రోజూ ఈ ఆహారాలు తింటే చాలు.. జుట్టు ఒత్తుగా పెరుగుతుంది!

జుట్టు అందంగా, ఆరోగ్యంగా పెరగాలని ప్రతి ఒక్కరు కోరుకుంటారు.  ఇందుకోసం చాలా రకాల టిప్స్ కూడా ఫాలో అవుతారు.  చాలామంది జుట్టు పెరగడం కోసం, జుట్టు ఆరోగ్యంగా ఉండటం కోసం హెయిర్ ఆయిల్స్, షాంపూలు వాడుతుంటారు.  అయితే ఇవన్నీ అప్పటికే ఆరోగ్యంగా ఉన్న జుట్టుకు  రక్షణ కల్పిస్తాయి తప్ప,  డ్యామేజ్ అయిన జుట్టును రిపేర్ చేయవని, జుట్టు పెరగడంలో సహాయపడవని అంటున్నారు. ఇవన్నీ జుట్టు విషయంలో పరోక్షంగా ప్రభావం చూపించేవే.. కానీ జుట్టు విరిపోవడం, రాలిపోవడం, చిట్లడం వంటి సమస్యలు తగ్గి,  జుట్టు ఒత్తుగా పెరగాలంటే.. కొన్ని ఆహారాలు బాగా సహాయపడతాయని అంటున్నారు ఆహార నిపుణులు.  ఇంతకీ జుట్టు బాగా పెరగాలంటే ఏ ఆహారాలు తినాలి? తెలుసుకుంటే..

ఉసిరి..

శీతాకాలంలో మార్కెట్లో ఉసిరి సులభంగా లభిస్తుంది. ఇందులో విటమిన్ సి, యాంటీఆక్సిడెంట్లు మంచి మొత్తంలో ఉంటాయి. ఇది శరీరంలో మెలనిన్ ఉత్పత్తిని పెంచుతుంది. ఇది జుట్టుకు  సహజంగా ఉండే  నల్ల రంగును  నిలిపి ఉంచడానికి  సహాయపడుతుంది . రోజూ ఒక ఉసిరి తినడం వల్ల జుట్టు ఆరోగ్యంగా పెరగడమే కాకుండా.. చిన్నతనంలోనే జుట్టు తెల్లబడటాన్ని కూడా నివారిస్తుంది.

అరటి పండు..

అరటిపండ్లు ఆరోగ్యానికి మాత్రమే కాకుండా  జుట్టుకు కూడా మేలు చేస్తాయి. అరటిపండ్లలో పొటాషియం, సహజ నూనెలు,  విటమిన్లు పుష్కలంగా ఉంటాయి.  జుట్టులో తేమను నిలుపుకోవడంలో, జుట్టును లోపలి నుండి హైడ్రేట్ చేయడంలో సహాయపడతాయి. అరటిపండ్లు తినడం వల్ల  తలపై చర్మం హైడ్రేట్ గా ఉంటుంది.  జుట్టును మృదువుగా,  మెరిసేలా చేస్తుంది. ఇది పొడి జుట్టును నివారించడంలో సహాయపడుతుంది .

నారింజ..

శీతాకాలంలో నారింజ పండ్లు సులభంగా లభిస్తాయి.  వీటిలో విటమిన్ సి,  బయోఫ్లేవనాయిడ్స్ అధికంగా ఉంటాయి. అవి తలలో రక్త ప్రసరణను పెంచుతాయి, జుట్టు మూలాలకు సమృద్ధిగా ఆక్సిజన్‌ను అందిస్తాయి. నారింజ తినడం వల్ల కొల్లాజెన్ ఉత్పత్తి పెరుగుతుంది. ఇది జుట్టు విరిగిపోవడం,  జుట్టు రాలడాన్ని తగ్గిస్తుంది .

బొప్పాయి..

బొప్పాయిలో "పపైన్" అనే ఎంజైమ్ ఉంటుంది. ఇది విటమిన్-ఎ కలిగి ఉంటుంది. ఇది తలపై ఉన్న మురికి,  అదనపు నూనెను శుభ్రపరచడంలో సహాయపడుతుంది. బొప్పాయి తినడం వల్ల జుట్టుకు అవసరమైన పోషణ లభిస్తుంది.  నిర్జీవంగా,  పొడిగా ఉండే  జుట్టుకు కొత్త మెరుపును ఇస్తుంది.

దానిమ్మ..

దానిమ్మపండ్లలో యాంటీఆక్సిడెంట్లు పుష్కలంగా ఉంటాయి. ఇవి జుట్టు కుదుళ్లను బలోపేతం చేస్తాయి.  రక్త ప్రవాహాన్ని మెరుగుపరుస్తాయి. ఇది జుట్టు పల్చబడకుండా నిరోధించడంలో సహాయపడుతుంది. ఈ పండు జుట్టు సాంద్రతను కూడా పెంచుతుంది . దానిమ్మపండ్లు తినడం వల్ల జుట్టు మందంగా, ఒత్తుగా  కనిపిస్తుంది.

ఆపిల్..

ఆపిల్స్ లో జుట్టు పెరుగుదలకు అవసరమైన బయోటిన్,  ఫైబర్ ఉంటాయి. అవి జుట్టు కుదుళ్లను మూసివేసి వాటిని బలోపేతం చేయడానికి సహాయపడతాయి. ప్రతిరోజూ ఆపిల్స్ తినడం వల్ల  ఆరోగ్యానికి మాత్రమే కాకుండా  జుట్టు కూడా ఆరోగ్యంగా మారుతుంది.  జుట్టు విరిగిపోవడాన్ని,  చివరలు చిట్లకుండా నిరోధిస్తుంది.

                      *రూపశ్రీ