విషఘటీ దోషం 3 రకాలు: 1. నక్షత్ర విషఘటీ దోషం 2. తిథి విషఘటీ దోషం 3. వార విషఘటీ దోషం.

“వివాహా వ్రత చూడాసు గృహారంభ ప్రవేశయోః

యాత్రాది శుభ కార్యేషు విఘ్నదా విషనాడికాః "

అనడం వల్ల శుభకార్యాల్లో పై మూడు రకాలైన దోష కాలాలు విఘ్నాలను కలిగిస్తాయి.

1. నక్షత్ర విష ఘటికలు: నక్షత్ర ప్రమాణం 60 ఘడియలు అయినప్పుడు విష ఘడియలు 4 అవుతాయి. (గం. 1.36ని.లు) ప్రమాణంలో మార్పులుంటే దానిని బట్టి లెక్కించుకోవాలి.

రేవతి, పునర్వసు, మాఘ నక్షత్రాలకు 30 ఘడియల తరువాత, రోహిణికి 40 ఘడియల తర్వాత, ఆశ్రేషకు 32 ఘడియల తర్వాత, అశ్వినికి 50 ఘడియల తర్వాత, ఉత్తర, శతభిషాలలో 18 ఘడియల తర్వాత, పుబ్బ, చిత్ర, ఉత్తరాషాఢ, పుష్యమి నక్షత్రాలలో 20 ఘడియల తర్వాత, విశాఖ, స్వాతి, మృగశిర, జ్యేష్ట నక్షత్రాలకు 14 ఘడియల తర్వాత, ఆర్ర్ధ, హస్తలకు 21 ఘడియల తర్వాత, పూర్వాభాద్రకు 16 ఘడియల తర్వాత, ఉత్తరాభాద్ర పూర్వాషాడ, భరణీ నక్షత్రాలకు 24 ఘడియల తర్వాత, అనురాధ, ధనిష్ట, శ్రవణాలకు 10 ఘడియల తర్వాత, మూలకు 56 ఘడియల తర్వాత 4 ఘడియలు విషఘటికలు అవుతాయి. ఇవి వివాహాదులకు వర్జ్యాలు.

2. తిథి విషఘటికలు: పాడ్యమికి 14, విదియకు 5, తదియకు 8, చవితికి 7, పంచమికి 7, షష్ఠీకి 5, సప్తమికి 4, అస్తమికు 8, నవమికి 7, దశమికి 10, ఏకాదశికి 3, ద్వాదశికి 10, త్రయోదశికి 12, చతుర్దశికి 7, పూర్ణిమకు 8, ఘటికల తర్వాత 4 ఘడియలు తిథి విషఘడియలు.

3. వార విషఘటికలు: ఆదివారం 20, సోమవారం 2, మంగళవారం 12, బుధవారం 10, గురువారం 7, శుక్రవారం 5, శనివారం 25 ఘడియల తర్వాత 4 ఘడియలు వార విషఘటికలు.

దోషాపవాదము:

లగ్నానికి చంద్రుడు త్రికోణాల్లో ఉన్నా, లగ్నాధిపతి కేంద్రాల్లో ఉండి శుభ గ్రహాలచే చూడబడినా, విషఘటీ దోష పరిహారం అవుతుంది.

చంద్రో విషఘటీ దోషం హంతి కేంద్ర త్రికోణగః

లగ్నం వినా శుభైః దృష్టః కేంద్రావా లగ్నవన్తధా" - బృహస్పతి వాక్యం

అనగా చంద్రుడు లగ్నానికి కేంద్రాల్లో (అంటే 4, 7, 10 స్థానాలు)లో ఉండి శుభగ్రహాలచే చూడబడినా, విషఘటీ దోష పరిహారమవుతుంది.

ఇక్కడ లగ్న చంద్రుడు దోషం కాబట్టి లగ్నేతర కేంద్రాలని చెప్పబడింది. మిగిలిన కేంద్రాలు చతుర్థ, సప్తమ, దశమ స్థానాలు. కాని సప్తమ స్థానంలో గ్రహం ఉంటే జామిత్ర దోషం. ఈ దోషం వివాహానికి అవశ్యం నింద్యం. కాబట్టి వివాహానికి తప్ప అన్య శుభకార్యాలకు సంప్తమ కేంద్రాన్ని గ్రహించవచ్చు. వివాహానికి జామిత్ర దోషపవాదం కలిగితే సప్తమ కేంద్రాన్ని కూడా గ్రహించవచ్చు.

“విషనాడ్యుత్థితం దోషం హంతి సౌమ్యర్ క్షగః శశీ

మిత్ర దృష్ఠోకధవా స్వీయ వర్గస్థో లగ్నతపోకపివా" - ఫలప్రదీపం

చంద్రుడు కాని, లగ్నాధిపతి గాని శుభారాశిలో ఉండి లేక స్వీయవర్గాల్లో ఉండి మిత్ర గ్రహంతో చూడబడినా, విషఘటీ దోష పరిహారం అవుతుంది.