Top Stories

విచ్చలవిడిగా డబ్బు..హుజురాబాద్ ఉప ఎన్నిక రద్దు?

కరీంనగర్ జిల్లా హుజురాబాద్ నియోజకవర్గంలో మద్యం ఏరులై పారుతోంది. ఓటర్లకు విచ్చలవిడిగా డబ్బులు పంపిణి జరుగుతోంది. ఓటుకు 10 వేల రూపాయలు ఇస్తున్నట్లుగా ప్రచారం జరుగుతోంది. కవర్లలో డబ్బులు పెట్టి పంచుతున్న విజువల్స్ సోషల్ మీడియాలో వైరల్ గా మారుతున్నాయి. పలు ప్రాంతాల్లో తమకు డబ్బులు ఇవ్వడం లేదంటూ ఓటర్లు రోడ్డెక్కి ఆందోళనలు కూడా చేస్తున్నారు. హుజురాబాద్ లో నెలకొన్న పరిస్థితులపై ప్రజాస్వామ్యవాదులు ఆందోళన వ్యక్తం చేస్తున్నారు. హుజురాబాద్ లో ఎన్నికలను అపహాస్యం చేస్తున్నారనే ఆరోపణలు వస్తున్నాయి. టీఆర్ఎస్, బీజేపీ తీరుపై తీవ్ర విమర్శలు వస్తున్నాయి. కరీంనగర్ జిల్లా హుజురాబాద్ ఉప  ఎన్నికను రద్దు చేయాలని కోరుతూ ఢిల్లీలో పోరాటం చేస్తోంది కాంగ్రెస్ పార్టీ.  కేంద్ర ప్రధాన ఎన్నికల కమిషనర్ సుశీల్ చంద్ర ను కలిసి విజ్ఞప్తి చేయనుంది.  ఏఐసీసీ జాతీయ అధికార ప్రతినిధి  దాసోజు శ్రవణ్, ఏఐసీసీ కార్యదర్శి చల్లా వంశీచంద్ రెడ్డి, కాంగ్రెస్ నేతలు కుసుమ కుమార్, హర్కర వేణుగోపాల్ తదితర తెలంగాణ కాంగ్రెస్ నాయకులు సీఈసీని కలవబోతున్నారు.  అడ్డగోలుగా అక్రమాలు, ఎన్నికల నిబంధనలకు తూట్లు పొడుస్తూ హుజురాబాద్ లో ఓటర్లను టిఆర్ఎస్, బీజేపీ పార్టీలు కొనుగోలు చేస్తున్నాయని కాంగ్రెస్ ఆరోపిస్తోంది. ఇందుకు తగిన ఆధారాలను సీఈసీకి సమర్పించబోతోంది.ఓటుకు 6 వేల రూపాయల నుంచి 10 వేల వరకు డబ్బులు ఇచ్చి ఓట్లను కొనుగోలు చేస్తున్నారని ఆధారాలతో ఫిర్యాదు చేయనున్నారు కాంగ్రెస్ నేతలు. బహుమతులు, ప్రలోభాలు, ఓట్ల కొనుగోలు, అధికార దుర్వినియోగం తదితర అక్రమాలు జరిగాయని ఆరోపణ.. మూడు గంటల్లో లక్షన్నర మంది ఓటర్లకు 90 కోట్ల రూపాయలు పంపిణీ జరిగిందని, ఇంత ఘోరంగా విచ్చలవిడిగా అడ్డగోలు అక్రమాలు, ఎన్నికల నిబంధనల అతిక్రమణలు ఎక్కడా జరగలేదని ఆరోపణ లతో ఫిర్యాదు చేయనున్నరు.  కాంగ్రెస్ నేతల ఫిర్యాదుపై కేంద్ర ఎన్నికల సంఘం ఎలా స్పందిస్తుందన్నది ఆసక్తిగా మారింది. ఈనెల 30న హుజురాబాద్ పోలింగ్ జరగనుంది. 
Publish Date:Oct 28, 2021

శ్రీశారదా పీఠానికి 15 ఎకరాలు.. ఏపీ కేబినెట్ పచ్చజెండా.. 

