మీకు ఇది తెలుసా.. PCOS సమస్యను PMOS అని మార్చారు.. కారణం ఇదే!

పాలీసిస్టిక్ ఓవరీ సిండ్రోమ్ (PCOS) అనేది మహిళల్లో ఒక సాధారణ సమస్య, ఇది ప్రపంచవ్యాప్తంగా చాలా మంది మహిళలను ప్రభావితం చేస్తుంది. ఇటీవల ఈ సమస్యకు సంబంధించి ముఖ్యమైన సమాచారం వెలుగులోకి వచ్చింది. దీని ప్రకారం PCOSను ఇకపై పాలీఎండోక్రైన్ మెటబాలిక్ ఓవరియన్ సిండ్రోమ్ (PMOS) అని పిలుస్తారు. ప్రపంచవ్యాప్తంగా ఉన్న నిపుణుల ఏకాభిప్రాయంతో ఈ దీనికి  ఈ పేరు పెట్టారు. ఈ సమస్య  ఉన్న చాలా మంది మహిళలకు వాస్తవానికి అండాశయ తిత్తులు ఉండవు కాబట్టి, "PCOS" అనే పదం వైద్యపరంగా తప్పుదోవ పట్టిస్తుందని నిపుణులు భావించారు. PCOSకు ఈ కొత్త పేరు పెట్టడానికి గల కారణాలను , అది తీసుకురాబోయే మార్పులను తెలుసుకుంటే..

పేరు మార్పు వెనుక అసలు కారణం..

జీవక్రియ, హార్మోన్లు, మానసిక ఆరోగ్యం మరియు గుండె సంబంధిత సమస్యలపై ఈ సిండ్రోమ్ చూపే ప్రభావాలు చాలా  విస్తృతంగా ఉంటాయి.  అయితే ఈ సమస్యను  దాని పాత పేరు పూర్తిగా ప్రతిబింబించడం లేదని పరిశోధకులు గుర్తించడం వల్ల, PCOS పేరును మార్చాలనే నిర్ణయం తీసుకున్నారు. ఈ పరిస్థితి ప్రపంచవ్యాప్తంగా, ముఖ్యంగా భారతదేశంలో, లక్షలాది మంది మహిళలను ప్రభావితం చేస్తున్నందున,  ఊబకాయం, మధుమేహం, వంధ్యత్వం, మానసిక ఆరోగ్య సమస్యలతో దీనికి సంబంధం ఉన్నట్లు ఎక్కువగా తేలుతున్నందున, ఈ పేరు మార్పు మరింత ప్రాముఖ్యతను సంతరించుకుంది.

PCOS ను   PMOS గా ఎందుకు మార్చారంటే..

ఈ సిండ్రోమ్ లో ఒకటి కంటే ఎక్కుగా ఉండే చాలా రకాల సమస్యలను ప్రతిబింబించేలా దీనికి పాలిఎండోక్రైన్ మెటబాలిక్ ఓవేరియన్ సిండ్రోమ్ అనే కొత్త పేరు పెట్టారు.  పాత పేరు ఎక్కువగా అండాశయ తిత్తులపై దృష్టి సారించింది, అయితే ఈ వ్యాధి బారిన పడిన చాలా మంది మహిళల్లో తిత్తులు ఏర్పడవు. దానికి బదులుగా, ఈ సిండ్రోమ్ అంతర్గత వ్యవస్థలు, జీవక్రియ , అండాశయ పనితీరును ప్రభావితం చేస్తుంది. అందుకే పేర్లు మార్చారు.

కొత్తపేరుకు అర్థం..

పాలీఎండోక్రైన్: అనేక హార్మోన్ వ్యవస్థలు ప్రభావితమవుతాయి.

మెటబాలిక్: ఈ పరిస్థితి ఇన్సులిన్ నిరోధకత, ఊబకాయం , మధుమేహం వచ్చే ప్రమాదంతో దగ్గరి సంబంధం కలిగి ఉంటుంది .

ఓవరియన్ : ఇది ఇప్పటికీ అండోత్పత్తి, రుతుక్రమం , సంతానోత్పత్తిని ప్రభావితం చేస్తుంది.

సిండ్రోమ్: ఇది సంబంధిత లక్షణాలు , ఆరోగ్య ప్రమాదాల సమూహాన్ని సూచిస్తుంది.

 పేరు మార్పు ఇందుకే..

పేరు మార్పు యొక్క లక్ష్యాలు రోగ నిర్ధారణను మెరుగుపరచడం, అపోహలను తగ్గించడం , మరింత కచ్చితమైన చికిత్సను ప్రోత్సహించడం అని ఎండోక్రైన్ సొసైటీ చెబుతోంది. స్కాన్‌లో అండాశయ తిత్తులు కనిపించే వరకు తమకు PCOS ఉండదని చాలా మంది మహిళలు నమ్మడం వల్ల, పాత పేరు తరచుగా రోగ నిర్ధారణను ఆలస్యం చేసిందని  నిపుణులు చెబుతున్నారు.

                                         *రూపశ్రీ.