కోలీవుడ్ స్టార్ విజ‌య్ సినిమా అంటేనే మాస్ మ‌స్తీ. పాట‌లు, ఫైట్లూ.. ఇలా అన్నీ ఓ రేంజ్ లో ఉంటాయి. అలా లేకుంటే.. అది అస‌లు విజ‌య్ సినిమానే కాద‌న్న‌ది అభిమానుల అభిప్రాయం. ఇందుకు త‌గ్గ‌ట్టే.. రాబోయే చిత్రం (విజ‌య్ 65)లోనూ యాక్ష‌న్ కి పెద్దపీట వేస్తోంద‌ట విజ‌య్ అండ్ టీమ్.  

వివ‌రాల్లోకి వెళితే.. నెల్స‌న్ దిలీప్ కుమార్ ద‌ర్శ‌క‌త్వంలో విజ‌య్ క‌థానాయ‌కుడిగా ఓ యాక్ష‌న్ డ్రామా తెర‌కెక్కుతున్న సంగ‌తి తెలిసిందే. ఇందులోని పోరాట ఘ‌ట్టాలు సినిమాకి ప్ర‌ధాన బలంగా నిలుస్తాయ‌ని కోలీవుడ్ బ‌జ్. కార్ ఛేజింగులు.. బైక్ ఛేజింగులు.. గుర్ర‌పు స్వారీలు.. గ‌న్ ఫైట్స్.. ఇలా అన్ని ర‌కాల యాక్ష‌న్ సీన్స్ కి ఈ చిత్రంలో స్కోప్ ఉంద‌ట‌. ఈ స‌న్నివేశాల‌న్నీ మాస్ ఆడియ‌న్స్ కి ఫుల్ మీల్స్ లా ఉంటాయ‌ని అంటున్నారు.  మ‌రి.. ఓ రేంజ్ లో విజ‌య్ చేయ‌నున్న ఈ యాక్ష‌న్ హంగామా.. సిల్వ‌ర్ స్క్రీన్ పై ఎలా ఉంటుందో తెలియాలంటే కొన్నాళ్ళు వేచిచూడాల్సిందే.

కాగా, ఈ క్రేజీ ప్రాజెక్ట్ లో విజ‌య్ కి జోడీగా `బుట్ట‌బొమ్మ‌` పూజా హెగ్డే న‌టిస్తోంది. దాదాపు తొమ్మిదేళ్ళ త‌రువాత పూజ న‌టిస్తున్న త‌మిళ సినిమా ఇదే కావ‌డం విశేషం. స‌న్ పిక్చ‌ర్స్ సంస్థ ఈ భారీ బ‌డ్జెట్ మూవీని నిర్మిస్తోంది.