స్టార్ మా టీవీలో ప్రసారమవుతున్న సీరియల్ ' ఎటో వెళ్లిపోయింది మనసు'(Eto Vellipoyindhi Manasu). ఈ సీరియల్ సోమవారం నాటి ఎపిసోడ్ -238 లో....రామలక్ష్మి బొమ్మ బొరుసు వేస్తుంది. తను అనుకున్న బొమ్మ పడుతుంది. దాంతో నేను చెప్పినట్టు చెయ్యాలని సీతాకాంత్ తో రామలక్ష్మి అంటుంది. చేస్తానని సీతా అనగానే.. ఈ పాలు తాగండి అని చెప్తుంది. నేను ఆకలితో పడుకోకూడదని ఇదంతా చేసావ్ కదా అని సీతాకాంత్ అంటాడు. అవునని రామలక్ష్మి అంటుంది. సీతాకాంత్ పాలు తాగి సగం రామలక్ష్మికి ఇస్తాడు. దాంతో రామలక్ష్మి ప్రేమగా తనని చూస్తు ఉంటుంది.

మరొకవైపు శ్రీవల్లి టీ తాగుతూ శ్రీలతని ఇర్రిటేట్ చేస్తుంటుంది. అప్పుడే రామలక్ష్మి సీతాకాంత్ ఇద్దరు పై నుండి వస్తుంటారు. సీతాకాంత్ ని శ్రీలత పిలిచి.. సిరికి బాగా దిష్టి తాకినట్లు ఉంది.. అందుకే ఇంట్లో పూజ చేద్దామనుకుంటున్నా అని అంటుంది. దానికి సీతాకాంత్ సరే అంటాడు. ఎలాగూ పూజ అంటున్నారు కదా సిరికి నెక్లెస్ తీసుకున్నాను.. దాన్ని కూడా అప్పుడే ఇస్తానని సీతాకాంత్ అంటాడు. నువ్వేం మాట్లాడడం లేదు.. నీకు పూజ చెయ్యడం ఇష్టం లేదా.. నెక్లెస్ ఇవ్వడం ఇష్టం లేదా అని రామలక్ష్మిని శ్రీవల్లి అంటుంది. నాకెందుకు ఇష్టం ఉండదంటు శ్రీవల్లికి రామలక్ష్మి వార్నింగ్ ఇస్తుంది. ఆ తర్వాత అభికి శ్రీలత ఫోన్ చేసి రమ్మంటుంది. అప్పుడే రామలక్ష్మి ఫోన్ మాట్లాడుతుంది. వెనకాల నుండి అభి వస్తాడు. తనని చూసి రామలక్ష్మి షాక్ అవుతుంది. నువ్వెందుకు వచ్చావంటూ అభిని రామలక్ష్మి కోప్పడుతుంది. అదంతా పై నుండి సీతాకాంత్ చూస్తుంటాడు. రామలక్ష్మి చేతులు పట్టుకొని అభి సారీ రామలక్ష్మి అంటాడు. వాడెందుకు వచ్చాడు.. అసలేం జరుగుతుందని సీతాకాంత్ కిందకి వస్తుంటాడు. ఆ తర్వాత చెయ్ వదులు అంటూ అభి చెంప పగులగోడుతుంది రామలక్ష్మి. ఇంకొకసారి రాకని వార్నింగ్ ఇస్తుంది. అభిని పంపించి రామలక్ష్మి లోపలికి వస్తుంది. అభి గురించి చెప్పడం లేదని సీతాకాంత్ అనుకుంటాడు. అభి గురించి చెప్పి తనని డిస్టబ్ చెయ్యడం ఎందుకని రామలక్ష్మి అనుకుంటుంది.

అప్పుడే సేట్ వచ్చి.. నెక్లెస్ ఇస్తాడు. శ్రీలత వాళ్ళు వచ్చి చూసి.. బాగుందని అంటారు. ఈ నెక్లెస్ సిరి కి ఇచ్చేవరకు నా దగ్గర ఉంచుకుంటానని శ్రీవల్లి అనగానే.. రామలక్ష్మి వద్దని అంటుంది. ఎందుకు వద్దని అంటున్నావని శ్రీవల్లి, సందీప్ లు గొడవపెడుతుంటే.. సరే ఉంచుకోమని పెద్దాయన అంటాడు. ఆ తర్వాత పూజ జరుగుతుండగా అభి వస్తాడు. అభిని చూసి సీతాకాంత్ షాక్ అవుతాడు. ఆ తర్వాత ఏం జరిగిందో తెలియాలంటే తర్వాతి ఎపిసోడ్ వరకు ఆగాల్సిందే.