అమరావతిలో సీఎం అధ్యక్షతన జరిగిన మంత్రివర్గ సమావేశంలో పలు కీలక నిర్ణయాలు తీసుకున్నారు, రైతులకు 9 గంటల పగటిపూట ఉచిత విద్యుత్ అందించేందుకు సోలార్ ఎనర్జీ కార్పొరేషన్ ఆఫ్ ఇండియాతో ఒప్పందానికి కేబినెట్ ఆమోదం లభించింది. యూనిట్ కు రూ.2.49 చొప్పున ఏడాదికి 17వేల మిలియన్ యూనిట్ల విద్యుత్ కొనుగోలు ప్రతిపాదనకు ఆమోదం తెలిపింది మంత్రివర్గం. సినిమాటోగ్రఫీ చట్టసవరణ ప్రతిపాదనలకు గ్రీన్ సిగ్నల్ పడింది. 2021 జనాభా గణనలో బీసీ జనాభాను కులాల వారీగా గణించాలని కేంద్రాన్ని కోరుతూ అసెంబ్లీలో తీర్మానం చేసే ప్రతిపాదనకు ఆమోదం తెలిపారు, అగ్రవర్ణాల సంక్షేమం కోసం ప్రత్యేక శాఖ ఏర్పాటుకు కేబినెట్ ఆమోదం లభించింది. కొత్తగా జైన్ కార్పొరేషన్, సిక్కు కార్పొరేషన్ ఏర్పాటుకు కేబినెట్ ఓకే చెప్పింది. వైద్య, ఆరోగ్యశాఖలో భారీగా ఉద్యోగాల భర్తీకి పచ్చజెండా ఊపింది. రాష్ట్రంలో 5 చోట్ల సెవన్ స్టార్ పర్యాటన రిసార్ట్ ల ఏర్పాటు కోసం భూముల కేటాయింపునకు తీర్మానం చేసింది. పీపీపీ విధానంలో శిల్పారామం అభివృద్ధికి జగన్ కేబినెట్ ఆమోదముద్ర వేసింది. విశాఖలో తాజ్‍వరుణ్ బీచ్ ప్రాజెక్ట్ కు ఆమోదం తెలిపిన కేబినెట్.. జయలక్ష్మీ నరసింహ శాస్త్రి గుండ్లూరు ట్రస్టుకు అనంతపురం జిల్లా బొమ్మేపర్తిలో 17.49 ఎకరాల కేటాయింపునకు ఆమోదముద్ర వేసింది. శ్రీశారదా పీఠానికి కొత్తవలసలో 15 ఎకరాల కేటాయింపునకు కేబినెట్ ఆమోదం లభించింది. ఇక వచ్చేనెల 17 నుంచి ఏపీ అసెంబ్లీ సమావేశాలు నిర్వహించాలని జగన్ మంత్రివర్గం నిర్ణయించింది. 
Publish Date:Oct 28, 2021

హుజురాబాద్ పోలింగ్ కు ముందు కేసీఆర్ కు బిగ్ షాక్.. కారులో కలవరం..

