కోర్ట్ మూవీ రివ్యూ
on Mar 13, 2025
సినిమాపేరు: కోర్ట్
నటీనటులు:ప్రియదర్శి,శివాజీ,హర్షరోషన్,శ్రీదేవీ,సాయికుమార్,శుభలేఖ సుధాకర్,రోహిణి,రాజశేఖర్ అనింగి,సురభి ప్రభావతి తదితరులు
రచన,దర్శకత్వం:రామ్ జగదీష్
సినిమాటోగ్రఫి:దినేష్ పురుషోత్తమన్
ఎడిటర్:కార్తీక శ్రీనివాస్
సంగీతం:విజయ్ భులగనీన్
నిర్మాత: ప్రశాంతి తిప్పరనేని
బ్యానర్ : వాల్ పోస్టర్ సినిమా
సమర్పణ:నాని
రిలీజ్ డేట్: 14 - 03 -2025
నాచురల్ స్టార్ నాని (Nani) సమర్పణలో ప్రియదర్శి (Priyadarshi) హీరోగా తెరకెక్కిన కోర్ట్ మూవీ,రిలీజ్ డేట్ కంటే ముందే ప్రీమియర్ షోస్ తో ప్రేక్షకుల ముందుకు వచ్చింది.రెగ్యులర్ చిత్రాలకి భిన్నంగా 'ఫోక్సో' చట్టం ప్రధానాంశంగా మూవీ తెరకెక్కిందని,మేకర్స్ ప్రమోషన్స్ లో చెప్తు వస్తుండంతో 'కోర్ట్' పై అందరిలో ఆసక్తి నెలకొని ఉంది.మరి మూవీ ఎలా ఉందో చూద్దాం. (Court Movie Review)
కథ
పెద్ద లాయర్ అవ్వాలని కలలు కనే జూనియర్ లాయర్ తేజ(ప్రియదర్శి).. మోహన్ రావు(సాయికుమార్) అనే పేరు మోసిన లాయర్ దగ్గర ప్రాక్టీస్ చేస్తుంటాడు. సొంతంగా ఒక కేసు వాదిస్తానని తేజ అడుగుతున్నా కూడా, నువ్వు అంత తెలివైన వాడివి కాదని మోహన్ రావు కేసు ఇవ్వడు. చందు(హర్షరోషన్), జాబిలి(శ్రీదేవి) అనే ఇద్దరు యువజంట ప్రేమించుకుంటారు. జాబిలి మావయ్య మంగపతి(శివాజీ) ఉన్నత వర్గానికి చెందిన వ్యక్తి. పలుకుబడితో పాటు బాగా డబ్బున్న వ్యక్తి. కుటుంబ పరువు కోసం ఎంత దూరమైన వెళ్లే వ్యక్తి. తన ఇంట్లో ఉండే చిన్నఆడపిల్లలు సైతం మంచి బట్టలు వేసుకోకపోతే ఒప్పుకోడు. చందు, జాబిలి ఒక గదిలోకి రహస్యంగా వెళ్లిన వీడియోని మంగపతి చూసి తట్టుకోలేకపోతాడు. దీంతో చందు పై ఫోక్సో కేసు నమోదు చేసి జైల్లో ఉంచడమే కాకుండా లాయర్ దామోదర్(హర్ష వర్ధన్) తో కలిసి చందు ని జీవితాంతం జైల్లో ఉంచాలనే ప్లాన్ లో ఉంటాడు. ఈ కేసుని వాదించడానికి మోహన్ రావు ఒప్పుకోకపోయినా తేజ ఒప్పుకుంటాడు. మోహన్ రావు లాంటి బడా లాయర్ ఆ కేసు ఎందుకు ఒప్పుకోలేదు? ఫోక్సో కేస్ అంటే ఏమిటి? చందు, జాబిలి గదిలో ఏం చేసారు? మంగపతి గెలిచాడా? తేజ గెలిచాడా? జాబిలి, చందు ప్రేమ ఏమైందనేదే ఈ కథ.
