బాలీవుడ్ స్టార్ నటి అనుష్క శర్మ (Anushka Sharma) మరోసారి సోషల్ మీడియాలో హాట్ టాపిక్‌గా మారారు. అయితే ఈసారి ఆమె చర్చల్లోకి రావడానికి కారణం ఏ సినిమానో లేదా ఆమె వ్యక్తిగత జీవితమో కాదు. ఆమె పెట్టిన ఒకే ఒక్క ఇన్‌స్టాగ్రామ్ స్టోరీ ఇప్పుడు దేశవ్యాప్తంగా పెద్ద వైద్య వివాదానికి తెరలేపింది. వైద్య నిపుణులు, నెటిజన్లు ఆమెపై తీవ్ర స్థాయిలో విమర్శలు గుప్పిస్తుండటంతో ఈ వ్యవహారం కాస్తా సోషల్ మీడియా వార్‌గా రూపాంతరం చెందింది. అసలు ఇంతకీ అనుష్క చేసిన తప్పేంటి? ఆమె పోస్ట్‌ వెనుక ఉన్న వివాదం ఏంటో ఇప్పుడు తెలుసుకుందాం.

ఇటీవల అనుష్క శర్మ తన ఇన్‌స్టాగ్రామ్ ఖాతాలో ప్రముఖ హోమియోపతి వైద్యుడు రాజన్ శంకరన్, వ్యాపారవేత్త నమితా థాపర్‌తో మాట్లాడుతున్న ఒక వీడియోను షేర్ చేశారు. ఈ వీడియోతో పాటు ఆమె రాసిన వ్యాఖ్యలే ఇప్పుడు ఈ వివాదానికి మూలకారణం అయ్యాయి. తన జీవితంలో హోమియోపతి వైద్య విధానం అత్యంత కీలక పాత్ర పోషించిందని అనుష్క పేర్కొన్నారు. అంతేకాకుండా, తన ఆరోగ్య ప్రయాణంలో డాక్టర్ రాజన్ శంకరన్ కీలకమైన వ్యక్తి అంటూ ఆమె ఆయనకు క్రెడిట్ ఇచ్చారు. కోట్లాది మంది ఫాలోవర్లు ఉన్న ఒక సెలబ్రిటీ ఇలాంటి వ్యాఖ్యలు చేయడంతో ఈ పోస్ట్ క్షణాల్లో వైరల్‌గా మారిపోయింది.

అనుష్క చేసిన ఈ ప్రకటనపై మెడికల్ కమ్యూనిటీ తీవ్రంగా స్పందించింది. శాస్త్రీయంగా నిరూపణ కాని, ఇంకా వివాదాల్లోనే ఉన్న ఒక వైద్య విధానాన్ని ఇంత పెద్ద స్టార్ నటి ప్రమోట్ చేయడం ఏంటని డాక్టర్లు, ఆరోగ్య నిపుణులు ప్రశ్నిస్తున్నారు. ముఖ్యంగా తీవ్రమైన జబ్బులకు హోమియోపతి సరైన చికిత్స కాదని, దానికి తగిన శాస్త్రీయ ఆధారాలు లేవని వైద్యులు వాదిస్తున్నారు. సెలబ్రిటీలు ఇలాంటి ప్రకటనలు చేయడం వల్ల సామాన్య ప్రజలు మోసపోయే ప్రమాదం ఉందని వారు హెచ్చరిస్తున్నారు.

ఈ విమర్శల్లో అందరికంటే ముందు వరుసలో నిలిచారు ప్రముఖ లివర్ స్పెషలిస్ట్ డాక్టర్ సిరియాక్ అబ్బీ ఫిలిప్స్. సోషల్ మీడియాలో 'ది లివర్ డాక్' (The Liver Doc) గా ఎంతో ప్రసిద్ధి చెందిన ఆయన, అనుష్క శర్మ పోస్ట్‌ను తీవ్రంగా తప్పుపట్టారు. మొదటి నుంచి హోమియోపతి వైద్య విధానాన్ని వ్యతిరేకించే ఆయన, ఎల్లప్పుడూ ఎవిడెన్స్ బేస్డ్ మెడిసిన్ మాత్రమే నమ్మాలని స్పష్టం చేశారు. అనుష్క లాంటి సెలబ్రిటీలు బాధ్యతారాహిత్యంగా వ్యవహరిస్తూ ప్రజలను తప్పుదోవ పట్టిస్తున్నారని ఆగ్రహం వ్యక్తం చేశారు.

ప్రస్తుతం ఇంటర్నెట్ ప్రపంచం ఈ విషయంలో రెండు వర్గాలుగా విడిపోయింది. అనుష్క శర్మకు కోట్ల మంది ఫాలోవర్లు ఉన్నారని, ఆమె మాటలను నమ్మి ప్రజలు అసలైన అల్లోపతి వైద్యానికి దూరమయ్యే ప్రమాదం ఉందని కొందరు ఆందోళన వ్యక్తం చేస్తున్నారు. సెలబ్రిటీల ఎండార్స్‌మెంట్ల వల్ల రోగులు సరైన సమయంలో ప్రాణాధార చికిత్సలను తీసుకోకుండా ఆలస్యం చేస్తారని విమర్శిస్తున్నారు. అయితే అనుష్క మద్దతుదారులు మాత్రం ఆమెను వెనకేసుకొస్తున్నారు. ఆమె కేవలం తన వ్యక్తిగత అనుభవాన్ని మాత్రమే పంచుకుందని, ఎవరినీ అల్లోపతి వైద్యం ఆపేయమని చెప్పలేదని వారు వాదిస్తున్నారు. కొంతమంది నెటిజన్లు తమకు కూడా హోమియోపతి వల్ల మేలు జరిగిందంటూ కామెంట్లు పెడుతున్నారు.