24 గంటల్లోనే.. దెబ్బకు దెబ్బ తీసిన భారత సైన్యం

భారత్ మరోసారి తన సత్తా ఏంటో చూపించింది. నిన్న ముగ్గురు భారత సైనికులను చంపిన పాక్ సైన్యాన్ని దెబ్బకు దెబ్బ తీసింది. మచల్ సెక్టార్ వద్ద భారత సైన్యం పాక్ సైన్యంపై ఎదురుదాడికి దిగింది. ఈ దాడిలో కెప్టెన్ ర్యాంక్ అధికారితో సహా ముగ్గురు పాక్ సైనికులను మట్టుబెట్టింది. కాల్పుల విరమణ ఒప్పందాన్ని ఉల్లంఘిస్తూ భారత ఔట్ పోస్టులపై కాల్పులకు తెగబడుతున్న దాయాదీ సైన్యం నిన్న దొంగచాటుగా జరిపిన దాడిలో ముగ్గురు భారత జవాన్లను పొట్టనబెట్టుకుంది. వారిలో ఒక జవాను శరీరాన్ని గుర్తుపట్టడానికి వీల్లేనంతగా ఛిద్రం చేసి తమ క్రూరత్వాన్ని బయట పెట్టుకుంది. దీనిపై తీవ్ర ఆగ్రహం వ్యక్తం చేసిన భారత సైన్యం ప్రతీకార చర్య తప్పదని పాక్‌ను హెచ్చరించింది. చెప్పినట్లుగానే 24 గంటలు గడవకముందే అన్నమాటను నిలబెట్టుకుంది ఇండియన్ ఆర్మీ.