ఒకప్పుడు వీడియో జాకీగా పాపులారిటీ సంపాదించుకొని, 'లచ్చి' సినిమాతో హీరోయిన్‌గా కూడా ఎంట్రీ ఇచ్చిన జయతి, కొంత విరామంతో ‘నా ఫ్రెండ్‌దేమో పెళ్లి..’ అనే మ్యూజిక్ వీడియో సాంగ్‌తో మన ముందుకొచ్చారు. భీమ్స్ సిసిరోలియో సంగీతం సమకూర్చిన ఈ పాటకు కాస‌ర్ల శ్యామ్‌ సాహిత్యం అందించారు. శ్రావ‌ణ భార్గ‌వి పాడిన ఈ పాటకు భాను మాస్టర్ కొరియోగ్రఫీ సమకూర్చారు.

గ్రూప్ డ్యాన్సర్లతో కలిసి జయతి చేసిన డ్యాన్సులు, పాటలోని సాహిత్యానికి తగ్గట్లుగా ఆమె ప్రదర్శించిన హావభావాలు ఆకట్టుకున్నాయి. కాస్ట్యూమ్స్ విషయంలోనూ ఆమె చాలా శ్రద్ధ చూపించారు. నివృతి వైబ్స్ ద్వారా ఈ పాటను రిలీజ్ చేశారు. ప్రసాద్ ల్యాబ్స్‌లో బుధవారం ఈ వీడియో సాంగ్‌ను యాక్టర్ జె.డి. చక్రవర్తి ఆవిష్కరించారు.   

ఈ మ‌ధ్య కాలంలో తన సంగీతంతో అద్భుతమైన పాటలను అందిస్తూ వస్తోన్న భీమ్స్ మరోసారి తన బాణీలతో మెస్మరైజ్ చేశారు. లిరిసిస్ట్‌ కాసర్ల శ్యామ్ మరోసారి తన పెన్ పవర్ ఎలా ఉంటుందో చూపించారు. జ‌య‌తి విజ‌న్స్ స‌మ‌ర్ప‌ణ‌లో శ్రీకోనేటి ఈ పాట‌ను డైరెక్ట్ చేశారు. 

పాట చాలా బాగుందనీ, జయతి చాలా అందంగా కనిపించడంతో పాటు బాగా డ్యాన్స్ చేసిందనీ జె.డి. చక్రవర్తి ప్రశంసించారు. జబర్దస్త్ రాంప్రసాద్, డాన్సర్-యాక్టర్ అక్సా ఖాన్, కొరియోగ్రాఫర్ స్రస్టి వర్మ, నిర్మాత సురేశ్ కొండేటి కూడా ఈ ఈవెంట్‌లో పాల్గొని జయతిని అభినందించారు.

2024 పూర్త‌య్యేస‌రికి 150 పైచిలుకు మ్యూజిక్ వీడియో సాంగ్స్‌ను అందించ‌టానికి స‌న్నాహాలు చేస్తున్నట్లు నివృతి వైబ్స్ సంస్థ తెలియ‌జేసింది.