సూర్య వరుస ప్లాప్స్ కి మంగళగీతం పాడిన మూవీ కరుప్పు(karuppu).. ఉరఫ్ వీరభద్రుడు. పైగా సూర్య కెరీర్ లోనే బిగ్గెస్ట్ బ్లాక్ బస్టర్ గా నిలిచి ప్రస్తుతం 300 కోట్లరూపాయిలకి పైగా కలెక్షన్స్ తో దూసుకుపోతుంది.  రీసెంట్ గా కరుప్పు  దర్శకుడు ఆర్ జె బాలాజీ ఒక  ఇంటర్వ్యూలో మాట్లాడుతు 'కరుప్పు’ కథని మొదట తమిళనాడు ముఖ్యమంత్రి, హీరో  విజ‌య్‌కి రాజకీయాల్లోకి వెళ్లే ముందు విజయ్ చేసే చివరి సినిమాగా ఈ కథ బాగుంటుందని భావించి ఆయనకు చెప్పినట్లు పేర్కొన్నాడు.

 దీంతో ఈ విషయంపై ఇప్పటి వరకు పెద్దగా చర్చ జరగకపోయినా  ఎడిటర్ క‌లైవ‌న‌న్ చేసిన వ్యాఖ్యలు వివాదానికి దారితీశాయి. ఒకవేళ ఈ సినిమాను విజయ్ చేసి ఉంటే అది మరింత పెద్ద స్థాయిలో ఉండేదని ఆయన వ్యాఖ్యానించినట్లు ప్రచారం జరిగింది. దీంతో సూర్య అభిమానులు తీవ్ర అసంతృప్తి వ్యక్తం చేస్తున్నారు. ప్రస్తుతం బాక్సాఫీస్ వద్ద భారీ వసూళ్లతో దూసుకుపోతున్న ‘కరుప్పు’ విజయంలో సూర్య నటన కీలక పాత్ర పోషించిందని అభిమానులు గుర్తు చేస్తున్నారు. సినిమా విజయం సాధించిన తర్వాత కూడా హీరో ప్రదర్శనను పక్కనపెట్టి, మరో హీరోతో పోల్చడం సరైన పద్ధతి కాదని వారు అభిప్రాయపడుతున్నారు.

ముఖ్యంగా క్లైమాక్స్‌లో సూర్య ప్రదర్శించిన భావోద్వేగ నటన, డ్యాన్స్, పాత్రలో చూపించిన తీవ్రత సినిమాకు ప్రత్యేక ఆకర్షణగా నిలిచాయని అభిమానులు చెబుతున్నారు. అలాంటి పాత్రను ఎవరు చేసినా అదే స్థాయిలో ప్రభావం చూపించగలరని చెప్పడం సులభం కాదని వారు వాదిస్తున్నారు.ఎడిటర్ వ్యాఖ్యల తర్వాత సోషల్ మీడియాలో రెండు వర్గాల మధ్య చర్చ మొదలైంది. కొందరు సినిమా కథ బలంగా ఉండటం వల్లే విజయం సాధించిందని చెబుతుండగా, మరికొందరు సూర్య నటన లేకుండా ఆ ప్రభావం సాధ్యం కాదని అభిప్రాయపడుతున్నారు. సినిమా విజయానికి కథ, దర్శకత్వం ఎంత ముఖ్యమో, హీరో నటన కూడా అంతే ముఖ్యమని అభిమానులు పేర్కొంటున్నారు. ఈ వివాదం నడుమ సూర్య నేరుగా ఎలాంటి స్పందన ఇవ్వలేదు. అయితే ఆయన సోషల్ మీడియాలో చేసిన ఒక సాధారణ పోస్ట్ అభిమానుల దృష్టిని ఆకర్షించింది. “ప్రేమతో ఉండండి” అనే సందేశంతో చేసిన ట్వీట్‌ని  చాలా మంది ఈ వివాదానికి పరోక్ష సమాధానంగా భావించారు. దీంతో సోషల్ మీడియాలో కొనసాగుతున్న చర్చ కొంతవరకు చల్లారినట్లు కనిపించింది.

Also read: 56 ఏళ్ల వయసులోనూ స్టిల్ సింగిల్.. ఇప్పటికీ తగ్గని క్రేజ్

వివాదం మరింత ముదరకముందే ఎడిటర్ కలైవనన్ కూడా తన వ్యాఖ్యలపై వివరణ ఇచ్చినట్లు తెలుస్తోంది. తాను చెప్పిన మాటలు వేరే విధంగా అర్థం చేసుకున్నారని, తన ఉద్దేశం సూర్య నటనను తక్కువ చేయడం కాదని స్పష్టం చేసినట్లు సమాచారం. భవిష్యత్తులో ఇలాంటి విషయాల్లో మరింత జాగ్రత్తగా వ్యవహరిస్తానని కూడా ఆయన పేర్కొన్నట్లు చెబుతున్నారు. ఈ మొత్తం వ్యవహారంలో మరో ఆసక్తికర అంశం ఆర్జే బాలాజీ, సూర్య మధ్య ఉన్న అనుబంధం. గతంలో పలుమార్లు బాలాజీ, సూర్య తన జీవితంలో ఎంతో కీలక వ్యక్తి అని, తనకు అండగా నిలిచిన వ్యక్తుల్లో ఒకరని పేర్కొన్నారు. అలాంటి దర్శకుడి సినిమా చుట్టూ ఇప్పుడు హీరోల పోలికలతో వివాదం రావడం సినీ వర్గాల్లో చర్చనీయాంశంగా మారింది.