ఎనాలసిస్
ఫోక్సో చట్టం గురించి ప్రతి ఒక్కరికి తమ సినిమా ద్వారా తెలియచేయాలనే మేకర్స్ ఆలోచన మంచిదే. కానీ మూవీ ఆ దిశగా సాగలేదు. యువజంట మధ్య లవ్ స్టోరీ తో దారి తప్పిందని చెప్పవచ్చు. అసలు ఈ కథ కి ఇంటర్ కాస్ట్ లవ్ అనేది పెట్టడం చాలా పెద్ద మిస్టేక్. ఒకే కాస్ట్ లో ఏజ్ పరంగా మైనారిటీ తీరని అమ్మాయిని ముట్టుకున్నా కూడా ఫోక్సో కిందకే వస్తుంది కదా. అప్పుడు ఆడియెన్స్ 'ఫోక్సో' కేస్ మీదనే దృష్టి పెట్టేవాళ్లు. సీన్స్ పరంగా కూడా టెన్షన్ అనేది లేదు. చందు ఫోక్సో కింద అరెస్ట్ అవ్వడం, జైల్లో ఉంచడం, అతను పడే ఇబ్బందులని సరిగా ఎస్టాబ్లిష్ చెయ్యలేదు. అసలు ఆ సీన్స్ లో కొత్తదనం కూడా ఏమి లేదు. ఫోక్సో వలన ఆల్రెడీ జైళ్లల్లో మగ్గుతున్న వారి గురించి చూపించాల్సింది. ఫస్ట్ హాఫ్ విషయానికి వస్తే ప్రియదర్శి ,సాయికుమార్, శివాజీ తమ నటనతో ముందు ముందు ఏం చేస్తారో అనే క్యూరియాసిటీ కలిగించారు. కానీ చందు,జాబిలి లవ్ ట్రాక్ నిడివి ఎక్కువ ఉండటాన్నిప్రేక్షకులు అంతగా జీర్ణించుకోలేకపోతారు. ఇక అక్కడ్నుంచి అందరు ఉహించుకున్నట్టుగానే కథనాలు సాగుతాయి. ఇంటర్వెల్ ట్విస్ట్ కూడా అందుకే పెద్దగా పేలలేదు. జాబిలి, చందు పైనే తన ప్రమేయం లేకుండా చెయ్యేసాడని చెప్పి, అప్పుడు ఫోక్సో కేసు నమోదయ్యి ఉంటే ప్రేక్షకులు థ్రిల్ గా ఫీల్ అయ్యే వాళ్ళు. ఆ తర్వాత చివర్లో మంగపతే అలా చెప్పించాడని చూపించాల్సింది. సెకండ్ హాఫ్ విషయానికి వస్తే రెగ్యులర్ గా సినిమాల్లో వచ్చే కోర్టు డ్రామాగానే సీన్స్ ఉన్నాయి. 'ఫోక్సో' అనే పేరు తప్ప మిగతావన్నీ మాములువే. కాకపోతే నటీనటుల పెర్ఫార్మెన్సు వల్ల ఎక్కడా బోర్ కొట్టలేదు. చందు క్లైమాక్స్ లో బయటకి వస్తాడని ప్రేక్షుకులకి తెలుసు కాబట్టి సీన్స్ లో మలుపులు ఉండాల్సింది. ఈ కేసులో తీర్పు రాకపోయినా కూడా అమాయకుడైన చందు జైల్లో ఉన్నాడనే ఫీల్ ప్రేక్షకుల్లో ఉండటంతో పాటు కొత్తగాను ఉండేది. 'ఫోక్సో' అనే పేరుకి ఒక పవర్ ని కూడా ఇచ్చినట్టయ్యేది. అసలు చందు, జాబిలి ని ప్రేమికులుగా చూపించాల్సిన అవసరం కూడా లేదు. మంచి ఫ్రెండ్స్ గా చూపించినా బాగుండేది. ఈ మూవీకి కొద్దో గొప్పో ప్లస్ అంటే శివాజీ తో వచ్చే సీన్స్ మాత్రమే.