తెలంగాణ రాజకీయాల్లో అత్యంత కీలకంగా మారిన, అన్ని పార్టీలకు సవాల్ గా మారిన హుజురాబాద్ ఉప ఎన్నిక పోలింగ్ కొన్ని గంటలకు ముందు ముఖ్యమంత్రి కేసీఆర్ కు షాక్ తగిలింది. హుజురాబాద్ లో ప్రభుత్వ పైలెట్ ప్రాజెక్టుగా అమలు చేస్తున్న దళిత బంధు పథకం అమలు విషయంలో తెలంగాణ రాష్ట్ర ప్రభుత్వానికి హైకోర్టులో ఎదురుదెబ్బ తగిలింది.  హుజూరాబాద్ లో దళితబంధు నిలిపివేత అంశంలో ప్రభుత్వానికి వ్యతిరేకంగా హైకోర్టు తీర్పునిచ్చింది. ఈసీ ఉత్తర్వులు రద్దు చేయాలన్న ప్రభుత్వ అభ్యర్థనను కోర్టు తోసిపుచ్చింది. ఈసీ నిర్ణయాల్లో తాము జోక్యం చేసుకోమని హైకోర్టు తేల్చి చెప్పింది. హుజూరాబాద్ లో ఉప ఎన్నిక నేపథ్యంలో దళితబంధు పథకాన్ని నిలిపివేయాలని ఇటీవల ఈసీ ఆదేశాలు జారీ చేసింది. దీనిపై టీఆర్ఎస్ తోపాటు పలువురు కోర్టుకు ఎక్కడంతో విచారణ జరిపిన కోర్టు తాజాగా ఈ కీలక ఆదేశాలు జారీ చేసింది. ఉప ఎన్నికల వేళ.. హుజూరాబాద్ నియోజకవర్గంలో పైలెట్ ప్రాజెక్టుగా చేపట్టిన ‘దళితబంధు’ పథకాన్ని అమలు చేయకుండా కొందరు కోర్టుకు ఎక్కగా.. దానిపై విచారించిన ధర్మాసనం ఈ తీర్పు ఇచ్చింది. హుజురాబాద్ నియోజకవర్గంలో దళిత బంధు పథకంపై టీఆర్ఎస్ ఎన్నో ఆశలు పెట్టుకుంది. ఇప్పుడు పథకాన్ని నిలుపుదల చేయడంతో ఎన్నికలో దీని ప్రభావం ఉంటుందనే చర్చ సాగుతోంది. ఖచ్చితంగా టీఆర్ఎస్ ఓటు బ్యాంకుపై ప్రతాపం చూపుతుందని విశ్లేషకులు అంటున్నారు. గతంలో జీహెచ్ఎంసీ ఎన్నికల వేళ వరద బాధితులకు ఇంటికి రూ.10వేలు పథకం ప్రకటించి కోర్టు ఆదేశాలతో నిలిపివేసిన టీఆర్ఎస్ సర్కార్ కు గట్టి దెబ్బ తగిలింది. జనాలు బీజేపీకి ఓట్లు వేసి గెలిపించారు. ఇప్పుడే అదే జరుగబోతోందని.. దళితులు టీఆర్ఎస్ కు వ్యతిరేకంగా మారే అవకాశం ఉందంటున్నారు.  మరోవైపు దళిత బంధుకు సంబంధించి హైకోర్టులో మరో పిల్ దాఖలైంది. రాష్ట్రవ్యాప్తంగా 16 ఎస్సీ రిజర్వుడ్ నియోజకవర్గాలు ఉన్నాయని.. అక్కడ దళితబంధు అమలు చేయకుండా జనరల్ నియోజకవర్గం హుజూరాబాద్ లో అమలు చేయడం చట్టవిరుద్ధమని సామాజిక కార్యకర్త అక్కడ సురేష్ కుమార్ మరో పిల్ దాఖలు చేశారు. ఎన్నికల్లో లబ్ధి పొందేందుకు టీఆర్ఎస్ పార్టీ ఈ పథకాన్ని అమలు చేసేందుకు ప్రయత్నిస్తోందని.. ఈ వ్యవహారాన్ని చట్టవిరుద్ధంగా ప్రకటించాలని కోరారు. ఈ పిల్ లో ప్రభుత్వ ప్రధాన కార్యదర్శి సాంఘిక సంక్షేమ శాఖ కార్యదర్శి సీఎం కేసీఆర్ కేంద్ర ఎన్నికల కమిషన్ చీఫ్ ఎలక్షన్ ఆఫీసర్ తోపాటు కాంగ్రెస్ బీజేపీ టీఆర్ఎస్ పార్టీల కార్యదర్శులను ప్రతివాదులుగా చేర్చారు. నేరుగా బ్యాంకు ఖాతాల్లోకి రూ.10 లక్షలు బదిలీ చేస్తామని చెబుతున్న నేపథ్యంలో ప్రజా ప్రాతినిధ్య చట్టం కింద చర్యలు తీసుకోవాలని కోరారు. ఎస్సీ నియోజకవర్గాల్లో మాత్రమే ఈ పథకాన్ని అమలు చేసేలా ఆదేశించాలని కోరారు. ఈ రెండు పిల్ లు వచ్చేవారం విచారణకు వచ్చే అవకాశం ఉంది.   
