అందాన్ని రెట్టింపు చేసే డ్రెస్సింగ్ స్టైల్స్.. ఒక్కసారి ఫాలో అయ్యి చూడండి..!

మనుషుల వ్యక్తిత్వాన్ని, ఆత్మవిశ్వాసాన్ని బయటకు ప్రతిబింబించే అత్యంత ముఖ్యమైన వాటిలో మన వస్త్రధారణ మొదటి స్థానంలో ఉంటుంది. అందంగా కనిపించడం అంటే కేవలం ఖరీదైన దుస్తులు వేసుకోవడం మాత్రమే కాదు, మన శరీరాకృతికి, సందర్భానికి తగినట్లుగా దుస్తులను ఎంచుకోవడంలోనే అసలైన నైపుణ్యం దాగి ఉంటుంది. సరైన డ్రెస్సింగ్ స్టైల్ పాటించినప్పుడు అది మన రూపాన్ని మరింత ఆకర్షణీయంగా మార్చడమే కాకుండా, నలుగురిలో మనల్ని ప్రత్యేకంగా నిలబెడుతుంది. మన దైనందిన జీవితంలో చిన్న చిన్న మార్పులతో మన అందాన్ని రెట్టింపు చేసుకునేందుకు తోడ్పడే ఐదు ముఖ్యమైన డ్రెస్సింగ్ స్టైల్స్  ఉన్నాయి. వాటి గురించి వివరంగా తెలుసుకుంటే..

​బాడీ షేప్‌కు తగినట్లుగా దుస్తుల ఎంపిక..

​ప్రతి ఒక్కరి శరీర నిర్మాణం భిన్నంగా ఉంటుంది.  ఇతరులు వేసుకున్నారని, వాళ్లకు బాగుందని కాకుండా   మన శరీర ఆకృతికి ఏది సరిపోతుందో తెలుసుకోవడం మొదటి మెట్టు. స్లిమ్‌గా ఉండేవారు కాస్త వదులుగా, లేయర్డ్ మోడల్స్‌లో ఉండే దుస్తులను ఎంచుకుంటే రూపురేఖలు చక్కగా కనిపిస్తాయి. అదే సమయంలో కాస్త బొద్దుగా ఉన్నవారు నిలువు గీతలు అంటే వర్టికల్ స్ట్రైప్స్ ఉన్న దుస్తులను, శరీరం పైకి బిగుతుగా లేకుండా వదులుగా ఉండే ఫ్యాబ్రిక్స్‌ను ఎంచుకోవడం వల్ల సన్నగా , ఎత్తుగా కనిపిస్తారు.

​కలర్స్ కాంబినేషన్, కాంట్రాస్ట్ ప్రాధాన్యత..

​దుస్తుల ఎంపికలో రంగులు కీలక పాత్ర పోషిస్తాయి. మన స్కిన్ టోన్ కు  తగిన రంగులను ఎంచుకోవడం వల్ల ముఖంలో సహజమైన కళ వస్తుంది. లేత రంగు టాప్స్‌కు గాఢమైన రంగుల బాటమ్స్ జత చేయడం లేదా కాంట్రాస్ట్ కలర్ కాంబినేషన్ ఉపయోగించడం వల్ల లుక్ ఎంతో ట్రెండీగా మారుతుంది. అదనంగా, ఒకే రంగుకు చెందిన వేర్వేరు షేడ్స్ ఉపయోగించే మోనోక్రోమటిక్ స్టైల్ కూడా ఎంతో సింపుల్‌గా, రాయల్ లుక్‌ను అందిస్తుంది.

​పరిస్థితికి , సందర్భానికి తగ్గ వస్త్రధారణ..

​సందర్భానికి తగినట్లుగా ముస్తాబవ్వడం మన పట్ల ఇతరులకు ఉన్న గౌరవాన్ని పెంచుతుంది. ఆఫీస్ లేదా అధికారిక సమావేశాలకు వెళ్లేటప్పుడు ఫార్మల్ క్లాసీ దుస్తులను ఎంచుకోవాలి. ఇవి  ప్రొఫెషనల్‌గా చూపిస్తాయి. అదే విధంగా పండుగలు, శుభకార్యాలు లేదా వేడుకల సమయంలో సాంప్రదాయ , ఎంబ్రాయిడరీ వర్క్ ఉన్న దుస్తులు ప్రత్యేకమైన ఆకర్షణను ఇస్తాయి. క్యాజువల్ ఔటింగ్‌లు, ఫ్రెండ్స్ మీట్అప్‌లకు జీన్స్, కుర్తీస్ లేదా సింపుల్ డ్రెసెస్ ఎంతో సౌకర్యవంతంగా ఉంటాయి.

​ఫిట్టింగ్ , ఫ్యాబ్రిక్ ప్రాధాన్యత..

​ఎంత ఖరీదైన దుస్తులైనా సరే, వాటి ఫిట్టింగ్ సరిగా లేకపోతే లుక్ మొత్తం పాడవుతుంది. మరీ బిగుతుగా ఉండేవి లేదా అతిగా వదులుగా ఉండే దుస్తులు ధరించడం వల్ల అసౌకర్యంగా కనిపిస్తారు. కాబట్టి శరీరంపై చక్కగా ఒదిగిపోయే సరైన సైజ్ దుస్తులను కుట్టించుకోవడం లేదా ఎంచుకోవడం చాలా అవసరం. అలాగే మనం ఉండే వాతావరణానికి, రుతువులకు తగిన ఫ్యాబ్రిక్ ఎంచుకోవాలి. వేసవిలో కాటన్, లినెన్ వంటి తేలికపాటి వస్త్రాలు, శీతాకాలంలో వెల్వెట్ లేదా సిల్క్ రకాలు ఎంతో అనువుగా ఉంటాయి.

​యాక్సెసరీస్ , సరైన పాదరక్షల జోడింపు..

​డ్రెస్సింగ్ స్టైల్ కంప్లీట్ కావాలంటే సరైన యాక్సెసరీస్ , పాదరక్షలు తప్పనిసరి. మనం వేసుకున్న దుస్తులకు తగినట్లుగా సింపుల్ వాచ్, చిన్న ఇయర్ రింగ్స్ లేదా చైన్ ధరిస్తే చాలు. అతిగా నగలని వేసుకోవడం వల్ల డ్రెస్ అందం తగ్గిపోతుంది. దీనితో పాటు దుస్తుల మోడల్‌కు సరిపోయే హ్యాండ్ బ్యాగ్, షూస్, హీల్స్ లేదా ఫ్లాట్స్ ఎంచుకోవాలి. పాదరక్షలు కేవలం అందానికే కాక రోజంతా సౌకర్యవంతంగా ఉండేలా చూసుకోవాలి.

​సహజమైన చిరునవ్వు , ఆత్మవిశ్వాసమే అసలైన మేకప్.. 

పైన పేర్కొన్న చిన్న చిన్న డ్రెస్సింగ్ చిట్కాలను పాటిస్తూ మన వ్యక్తిత్వానికి తగ్గట్లుగా ముస్తాబైతే, మన సహజ సిద్ధమైన అందం తప్పకుండా రెట్టింపు అవుతుంది.

                         *రూపశ్రీ.