నటీనటుల సాంకేతిక నిపుణుల పని తీరు
తేజ అనే లాయర్ క్యారక్టర్ లో ప్రియదర్శి చాలా చక్కగా నటించాడు. సినిమా మొత్తం మీద తన క్యారక్టర్ కి సంబంధించిన వేరియేషన్స్ ఎక్కువగా లేకపోయినా కూడా తన క్యారక్టర్ కి న్యాయం చేసాడు. యువజంట చందు, జాబిలి క్యారెక్టర్స్ లో చేసిన హర్షరోషన్(Harsha roshan), శ్రీదేవీ(Sridevi) తమ పాత్రల్లో జీవించారు. ప్రేమ, ఎమోషన్, అమాయకత్వం ఇలా అన్నింటిలో అత్యుత్తమ నటనని కనపర్చారు. మంగపతి క్యారక్టర్ లో శివాజీ యాక్టింగ్ గురించి ఎంత చెప్పిన తక్కువే అవుతుంది. తనని తప్ప ఇంకో నటుడిని ఆ క్యారక్టర్ లో ఉహించుకోలేనంతగా విజృంభించాడు. సాయికుమార్, హర్షవర్ధన్, రోహిణి, రాజశేఖర్ అనింగి, సురభి ప్రభావతి కూడా తమ క్యారక్టర్ లకి న్యాయం చేసారు. ముఖ్యంగా జడ్జి క్యారక్టర్ చేసిన బోగిరెడ్డి శ్రీనివాస్ గురించి ప్రత్యేకంగా చెప్పుకోవాలి. ఎందుకంటే తీర్పులు చెప్పడం ఎక్కువగా ఉంది కాబట్టి ప్రేక్షకులకి బోర్ కొట్టకుండా ఉండాలి. ఆ విధంగా చెయ్యడంలో భోగిరెడ్డి శ్రీనివాస్ సక్సెస్ అయ్యాడని చెప్పవచ్చు. దర్శకత్వంలో అయితే ఎలాంటి మెరుపులు లేవు. కథకుడు కూడా దర్శకుడే కాబట్టి తాను చెప్పాలనుకున్న పాయింట్ మీదే దృష్టి పెట్టి, ఆ దిశగా సీన్స్ అల్లుకోవాల్సింది. ఇంటర్ కాస్ట్ లవ్ జోలికి వెళ్లడం వల్ల స్టోరీ లుక్ మారిపోయింది. ఇలాంటి సినిమాలకి ఫొటోగ్రఫీ విభిన్నంగా ఉండాలి. కానీ ఆ ఛాయలు కనిపించవు. మ్యూజిక్ అండ్ బ్యాక్ గ్రౌండ్ మ్యూజిక్ కూడా సో సో గానే ఉంది. నిర్మాణ విలువలు గురించి చెప్పుకోవడానికి కూడా ఏం లేదు
ఫైనల్ గా చెప్పాలంటే.. ఫోక్సో చట్టం వలన ఉపయోగాలు, నష్టాలు వంటి వాటిపై కథనాలు నడుస్తు ప్రజల్లో, చట్టాల్లో ఆలోచన తీసుకురావాల్సిందిపోయి, ఇంటర్ క్యాస్ట్ లవ్ ని చేర్చడం వలన కోర్ట్ ఏ మేర ప్రేక్షకులని ఆకట్టుందో చూడాలి.
Rating 2.5/5
అరుణాచలం
Also Read
Latest News
Video-Gossips
TeluguOne Service
Customer Service
Live Help 24/7Customer Care
Send your Queries to
