బాలీవుడ్ యంగ్ బ్యూటీ అనన్యా పాండే (Ananya Panday) నటించిన 'చాంద్ మేరా దిల్' (Chand Mera Dil) సినిమా ఇటీవల ప్రేక్షకుల ముందుకు వచ్చింది. ధర్మ ప్రొడక్షన్స్ నిర్మించిన ఈ ప్రేమకథా చిత్రంలో లక్ష్య హీరోగా నటించగా, వివేక్ సోని దర్శకత్వం వహించారు. అయితే ఈ సినిమా బాక్సాఫీస్ వద్ద ఆశించిన స్థాయిలో ప్రదర్శన కనబరచకపోగా, ఇప్పుడు ఇందులోని ఒక డ్యాన్స్ సీక్వెన్స్ తీవ్ర వివాదానికి దారితీసింది. 

ఈ సినిమాలో అనన్యా పాండే చేసిన భరతనాట్యం ఫ్యూజన్ డ్యాన్స్‌ సోషల్ మీడియాలో వైరల్ అవ్వడంతో, నెటిజన్లు ఆమెపై తీవ్రస్థాయిలో మండిపడుతున్నారు. భారతీయ సాంప్రదాయ కళను అవమానించేలా ఈ డ్యాన్స్ ఉందంటూ పెద్ద ఎత్తున ట్రోలింగ్ మొదలైంది.

'చాంద్ మేరా దిల్' చిత్రంలో అనన్యా పాండే 'చాందిని' అనే ఇంజనీరింగ్ విద్యార్థిని పాత్రను పోషించింది. సినిమాలో ఆమె భరతనాట్యం నృత్యకారిణి కూడా. ఒక కాలేజ్ ఈవెంట్ సందర్భంలో సాంప్రదాయ దుస్తులు ధరించి ఆమె వేదికపై భరతనాట్యం, మోడ్రన్ ఫ్యూజన్ కలగలిపిన ఒక నృత్యాన్ని ప్రదర్శిస్తుంది. ఈ సీన్‌కు సంబంధించిన క్లిప్ నెటిజన్ల కంట పడటంతో విమర్శల పర్వం మొదలైంది.

సాంప్రదాయ భరతనాట్యానికి ఉండాల్సిన హావభావాలు, నృత్య ముద్రలు ఈ ప్రదర్శనలో ఏమాత్రం లేవని నెటిజన్లు పెదవి విరుస్తున్నారు. అనన్యా పాండే డ్యాన్స్ చూస్తుంటే ఏదో 'రోబో' భరతనాట్యం చేస్తున్నట్లు ఉందే తప్ప, అందులో ఎలాంటి గ్రేస్ లేదని ఎద్దేవా చేస్తున్నారు. బ్యాక్‌గ్రౌండ్‌లో నటరాజ స్వామి విగ్రహాన్ని ఉంచి, ఇలాంటి డ్యాన్స్ చేయడం ఏంటని పలువురు శాస్త్రీయ నృత్య కళాకారులు కూడా అభ్యంతరం వ్యక్తం చేస్తున్నారు.

ఈ వీడియోపై సోషల్ మీడియాలో నెటిజన్లు రకరకాలుగా స్పందిస్తున్నారు. "భరతనాట్యం క్రీస్తుపూర్వం 200లో పుట్టింది.. కానీ అనన్యా పాండే చేతుల్లో 2026 లో అంతమైపోయింది" అంటూ ఒకరు వ్యంగ్యంగా కామెంట్ చేయగా.. మరికొందరు "ఇది చూస్తుంటే నా కళ్లలోంచి రక్తం వస్తోంది బాబోయ్! దయచేసి మన సంస్కృతిని, శాస్త్రీయ నృత్యాలను ఇలా అపహాస్యం చేయకండి" అని ఆవేదన వ్యక్తం చేశారు.

మరికొందరు నెటిజన్లు టాలీవుడ్ స్టార్ బ్యూటీ సాయి పల్లవి, అలాగే దివంగత నటి శ్రీదేవి పాత నృత్యాల వీడియోలను షేర్ చేస్తూ.. "స్క్రీన్‌పై భరతనాట్యం ఎలా చేయాలో వీరిని చూసి నేర్చుకోండి" అంటూ అనన్యా పాండేకు హితవు పలుకుతున్నారు.

మొత్తానికి 'చాంద్ మేరా దిల్' సినిమా ఫలితం ఎలా ఉన్నా, అనన్యా పాండే భరతనాట్యం ఫ్యూజన్ డ్యాన్స్ మాత్రం సోషల్ మీడియాలో హాట్ టాపిక్‌గా మారింది. భారతీయ సాంప్రదాయ కళలను వెండితెరపై ప్రదర్శించేటప్పుడు నటీనటులు, దర్శకులు మరింత జాగ్రత్త వహించకపోతే ఇలాంటి తీవ్రమైన ఆన్‌లైన్ బ్యాక్‌లాష్ ఎదుర్కోవాల్సి వస్తుందని ఈ ఘటన మరోసారి నిరూపించింది.

https://x.com/HasnaZaruriHai/status/2058492436251607285