మాజీ ప్రధానమంత్రి దేవెగౌడ మనవడు, కర్నాటకలోని హసన్ నియోజకవర్గ ఎంపీ, మహిళలపై అఘాయిత్యానికి పాల్పడిన కేసులో నిందితుడు ప్రజ్వల్ రేవణ్ణను రాహుల్ గాంధీ ‘మాస్ రేపిస్ట్’ అని సంబోధించారు. ఎన్నికల ప్రచారంలో భాగంగా రాహుల్ గాంధీ గురువారం కర్నాటకలోని శివమొగ్గలో ఏర్పాటు చేసిన బహిరంగసభలో మాట్లాడారు. ప్రజ్వల్ రేవణ్ణను ‘మాస్ రేపిస్ట్’ అని పేర్కొన్న రాహుల్ గాంధీ, ఇలాంటి వ్యక్తి ఓట్లు వేయాలని కోరిన ప్రధానమంత్రి నరేంద్ర మోడీ దేశ ప్రజలకు క్షమాపణలు చెప్పాలని డిమాండ్ చేశారు. ‘ప్రజ్వల్ రేవణ్ణ నాలుగు వందల మంది మహిళల మీద అఘాయిత్యం చేశాడు. వారి వీడియోలు చిత్రీకరించాడు. ఇది దేశంలోనే అతి పెద్ద అత్యాచార ఘటన.. ప్రధాన మంత్రికి ప్రజ్వల్ రేవణ్ణ ఘనకార్యాల గురించి ముందే తెలుసు. అలాంటి వ్యక్తికి మద్దతుగా మోడీ మాట్లాడారు’ అని రాహుల్ గాంధీ అన్నారు.
.webp)
.webp)
