లైంగిక వేధింపుల కేసులో ఆరోపణలు ఎదుర్కొంటున్న జానీ మాస్టర్‌ని గోవా పోలీసులు అరెస్ట్‌ చేసి హైదరాబాద్‌ తీసుకొచ్చారు. ఈ కేసుకు సంబంధించిన కొన్ని వివరాలను కూడా మీడియాకు విడుదల చేశారు. జాని మాస్టర్‌ని రెగ్యులర్‌ కోర్టులో హాజరుపరచనున్నారు. ఈ కేసు టాలీవుడ్‌లో సంచలనం సృష్టించిన నేపథ్యంలో పలువురు ప్రముఖులు దీనిపై తమ అభిప్రాయాలను తెలియజేస్తున్నారు. కొందరు బాధితురాల్ని సపోర్ట్‌ చేస్తుంటే.. మరికొందరు జానీ మాస్టర్ వైపు మాట్లాడుతున్నారు. తాజాగా నిర్మాత నట్టికుమార్‌ ఈ కేసుపై స్పందించారు. జానీ మాస్టర్, అసిస్టెంట్‌ కొరియోగ్రాఫర్‌ మధ్య చోటు చేసుకున్న అంశాల గురించి నట్టికుమార్‌ ఏం మాట్లాడారో చూద్దాం.
‘జానీ మాస్టర్ తనపై లైంగిక వేధింపులకు పాల్పడ్డాడని అతని అసిస్టెంట్‌ పోలీసులకు ఫిర్యాదు చేసింది. అయితే తనను 2017లోనే లైంగికంగా వేధించాడని ఇప్పుడు ఫిర్యాదు చేయడం అనేది నాకు విచిత్రంగా అనిపిస్తోంది. ఇలాంటి సమస్య వచ్చిన మహిళా కమిషన్‌ వుంది, పోలీస్‌ స్టేషన్లు ఉన్నాయి, ఫిలిం ఛాంబర్‌ ఉంది, ఆమెను సపోర్ట్‌ చేసే యాక్టివిస్టులు ఉన్నారు. ఇప్పుడు ఉన్నవారే అప్పుడు కూడా ఉన్నారు. అలాంటప్పుడు అప్పుడు కేసు పెట్టకుండా ఇప్పుడు పెట్టడంలో ఏదో ఉంది అని నాకు అనిపిస్తోంది. ఒకవేళ షూటింగ్‌ సమయంలో జానీ అలాంటి పనులు చేసి ఉంటే.. ఆ సమయంలో 300 మంది యూనిట్‌ సభ్యులు ఉంటారు. వాళ్ళకి చెప్పొచ్చు. కానీ, అలాంటిదేమీ జరగలేదు.
వాళ్లిద్దరికీ సంబంధించిన వీడియోలు నేను చూశాను. కానీ, ఏ వీడియోలోనూ వారి మధ్య విభేదాలు ఉన్నాయి అనేది కనిపించడం లేదు. ఎందుకంటే జానీ మాస్టర్ తనకు గురువని, దైవం అని, టాప్‌ కొరియోగ్రాఫర్‌ అవుతాడని ఆ అమ్మాయి చెప్పింది. 2017లోనే ఆమెను వేధిస్తే.. అలా ఎలా మాట్లాడగలుగుతుంది. ఇండస్ట్రీలో ఆర్టిస్ట్‌గానో, టెక్నీషియన్‌గానో పేరు తెచ్చుకోవాలని ఎంతో మంది వస్తుంటారు. ఈ అమ్మాయి విషయానికి వస్తే.. ఆమె ఇష్టప్రకారమే అతనితో ఉంది. అప్పుడు అవకాశాలు కావాలి కాబట్టి అతనికి అనుకూలంగా నడుచుకుంది. ఇప్పుడు తనకు మంచి పేరు వచ్చింది. సోలోగా కొరియోగ్రఫీ చేస్తోంది. ఇప్పుడు అతని అవసరం లేదు కాబట్టి ఎప్పుడో జరిగిన విషయాల గురించి ఇప్పుడు ఫిర్యాదు చేస్తోంది. నాకు తెలిసి ఇద్దరి వైపునా తప్పు ఉంది. కొరియోగ్రాఫర్స్‌ అసోసియేషన్‌ నుంచి అతనొక్కడినే సస్పెండ్‌ చెయ్యడం అనేది కరెక్ట్‌ కాదు. ఇద్దరినీ సస్పెండ్‌ చెయ్యాలి’ అంటూ ఈ కేసుపై తన అభిప్రాయాన్ని తెలియజేశారు నిర్మాత నట్టికుమార్‌.
.WEBP)
.webp)