Publish Date:Oct 28, 2021

ప‌ట్టాభి క‌స్ట‌డీ కోరిన పోలీసులు.. షాక్ ఇచ్చిన కోర్టు..

ఏపీలో డ్ర‌గ్స్‌, గంజాయి దందాపై మండిప‌డుతూ.. సీఎం జ‌గ‌న్‌రెడ్డిని ఉద్దేశించి బోసిడీకే అన్నారు టీడీపీ అధికార ప్ర‌తినిధి ప‌ట్టాభి. అంతే.. వైసీపీ శ్రేణులు రెచ్చిపోయారు. విజ‌య‌వాడ‌లోని ప‌ట్టాభి ఇంటిపై దాడి చేసి ధ్వంసం చేశారు. అంత‌టితో ఆగ‌కుండా.. మంగ‌ళ‌గిరిలోని పార్టీ కేంద్ర కార్యాల‌యంలోనూ వంద‌లాది వైసీపీ మూక‌లు బీభ‌త్సం సృష్టించారు. ప్ర‌భుత్వ ఉగ్ర‌వాదంపై పోరంటూ టీడీపీ అధినేత చంద్ర‌బాబు 36 గంట‌ల నిర‌వ‌ధిక దీక్ష చేశారు. ఢిల్లీ వెళ్లి రాష్ట్ర‌ప‌తి రామ్‌నాథ్ కోవింద్‌ని క‌లిసి ఏపీలో రాష్ట్ర‌ప‌తి పాల‌న విధించాల‌ని కోరారు. విష‌యం తెలిసి కేంద్ర హోంమంత్రి అమిత్‌షా.. చంద్ర‌బాబుకు స్వ‌యంగా ఫోన్ చేసి వివ‌రాలు క‌నుగొన్నారు. ఓవైపు ఇంత ర‌చ్చ జ‌రుగుతుంటే.. పోలీసులేమో.. ప‌ట్టాభిపై ప‌డ్డారు. ఘ‌ట‌న జ‌రిగిన త‌ర్వాత‌ ప‌ట్టాభి ఇంటి త‌లుపులు ప‌గ‌ల‌గొట్టి మ‌రీ అరెస్ట్ చేసి తీసుకెళ్లారు. కోర్టు రిమాండ్ విధించ‌డంతో జైలుకూ త‌ర‌లించారు. బెయిల్ మీద బ‌య‌ట‌కు వ‌చ్చిన ప‌ట్టాభిని.. తాము క‌స్ట‌డీలోకి తీసుకుంటామంటూ తాజాగా కోర్టును ఆశ్ర‌యించారు గ‌వ‌ర్న‌ర్‌పేట పోలీసులు.    పట్టాభిరామ్‌ పోలీసు కస్టడీ పిటిషన్‌ను విజయవాడ న్యాయస్థానం కొట్టేసింది. సీఎం జగన్‌పై అనుచిత వ్యాఖ్యల కేసులో ఇటీవల అరెస్టై బెయిల్‌పై విడుదలైన పట్టాభిని తమ కస్టడీకి ఇవ్వాలని గవర్నర్‌పేట పోలీసులు కోర్టులో పిటిషన్‌ దాఖలు చేశారు. పట్టాభి చేసిన వ్యాఖ్యల్లో కుట్ర కోణం దాగి ఉందని.. పూర్తి వివరాలు రాబట్టేందుకు కస్టడీలోకి ఇవ్వాలని కోరారు.  పట్టాభి అరెస్టు ప్రక్రియ సరిగా లేదని.. ఈ విషయాన్ని ఉన్నత న్యాయస్థానం కూడా ప్రస్తావించిందని ఆయన తరఫు న్యాయవాది కోర్టుకు వివరించారు. ఇరువురి వాదనలు విన్న ధర్మాసనం పోలీసుల పిటిషన్‌ను డిస్మిస్‌ చేసింది. దాడి చేసిన వారిని పెద్ద‌గా ప‌ట్టించుకోకుండా.. బాధితుడైన ప‌ట్టాభినే పోలీసులు ఇలా టార్గెట్ చేయ‌డంపై విమ‌ర్శ‌లు వ‌స్తున్నాయి. 
