ముహూర్త నిర్ణయంలో ఎన్నో జాగ్రత్తలు అవసరమౌతాయి. వేరు వేరు తిథి, నక్షత్ర, వారాదులు కలయికల వల్ల వైవిధ్యమైన ఫలితాలుంటాయి. యోగామంటే కలయిక కావడం వల్ల వీనినే సుయోగాలు, దుర్యోగాలు అనే పేర్లతో సూచించడం జరిగింది. వీటన్నింటి ఉద్దేశం మంచి సమయంలో కార్యక్రమాలను నిర్వహించుకోవాలనే. అయితే అన్ని విధాలుగా దోషం లేని ముహూర్తం మనకు లభించక పోయినప్పటికీ తక్కువ దోషాలు, ఎక్కువ గుణాలు కలిగిన ముహూర్తాన్ని ఎంచుకోవడం అవసరం. దానికోసం ప్రత్యేకాంశాలను వేరు వేరు గ్రంథాల ద్వారా పరిచయం చేసుకుంటూ, సాధ్యమైనంత పరిధిలో ఉత్తమ ముహూర్తాన్ని నిర్ణయించాలి. ఆ ప్రయోజనం నెరవేర్చడంలో ఈ పాఠం కొంతవరకు వినియోగపడుతుంది.