నవ్వులు పూయించడమే పనిగా పెట్టుకునే స్టాండప్ కమెడియన్లకు కొన్నిసార్లు తాము వేసే జోకులే పెద్ద శాపంగా మారుతుంటాయి. సరిగ్గా ఇలాంటి విచిత్రమైన, చేదు అనుభవమే ఎదురైంది ప్రముఖ భారతీయ స్టాండప్ కమెడియన్ యష్ భరద్వాజ్‌కు. కేవలం సోషల్ మీడియాలో పోస్ట్ చేసిన ఒకే ఒక్క కామెడీ రీల్ వీడియో కారణంగా ఆయన ఏకంగా 47 రోజుల పాటు దుబాయ్ జైలులో (డిటెన్షన్ సెంటర్‌లో) నరకం అనుభవించాల్సి వచ్చింది.

అసలు ఏం జరిగిందంటే.. అమెరికా, ఇరాన్ దేశాల మధ్య తీవ్ర ఉద్రిక్తతలు నడుస్తున్న తరుణంలో.. దుబాయ్‌లో గూగుల్ మ్యాప్స్ సరిగ్గా పని చేయడం లేదంటూ యష్ భరద్వాజ్ సరదాగా ఒక వీడియో చేసి ఇన్‌స్టాగ్రామ్‌లో షేర్ చేశారు. అయితే దీనిని దుబాయ్ భద్రతా అధికారులు అత్యంత సీరియస్‌గా తీసుకున్నారు. అది కేవలం ఒక హాస్య వీడియో అయినప్పటికీ, దేశ జాతీయ భద్రతకు ముప్పు కలిగించే అంశంగా భావించి మార్చి 19న ఆయన్ను అదుపులోకి తీసుకున్నారు.

ఈ ఊహించని పరిణామంతో యష్ దాదాపు రెండు నెలల పాటు దుబాయ్ నిర్బంధంలో గడపాల్సి వచ్చింది. సుదీర్ఘ విచారణలు, వారాల తరబడి సాగిన జైలు జీవితం తర్వాత ఎట్టకేలకు మే 5వ తేదీన దుబాయ్ అధికారులు ఆయన్ను భారతదేశానికి డిపోర్ట్ (బహిష్కరణ) చేశారు. ఈ విషయాన్ని స్వయంగా యష్ భరద్వాజ్ తన ఇన్‌స్టాగ్రామ్ వేదికగా ఎమోషనల్ అవుతూ అభిమానులతో పంచుకున్నారు.

స్టాండప్ కామెడీ రంగంలో తనదైన శైలితో మంచి గుర్తింపు తెచ్చుకున్న యష్ భరద్వాజ్.. గతంలో ఎన్నో నగరాల్లో సక్సెస్‌ఫుల్ షోలు నిర్వహించారు. నిరంతరం డిజిటల్ ప్లాట్‌ఫామ్స్, సోషల్ మీడియా వేదికగా యాక్టివ్‌గా ఉంటూ నెటిజన్లను నవ్వించే యష్‌ను.. ఈ దుబాయ్ ఘటన శారీరకంగా, మానసికంగా మరియు ఆర్థికంగా కోలుకోలేని దెబ్బ తీసింది. ఈ కష్టకాలంలో తన కుటుంబం ఎంతో వేదన అనుభవించిందని ఆయన ఆవేదన వ్యక్తం చేశారు.

ప్రస్తుతం ఈ చేదు జ్ఞాపకాల నుంచి బయటపడటానికి యష్ ప్రయత్నిస్తున్నారు. ఇండియాకు తిరిగొచ్చిన వెంటనే ముంబైలో మళ్లీ స్టేజ్ ఎక్కి షోలు చేయడం ప్రారంభించారు. ముంబై నగరం, అక్కడి ప్రేక్షకులు తనకు ఎంతో అండగా నిలిచారని, ప్రదర్శనలు ఇవ్వడం వల్ల మనసుకు కొంత ఉపశమనం లభించిందని తెలిపారు. సోషల్ మీడియాలో ఈ వార్త వైరల్ కావడంతో నెటిజన్లు, తోటి ఆర్టిస్టులు ఆయనకు మద్దతుగా నిలుస్తున్నారు. ఒక చిన్న జోక్ ఇంతటి భయంకరమైన పరిస్థితికి దారితీయడంపై నెట్టింట పెద్ద చర్చ నడుస్తోంది.

ప్రస్తుతం ముంబైలో ఉన్న యష్ భరద్వాజ్.. తన జీవితంలో ఒక కొత్త అధ్యాయాన్ని ప్రారంభించేందుకు బెంగళూరు నగరానికి షిఫ్ట్ అవ్వడానికి సిద్ధమవుతున్నారు. దాదాపు 16 ఏళ్ల క్రితం తనకు స్టాండప్ కామెడీపై తొలిసారిగా ఆసక్తి కలిగింది బెంగళూరులోనేనని.. అందుకే మానసిక ప్రశాంతత కోసం కొన్ని వారాల పాటు అక్కడే గడపాలని నిర్ణయించుకున్నట్లు చెప్పారు. జీవితంలో ఎంతటి కష్టం వచ్చినా వాటన్నింటినీ మర్చిపోయి, మళ్లీ సరికొత్త జోకులతో ప్రేక్షకులను నవ్వించడమే తన ముందున్న ఏకైక లక్ష్యమని యష్ స్పష్టం చేశారు.