Publish Date:Oct 28, 2021

మంగ‌ళ‌వారం మ‌ర‌ద‌లు.. జ‌గ‌న్ కేసుల్లో ట్విస్ట్‌.. కొత్త వేరియంట్ క‌ల‌క‌లం.. టాప్‌న్యూస్ @1pm

1. ప్ర‌పంచాన్ని వ‌ణికిస్తున్న కరోనా డెల్టా ఏవై.4.2 వేరియంట్ తెలంగాణలో కలకలం రేపుతోంది. 48 ఏళ్ల వ్య‌క్తికి, 22 ఏళ్ల యువతికి ఏవై 4.2 నిర్ధారణ కావ‌డం ఆందోళ‌న క‌లిగిస్తోంది. కొత్త వేరియంట్‌పై స్పందించేందుకు వైద్యాధికారులు నిరాక‌రిస్తున్నారు. కర్ణాటక, ఆంధ్రప్రదేశ్ సహా పలు రాష్ట్రాల్లో ఈ వేరియంట్‌ విస్తరిస్తున్న‌ట్టు స‌మాచారం.  2. జగన్ అక్రమాస్తుల కేసుల్లో ఇకపై తెలంగాణ హైకోర్టులో రోజువారీ విచారణ జరగనుంది. దాఖలైన రిట్ పిటిషన్లపై రోజువారీ విచారణ చేపడతామని హైకోర్టు స్పష్టం చేసింది. ప్రజాప్రతినిధులకు సంబంధించిన వ్యాజ్యాలను త్వరగా తేల్చాలన్న సుప్రీంకోర్టు ఆదేశాలతో విచారణ చేపట్టనుంది. సీబీఐ కోర్టులో వ్యక్తిగత హాజరు మినహాయింపు కోరుతూ జగన్ దాఖలు చేసిన పిటిషన్లతో సహా 2012 నుంచి దాఖలైన 40 వ్యాజ్యాలను విచారణ జాబితాలో ఉన్నత న్యాయస్థానం చేర్చింది.  3. ‘‘రాష్ట్రంలో ఉద్యోగాల భర్తీకి నోటిఫికేషన్‌ జారీ చేయాలని దీక్షలు చేస్తానంటూ మంగళవారం మరదలు ఒకామె బయలు దేరింది’’ అంటూ మంత్రి నిరంజన్‌ రెడ్డి తీవ్ర వ్యాఖ్యలు చేశారు. వైఎస్సార్‌టీపీ అధ్యక్షురాలు షర్మిల ప్ర‌జా ప్ర‌స్థాన‌ పాదయాత్ర కొనసాగిస్తూనే.. ప్రతి మంగళవారం నిరుద్యోగ దీక్ష చేస్తున్నారు. ష‌ర్మిల దీక్ష‌ల‌ను టార్గెట్ చేస్తూ.. మంగ‌ళ‌వారం మ‌ర‌ద‌లంటూ మంత్రి నిరంజ‌న్‌రెడ్డి చేసిన కామెంట్లు కాంట్ర‌వ‌ర్సీగా మారాయి.  4. మాజీ మంత్రి, వైఎస్ వివేకానంద రెడ్డి హత్య కేసులో నలుగురిపై సీబీఐ అధికారులు చార్జిషీటు దాఖలు చేయడంతో పులివెందులతో పాటు కడప జిల్లాలో కలకలం రేగుతోంది. వివేకా హత్య కేసులో సీబీఐ అధికారులు మరికొందరిని అరెస్ట్ చేసి చార్జిషీటు దాఖలు చేస్తారని ప్రచారం జరుగుతోంది. దీంతో పులివెందులలో సీబీఐ విచారణ ఎదుర్కొంటున్న అధికారపార్టీ నేతల్లో ఆందోళ‌న వ్య‌క్త‌మ‌వుతోంది.  