీఆర్‌ను నిగ్గదీసి అడిగిన విధానం మరోఎత్తు. "తెలంగాణ ఆత్మగౌరవం దొర చెప్పుకింద నలిగిపోతోంది. కల్వకుంట్ల ఫ్యామిలీకి తెలంగాణ బానిస అయింది. నీళ్లన్నీ కేసీఆర్‌ ఫామ్‌హౌస్‌కే.. నిధులు కూడా వారికే.. నియామకాలు కూడా కేసీఆర్‌ కుటుంబానికే. నడిరోడ్డుపై లాయర్లను హత్య చేస్తే చర్యలేవి? టీఆర్ఎస్‌కు ఓట్లేస్తేనే జీతాలు పెంచుతామని టీచర్లను బెదిరించారు. ఉద్యమంలో పనిచేసిన వారిని పక్కన పడేశారు. యువతకు ఉద్యోగాలు లేవు.. నిరుద్యోగ భృతి ఏమైంది? దళితులకు మూడెకరాల భూమి ఏమైంది సీఎం సారూ? ముస్లింలకు 12శాతం రిజర్వేషన్లు అన్నారు.. ఏమైంది? వైఎస్‌ హయాంలో 46 లక్షల పక్కా ఇళ్లు కట్టించారు.. కేసీఆర్‌ ఇప్పటి వరకు ఎన్ని ఇళ్లు కట్టించారో చెప్పాలి. రాష్ట్రం రైతు ఆత్మహత్యల్లో దేశంలోనే 2వ స్థానంలో ఉంది. 6 వేల మంది రైతులు ఆత్మహత్యలు చేసుకున్నారు." అంటూ కేసీఆర్‌పై సంచలన ఆరోపణలు చేశారు షర్మిల.  సూటిగా, సుత్తి లేకుండా షర్మిల చేసిన విమర్శలు తెలంగాణ ప్రజలను ఆకట్టుకున్నాయి. అయితే, ప్రతిపక్ష కాంగ్రెస్‌, బీజేపీలను ఈజీగా తీసుకోవడం.. వాటికి పెద్దగా ప్రాధాన్యత ఇవ్వకపోవడమే అనుమానాలకు తావిస్తోంది. నిలబెట్టుకోని హామీల గురించి కాంగ్రెస్‌ నిలదీయదని ఆమె తప్పుబట్టారు. కాంగ్రెస్‌ పార్టీ.. టీఆర్‌ఎస్‌కు ఎమ్మెల్యేలను సప్లై చేసే కంపెనీగా మారిందని ఆగ్రహం వ్యక్తం చేశారు. రాష్ట్రంలో పాలక పక్షాన్ని ప్రశ్నించే ప్రతిపక్షమే లేదన్నారు. అంతే, అక్కడితో సరిపెట్టారు. తెలంగాణలో రోజురోజుకీ కాంగ్రెస్ ప్రాభవం తగ్గుతుండటంతో హస్తం పార్టీని షర్మిల తన ప్రత్యర్థిగా భావించడం లేదని సరిపెట్టుకున్నా.. మరి, బీజేపీని ఎందుకు గట్టిగా నిలదీయలేదనేదే ఇప్పుడు రాజకీయంగా ఆసక్తికరంగా మారింది. మొదటి నుంచీ అంటున్నట్టు.. షర్మిల బీజేపీ వదిలినా బాణమా?
Publish Date:Apr 10, 2021

News Videos

    See More News Videos

    Movie News

    Get all the updates about andhra pradesh news, political news, articles, sr journalists books, regional news, telugu cinema news etc. Find information about Telugu film news, regional news, current affairs, gallery, wallpapers, etc. See Telugu news, news videos along with latest news only at TeluguOne.com.
    TeluguOne Services
    TeluguOne For Your Business
    About TeluguOne
    Keywords: Telugu News

    Copyright © 2021 TeluguOne NEWS - All Rights Reserved

    Disclaimer:
    All content included on this TeluguOne.com Portal including text, graphics, images, videos and audio clips, is the property of ObjectOne Information Systems Ltd. or our associates, and protected by copyright laws. The collection, arrangement and assembly of all content on this portal/ related channels is the exclusive property of ObjectOne Information Systems Ltd. or our associates and protected copyright laws.
    You may not copy, reproduce, distribute, publish, display, perform, modify, create derivative works, transmit, or in any other way exploit any part of copyrighted material without permission from ObjectOne Information Systems Ltd or our associates.