కల్వకుర్తి నియోజకవర్గంలో కాంగ్రెస్ అభ్యర్థి, తాజా మాజీ ఎమ్మెల్యే వంశీచంద్ రెడ్డి పై రాళ్ల దాడి జరిగింది.ఆమనగల్లు మండలం జంగారెడ్డిపల్లె లో ఈ ఘటన చోటుచేసుకుంది. పోలింగ్‌ బూత్‌ను పరిశీలించడానికి వెళ్లగా ఆయనపై కొందరు వ్యక్తులు రాళ్లతో దాడికి దిగారు. దాడిలో వంశీచంద్ ప్రయాణిస్తున్న కారు అద్దాలు ధ్వంసమయ్యాయి. వంశీచంద్ రెడ్డి కంటిపైన, తలకు గాయాలయ్యాయి. దీంతో ఆయన స్పృహ తప్పి పడిపోయారు. వంశీ చంద్ రెడ్డిని వెంటనే ఆమనగల్లు ప్రభుత్వాసుపత్రికి తరలించారు. అనంతరం మెరుగైన వైద్యం కోసం హైదరాబాద్‌ నిమ్స్‌ ఆస్పత్రికి తీసుకెళ్లారు. బీజేపీకి చెందిన వారే ఈ దాడికి పాల్పడ్డారని కాంగ్రెస్‌ నాయకులు ఆరోపిస్తున్నారు. ఈ ఘటనతో జంగారెడ్డిపల్లిలో ఉద్రిక్త పరిస్థితులు నెలకొన్నాయి.  ఈ ఘటనకు ముందు పోలింగ్ బూత్ వద్ద కాంగ్రెస్-బీజేపీ కార్యకర్తల మధ్య ఘర్షణ జరిగింది. ఇరువర్గాలు తోపులాటకు దిగాయి. దీని గురించి సమాచారం తెలిసిన వంశీచంద్‌రెడ్డి అక్కడకి చేరుకున్నారు. ఈ నేపథ్యంలో వంశీచంద్‌రెడ్డిపై దాడి జరిగింది.