5. హుజురాబాద్ నియోజకవర్గం కమలపూర్ మండలంలో అధికార పార్టీ నేతలు కొందరికి డబ్బులు ఇచ్చి మరికొందరికి ఇవ్వలేదని ఆరోపిస్తూ ఓట‌ర్లు రోడ్డెక్కారు. తమకు డబ్బులు ఇవ్వాలంటూ ఏకంగా తహశీల్దార్ కార్యాలయాన్ని ముట్టడించారు. డ‌బ్బుల కోసం పెద్ద సంఖ్య‌లో మహిళలు రావడంతో పోలీసులు ఎమ్మార్వో కార్యాలయం దగ్గర ఆందోళన చేస్తున్న వారిని అక్కడినుంచి పంపించేశారు.  6. పెట్రోల్, డీజీల్ ధరలు తగ్గించాలంటూ విజయవాడలో లారీ యజమానులు ఆందోళన చేపట్టారు. కేంద్ర, రాష్ట్ర ప్రభుత్వాలకు వ్యతిరేకంగా నిరసన తెలిపారు. కేంద్రం పన్నుల రూపంలో రూ. 32 వసూలు చేస్తుందని, రాష్ట్ర ప్రభుత్వం లీటర్ డీజిల్‌కు 22.25శాతం వ్యాట్ టాక్స్‌తో పాటు అదనంగా నాలుగు రూపాయలు, రోడ్ సెస్ కింద 1.22 రూపాయలు వసూలు చేస్తోందని ఆగ్ర‌హం వ్య‌క్తం చేశారు.  7. గచ్చిబౌలి పోలీస్ స్టేషన్ పరిధిలోని వట్టి నాగులపల్లిలో ప్రేమోన్మాది రెచ్చిపోయాడు. ప్రేమను నిరాకరించిందని ప్రేమ సింగ్ అనే యువకుడు ఓ యువతి ఇంటిలో చొరబడి.. గొంతు, చేతి మణికట్టు ద‌గ్గ‌ర క‌త్తితో దాడి చేశాడు. యువ‌తి అరుపులతో బంధువులు, స్థానికులు యువకుడిని ప‌ట్టుకొని చితకబాది పోలీసులకు అప్పగించారు.  8. అనంతపురం జిల్లా పుట్లూరు మండలంలో పోలీసులు రెండు నాటు బాంబులను స్వాధీనం చేసుకున్నారు. మాడుగుపల్లి గ్రామానికి చెందిన నరేష్ కుమారెడ్డి అనే వ్యక్తి యూట్యూబ్ లో చూసి నాటు బాంబులు తయారీ చేశాడు. అమ్మేందుకు అనంతపురం తీసుకువెళ్తుండగా పోలీసులు పట్టుకున్నారు.  9. ప్రకాశం జిల్లా కనిగిరి మండలం, ఎన్ గొల్లపల్లిలో సచివాలయ సిబ్బందిపై వాలంటీర్ ఉదయ్ కిరణ్ దౌర్జన్యం ప్రదర్శిస్తున్నాడు. చెప్పినట్లు వినకపోతే ఉన్నతాధికారులకు అనవసర ఫిర్యాదులు చేస్తున్నాడని, మహిళా సిబ్బందిని తరచూ తిడుతున్నాడ‌నే ఆరోపణలు ఉన్నాయి. అధికార పార్టీ నేతల అండదండలతో వాలంటీర్ రెచ్చిపోతున్నాడని అంటున్నారు. వాలంటీర్ ప్రవర్తనతో విసుగు చెందిన సచివాలయ సిబ్బంది పోలీసులకు ఫిర్యాదు చేశారు. 10. నల్గొండ జిల్లా చిట్యాలలో పోలీసులు భారీగా గంజాయిని పట్టుకున్నారు. జాతీయ రహదారిపై బస్సులలో తనిఖీలు చేస్తుండ‌గా.. ఏపీలోని సీలేరు నుంచి ఆదిలాబాద్ వెళ్తున్న బస్సులో 22 కేజీల గంజాయి దొరికింది. గంజాయిని స్వాధీనం చేసుకొని.. తరలిస్తున్న వ్యక్తిని పోలీసులు అరెస్ట్ చేసి కేసు నమోదు చేశారు.  
