ప్రశాంత్ వర్మ సినిమాటిక్ యూనివర్స్ లో భాగంగా రూపొందిన 'హనుమాన్' మూవీ ఎంతటి విజయాన్ని సాధించిందో తెలిసిందే. తేజ సజ్జా హీరోగా ప్రశాంత్ వర్మ తెరకెక్కించిన ఈ సినిమా, ఈ ఏడాది సంక్రాంతికి విడుదలై పాన్ ఇండియా సక్సెస్ ని అందుకుంది. దీనికి సీక్వెల్ గా 'జై హనుమాన్' (Jai Hanuman) రూపొందుతోంది. కేవలం ప్రకటనతోనే సీక్వెల్ పై భారీ అంచనాలు ఏర్పడ్డాయి. ఇప్పుడు ఆ అంచనాలను రెట్టింపు చేసేలా ఫస్ట్ లుక్ రాబోతుంది. (Jai Hanuman First Look)

'జై హనుమాన్' చిత్రాన్ని మైత్రి మూవీ మేకర్స్ నిర్మిస్తోంది. దీపావళి కానుకగా ఈ మూవీ ఫస్ట్ లుక్ ని రేపు (అక్టోబర్ 30న) విడుదల చేస్తున్నట్లు తాజాగా మేకర్స్ ప్రకటించారు. ఈ సందర్భంగా విడుదల చేసిన ప్రీ లుక్ పోస్టర్ ఆకట్టుకుంటుంది. నీటిలో అడుగులు వేస్తూ పురాతన ఆలయం వైపు నడుస్తున్న హనుమంతుని రూపాన్ని పోస్టర్ లో గమనించవచ్చు.

'జై హనుమాన్'లో హనుమంతుడి పాత్ర 'కాంతార' ఫేమ్ రిషబ్ శెట్టి పోషిస్తున్నట్లు ఇటీవల వార్తలు వినిపించాయి. ప్రీ లుక్ పోస్టర్ కూడా హనుమంతుడి పాత్ర రిషబ్ పోషించాడనే అభిప్రాయాన్ని కలిగిస్తోంది. మరి అది నిజమో కాదో రేపటితో తేలిపోతుంది.