Publish Date:Oct 28, 2021

అబ్రకాదబ్రా.. మాయమైన రుషి కొండ.. ఆ మాంత్రికుడు ఎవరంటే?

గుడిని  మింగేవాళ్లు కొందరు ఉంటే.. గుడిలో లింగాన్ని మింగేవాళ్లు మరి కొందరుంటారు. ఇదంతా గతం. ఇప్పుడు కొండను మింగేవాళ్లు కొందరు ఉంటే.. రుషి కొండలో కొండను మింగేవాళ్లు మరికొందరు తయ్యారయ్యారు. ఇది ప్రస్తుతం.  గద్దె నెక్కిన నాయకులు ప్రజల ఆస్తుల కర్పూరం చేసే పనిలో ఉన్నారంటే కలికాలం అని ఇన్నాళ్లు జనాలు బుగ్గలు నొక్కకున్నారు. కానీ.. కొండలను మింగే అనకొండలుగా తయారయ్యారనే వాస్తవాన్ని మాత్రం జనం జీర్ణించుకోలేక పోతున్నారు. అందునా విశాఖ ప్రజలు. వైయస్ఆర్ కాంగ్రెస్ పార్టీ రాజ్యసభ సభ్యుడు వి. విజయసాయిరెడ్డి. తెలుగు ప్రజలకు పరిచయం అక్కర్లేని పేరు. ఆంధ్రప్రదేశ్ ముఖ్యమంత్రి వైయస్ జగన్ మోహన్ రెడ్డి తర్వాత అంతటి వాడు.  అయితే తాజాగా విశాఖలో విజయసాయిరెడ్డి పేరిట రచ్చ రచ్చ జరుగుతోంది. విశాఖపట్నం రుషి కొండ సుందరమైన ప్రాంతం. ఆ ప్రాంతంలో రుషి కొండను పిండి చేయడానికి విజయసాయిరెడ్డి కంకణం కట్టుకున్నారని టీడీపీ నేతలు ఆరోపిస్తున్నారు. అంతేకాదు.. వారు సైతం ఆందోళనకు దిగారు. విజయసాయిరెడ్డి కుమార్తె కోసం రుషికొండ వద్ద హోటల్ నిర్మిస్తున్నారని సమాచారం.  అందుకోసం రుషి కొండను విజయసాయిరెడ్డి ఆదేశాలతో ఫిండి చేస్తున్నారని టీడీపీ నేతలు ఆరోపిస్తున్నారు. ఇక ఆ పార్టీ సీనియర్ నేత సీహెచ్ అయ్యన్న పాత్రుడు అయితే ఇదే అంశంపై ప్రెస్ మీట్ పెట్టి మరి ఏకంగా జగన్ పార్టీ నేతలపై విమర్శలు గుప్పించారు.  అంతేకాదు రుషి కొండను పిండి చేస్తున్న పోటోలను సైతం టీడీపీ నేతలు తమ పార్టీ అధికారిక ఫేస్‌బుక్‌లో పోస్ట్ చేశారు. అవి చూసిన విశాఖ నగర ప్రజలతోపాటు తెలుగు ప్రజలు.. అందునా విశాఖ అందాలు తిలకించిన ప్రతి ఒక్కరి మనస్సు మూగగా రోదిస్తుంది. రాజుగారు తలుచుకుంటే దెబ్బలకు కొదవా టైపులో విజయాసాయిరెడ్డి తలుచుకుంటే.. కొండలు పిండి చేయడం సులువే అని సోషల్ మీడియాలో సెటైర్లు పేలుతున్నాయి.
Publish Date:Oct 28, 2021